Datblygiad proffesiynol parhaus (DPP)

Pan fyddwch yn cofrestru gyda ni, rydych yn cytuno i gydymffurfio â’r Codau Ymarfer Proffesiynol, sy’n cynnwys cynnal a datblygu eich gwybodaeth a’ch sgiliau.

Dylech gadw cofnod o’ch DPP a’i drafod yn rheolaidd gyda’ch rheolwr i sicrhau ei fod yn helpu i wella’ch gofal a chymorth. Nid oes angen i chi ei anfon atom ni oni bai eich bod yn cael eich dewis fel rhan o sampl i'w wirio. Byddwn yn rhoi digon o amser i chi anfon yr hyn sydd ei angen.

Dylai eich DPP:

• wella eich gallu i ddarparu gwasanaethau o ansawdd uchel
• bod o fudd i'ch anghenion personol neu ddatblygiad gyrfa
• fod yn berthnasol i'ch swydd bresennol
• eich helpu i gael yr wybodaeth ddiweddaraf am newidiadau mewn deddfwriaeth, polisi, ymchwil ac ymarfer
• cynnwys unrhyw hyfforddiant gorfodol neu addysg a dysgu proffesiynol parhaus
• gwneud y mwyaf o'r cyfleoedd dysgu sydd ar gael i chi er mwyn ffurfio rhan o'ch datblygiad proffesiynol ehangach.

Dyma rai enghreifftiau:

• cwblhau cymhwyster perthnasol neu gwrs achrededig
• gall gweithwyr cymdeithasol sydd newydd gymhwyso ddefnyddio'r oriau ar ôl cwblhau eu rhaglen gydgrynhoi
• mynychu hyfforddiant mewnol, gweithdai, seminarau neu gynadleddau, a chrynhoi sut mae hyn wedi cyfrannu at eich datblygiad proffesiynol
• cwblhau modiwl e-ddysgu sy'n berthnasol i'ch ymarfer
• mynychu fforwm proffesiynol neu grŵp rhwydweithio a chrynhoi sut mae hyn wedi cyfrannu at eich datblygiad proffesiynol
• cysgodi cydweithiwr mewn tîm, gwasanaeth neu broffesiwn cysylltiedig
• cyflawni ymchwil neu ddarllen strwythuredig sy'n gysylltiedig â'ch practis a chrynhoi sut mae hyn wedi cyfrannu at eich datblygiad proffesiynol
• rhoi cyflwyniad neu arwain trafodaeth ar bwnc newydd yr ydych wedi ymchwilio iddo a chrynhoi sut mae hyn wedi cyfrannu at eich datblygiad proffesiynol
• cwblhau secondiad mewn maes perthnasol o waith newydd neu waith cysylltiedig
• gwirfoddoli i weithio mewn gwasanaeth newydd
• cymryd cyfrifoldebau newydd neu wahanol a chrynhoi sut mae hyn wedi cyfrannu at eich datblygiad proffesiynol.

Dylech anelu at ystod a chydbwysedd o wahanol weithgareddau dysgu.

Mae’n bosib byddwn ni'n gofyn am sampl o’ch cofnodion CPD.

Os byddwn yn gofyn am y wybodaeth hon, byddwn yn rhoi digon o amser i chi anfon yr hyn sydd ei angen arnom ni.

Chi sy’n gyfrifol am gynnal eich CPD, ac mae’n rhaid i’ch cyflogwr sicrhau eich bod chi'n cael cymorth i wneud hynny.

Mae hyn yr un peth p'un a ydych yn gweithio'n llawn-amser neu'n rhan amser, neu os ydych yn gweithio i asiantaeth.

Mae’n rhaid i’ch cyflogwr:

• rhoi cyfleoedd i chi gael mynediad at, i drafod, myfyrio ar a rhannu arfer da yn y gweithle
• sicrhau bod gennych chi gyfleoedd sefydlu, hyfforddi a dysgu sy'n eich cefnogi
• rhoi amser i’ch goruchwylio a'ch gwerthuso
• rhoi adborth defnyddiol i chi am eich perfformiad a'ch datblygiad.

Dylai eich DPP fod yn unol â'r Codau Ymarfer Proffesiynol, yn berthnasol i'ch rôl gofrestredig, a nodau ac amcanion eich cyflogwr a'ch gwasanaeth.

Mae’n bwysig eich bod chi'n trafod ac yn cynllunio gyda’ch cyflogwr sut byddwch chi'n sicrhau bod eich DPP yn helpu i wella eich darpariaeth gofal a chymorth.

Mae angen i chi gwblhau a chadw cofnod o’ch CPD os ydych yn hunangyflogedig.

Os nad ydych yn siŵr pwy all ddilysu eich DPP, edrychwch ar y canllawiau dilysu.

A oes angen i mi gwblhau Datblygiad Proffesiynol Parhaus (DPP) o hyd?

Oes. Os ydych chi ar ein Cofrestr, mae angen i chi barhau i gadw eich hyfforddiant a dysgu yn gyfredol. Rhaid i bobl gofrestredig (ac eithrio myfyrwyr gwaith cymdeithasol) gadw cofnodion o'ch DPP a'i drafod yn rheolaidd gyda'ch rheolwr i sicrhau ei fod yn helpu i wella eich gofal a'r cymorth rydych chi’n darparu. Efallai byddwn ni’n gwirio sampl o gofnodion.

Sut mae Gofal Cymdeithasol Cymru’n gwybod os ydw i wedi gwneud fy DPP?

Wrth adnewyddu, mae rhaid i chi gadarnhau eich bod chi wedi cwblhau DPP a bod eich hyfforddiant a'ch dysgu yn gyfredol ac yn unol â'r safonau sydd yn y Codau Ymarfer Proffesiynol. Os caiff eich cais adnewyddu ei gymeradwyo, byddwn yn gofyn i’ch cyflogwr hefyd gadarnhau bod eich hyfforddiant a’ch dysgu’n gyfredol, ac yn bodloni’r safonau sydd yn y Cod Ymarfer Proffesiynol. Efallai byddwn ni’n gwirio sampl o gofnodion.

Pam rydych chi wedi cael gwared ar y targed oriau o DPP?

Roedd y broses DPP flaenorol wedi bod ar waith ac wedi aros fwy neu lai'r un fath ers i’r Gofrestr agor yn 2001. Yn 2019, gwnaethom ni ymgynghoriad cynhwysfawr a oedd yn cynnwys cynigion i symud i ‘ddull canlyniadau’ at DPP. Cefnogwyd y cynigion yn gryf yn yr ymatebion. Cafodd y gwaith i roi’r newidiadau hyn ar waith ei oedi yn ystod Covid, ond mae bellach yn cael ei symud ymlaen yn dilyn adolygiad allanol. Mae'r dull hwn hefyd yn gyson â rheoleiddwyr iechyd a gofal cymdeithasol eraill yn y DU.

Beth yw sampl?

Er na fydd angen i'r rhan fwyaf o bobl anfon unrhyw dystiolaeth o'u hyfforddiant a'u dysgu atom ni, efallai byddwn ni’n gofyn i rai pobl gofrestredig anfon eu cofnod hyfforddi DPP atom. Os byddwn yn gofyn i chi am y wybodaeth hon, byddwn yn rhoi digon o amser i chi i anfon yr hyn sydd ei angen.

Beth mae hyn yn ei olygu i gyflogwyr?

Mae disgwyl o hyd i gyflogwyr gefnogi eu gweithwyr i gynnal eu hyfforddiant a’u dysgu yn unol â’r Codau Ymarfer Proffesiynol. Bydd angen i gyflogwyr gadarnhau bod hyn wedi'i wneud adeg cymeradwyo.

Ydw i'n gallu barhau i ddefnyddio GCCarlein i gadw cofnod o fy DPP?

Gallwch barhau i ddefnyddio’ch cyfrif GCCarlein i gofnodi’ch hyfforddiant a’ch dysgu, ni fydd angen i chi ei wneud fel rhan o’ch cais adnewyddu.

Ni fyddwn ni’n gwirio nac yn gofyn am unrhyw wybodaeth bellach am eich hyfforddiant a dysgu, oni bai eich bod yn cael eich dewis fel rhan o sampl.