Canllaw: sut i gael sgwrs am 'yr hyn sy'n bwysig' gyda rhywun ag anabledd dysgu

Mae darganfod yr hyn sy'n bwysig i rywun (o safbwynt y person) yn hytrach na'r hyn sy'n bwysig ar ei gyfer (o safbwynt rhywun arall) yn rhan allweddol o ymarfer sy'n seiliedig ar gryfderau.

Trwy ddeall anghenion unigol – a chynnwys y person a'i rwydwaith cymorth – gallwn ni wneud yn siŵr bod ei ofal a'i gefnogaeth wedi'u teilwra, yn dosturiol ac yn barchus.

Mae'n helpu i greu amgylchedd cefnogol sy'n gwneud ansawdd bywyd person sy'n cael ei gefnogi yn well.

Gall pobl ag anableddau dysgu fod ag anghenion gwahanol, a allai effeithio ar sut rydych chi'n cyfathrebu â nhw er mwyn canfod yr hyn sy'n bwysig iddyn nhw.

Gall unrhyw un ddefnyddio'r canllaw hwn i gefnogi rhywun ag anabledd dysgu.

Efallai y bydd gan rai ymarferwyr ffyrdd eraill o helpu pobl i fynegi'r hyn sy'n bwysig iddyn nhw, sydd heb eu cynnwys yn y canllaw hwn.

Gallwch chi ddod o hyd i adnoddau ac arweiniad i'ch helpu i ddefnyddio ymarfer sy'n seiliedig ar gryfderau yn ein hadran ymarfer sy'n seiliedig ar gryfderau.

Mae'r canllaw hwn yn fan cychwyn ar gyfer sgyrsiau am 'yr hyn sy'n bwysig'. Gallwch chi ei ddefnyddio mor aml ag y mynnwch, cyhyd ag y mynnwch.

Y peth pwysicaf yw sylweddoli, rhannu a deall yr hyn sy'n bwysig i'r person rydych chi'n ei gefnogi, a defnyddio'r wybodaeth honno i roi cefnogaeth.

Mae cofnodi a rhannu'r wybodaeth hon yn rheolaidd yn helpu i gynnal bywyd o ansawdd uchel i'r person, gan feithrin amgylchedd cefnogol a chynhwysol.