Deall eich potensial digidol

Rydyn ni'n cefnogi sefydliadau gofal cymdeithasol a'u staff i ddeall eu potensial digidol yn well.

I wneud hyn, rydyn ni wedi creu'r ddyfais botensial ddigidol, a fydd yn eich helpu i gael darlun mwy cyflawn o'ch sgiliau a'ch gallu digidol cyfredol eich hun a'ch sefydliad.

Bydd y ddyfais hefyd yn rhoi cipolwg i ni o’r sefyllfa ledled Cymru, a byddwn ni'n rhannu'r canfyddiadau mewn adroddiad cenedlaethol yn ddiweddarach yn 2025.

Mae'r ddyfais bellach yn fyw. I wneud yn siŵr bod yr adroddiad cenedlaethol yn cofnodi eich profiad o ddefnyddio technoleg ddigidol, cwblhewch y ddyfais erbyn 21 Chwefror.

Os ydych chi ar ein Cofrestr, fe wnaethon ni e-bostio dolen i'r ddyfais i chi ar 9 Ionawr. Edrychwch yn eich ffolder 'junk' os nad ydych chi'n gallu dod o hyd iddo.

Os nad ydych chi ar y Gofrestr, neu os nad ydych chi wedi derbyn eich dolen, cysylltwch â digidol@gofalcymdeithasol.cymru.

Mae'r ddolen yn unigryw i'ch cyflogwr. Mae hyn yn golygu pan fydd staff yn cwblhau’r ddyfais, bydd eu canlyniadau dienw yn bwydo i mewn i ganfyddiadau cyffredinol eu sefydliad.

Os nad ydych chi’n siŵr sut i ddefnyddio’r ddyfais, efallai y bydd ein canllaw ar ddefnyddio’r ddyfais yn ddefnyddiol i chi.

• Bydd y ddyfais yn gofyn i chi ateb cwestiynau am eich hyder digidol a dulliau digidol eich sefydliad. Bydd hyn yn cymryd tua 10 i 30 munud, yn dibynnu ar eich rôl.
• Yna byddwn ni’n anfon eich canlyniadau i'r cyfeiriad e-bost neu'r rhif ffôn symudol rydych chi wedi'i rhoi i ni, ynghyd â chanllawiau am eich cryfderau a'ch meysydd i'w gwella. Byddwn ni hefyd yn rhoi gwybodaeth i chi am adnoddau a hyfforddiant i gefnogi eich datblygiad digidol.
• Os ydych chi’n arweinydd, byddwn ni hefyd yn anfon dolen atoch i ganlyniadau cyffredinol eich sefydliad, gan ddangos eich parodrwydd digidol mewn gwahanol feysydd. Bydd y canlyniadau hyn yn cael eu diweddaru wrth i fwy o bobl o'ch sefydliad ddefnyddio'r ddyfais. Ni fydd unrhyw unigolyn yn gallu cael ei adnabod o'r canlyniadau cyffredinol.

Dywedwch wrth ddarparwyr eraill am y ddyfais fel y gallwn ni helpu pobl sy'n gweithio ym maes gofal cymdeithasol i wneud penderfyniadau mwy gwybodus a gwella canlyniadau i bobl yng Nghymru.

Y fwyaf o bobl sy'n defnyddio'r ddyfais, y mwyaf gwybodus fyddwn ni fel cenedl am ba gefnogaeth sydd ei hangen i wella parodrwydd a hyder digidol y gweithlu a sefydliadau gofal cymdeithasol yng Nghymru.

Gyda'ch help chi, bydd hyn yn gwella:

• gallu arweinwyr i wneud penderfyniadau strategol a dyrannu adnoddau yn fwy effeithiol
• ein dealltwriaeth o anghenion datblygu a bylchau sgiliau yn y gweithlu
• gallu sefydliadau i brofi datrysiadau digidol arloesol
• cydweithio a chefnogaeth gyffredinol
• mynediad cyfartal at gyfleoedd a chefnogaeth gan ddefnyddio adnoddau digidol
• gallu'r gweithlu i roi gofal mwy personol o dan bwysau a disgwyliadau cynyddol.

Gall gwybod mwy am eich hyder digidol eich helpu i wneud yn siŵr eich bod yn barod i wneud y gorau o dechnolegau presennol a newydd, datblygu dulliau newydd ac arloesol o weithio, a sicrhau canlyniadau gwell i bobl sy'n defnyddio gofal a chymorth.

Rydyn ni wedi gweithio gyda Basis i ddatblygu'r ddyfais botensial ddigidol er mwyn deall parodrwydd digidol y gweithlu a sefydliadau ar draws gofal cymdeithasol yng Nghymru yn well.

Ein nod yw helpu pobl a sefydliadau i wneud penderfyniadau gwybodus a chymryd camau i ddatblygu eu hyder digidol, gan wella canlyniadau i bobl sy'n defnyddio gofal a chymorth.

Rydyn ni eisiau deall lle mae’r bylchau, fel y gallwn ni a'n partneriaid gynnig y cymorth a'r hyfforddiant cywir i ddatblygu gweithlu sy’n hyderus yn ddigidol. Rydyn ni hefyd eisiau hybu'r arloesedd digidol sydd eisoes yn digwydd ym maes gofal cymdeithasol.

Bydd hyn yn helpu i sicrhau bod sefydliadau'n gallu defnyddio technoleg yn effeithiol i ddarparu gwell gwasanaethau.

Trwy ddefnyddio'r ddyfais, byddwch chi'n ein helpu i gael dealltwriaeth gliriach o barodrwydd digidol y gweithlu a sefydliadau ar draws gofal cymdeithasol yng Nghymru. Byddwn ni'n defnyddio hyn i lywio ein gwaith gyda phartneriaid ynghylch penderfyniadau ariannu, adnoddau a hyfforddiant, gan helpu pobl sy'n gweithio ym maes gofal cymdeithasol i wella eu hyder a'u sgiliau digidol.

Yr enw blaenorol ar y gwaith hwn oedd yr 'asesiad aeddfedrwydd a llythrennedd digidol'.