Ein tîm rheoli

Dechreuodd Sarah ei gyrfa fel gweithiwr ieuenctid yng Nghymru ac roedd hi’n un o aelodau sefydlu’r Cynulliad Plant a Phobl Ifanc Cymru gynt. Bu'n gweithio mewn amrywiaeth o leoliadau statudol a gwirfoddol, yn arbennig gyda phobl ifanc agored i niwed, ac wrth gefnogi cyfranogiad pobl ifanc.

Aeth Sarah ymlaen i ddal swyddi mewn awdurdodau lleol ym maes gwaith ieuenctid a chynllunio busnes ehangach a gwella gwasanaethau, a hithau'n meddu ar Radd Meistr mewn Rheoli Strategol.

Bu Sarah yn gweithio i Sgiliau Gofal a Datblygu rhwng 2005 i 2015, yn y pen draw yn dod yn Gyfarwyddwr Gweithredol ar gyfer y bartneriaeth DU gyfan, gan ehangu gwaith y Cyngor Sgiliau Sector i fynd i'r afael ag amrywiaeth o heriau gweithlu ar draws gofal cymdeithasol, y blynyddoedd cynnar a gofal plant. Yn ystod y cyfnod hwn, bu hefyd yn gwirfoddoli fel cadeirydd elusen sy'n cefnogi pobl ifanc ac fel ymwelydd annibynnol.

Ym mis Ebrill 2016, ymunodd Sarah â Gofal Cymdeithasol Cymru fel Cyfarwyddwr Gwella a Datblygu lle bu’n goruchwylio datblygu’r gweithlu, gwella gwasanaethau, ymchwil, data ac arloesi, a daeth yn Brif Weithredwr ym mis Gorffennaf 2024. Mae Sarah wedi ymrwymo i arweinyddiaeth dosturiol a systemau i gefnogi gwasanaethau gofal cymdeithasol a blynyddoedd cynnar yng Nghymru. Mae gan Sarah ddau o blant ac mae hi'n dysgu Cymraeg.

Dechreuodd Andrew ei yrfa fel Cyfrifydd Siartredig mewn ymarfer yng Nghaerdydd. Symudodd ymlaen drwy rolau amrywiol cyllid uwch o fewn y GIG gan gynnwys cefnogi sefydlu cyrff GIG newydd a threfniadau comisiynu. Enillodd Radd Meistr mewn Gwasanaethau Cyhoeddus a Rheolaeth Strategol yn ystod y cyfnod hwn.

Yna ymunodd Andrew â'r sector tai cymdeithasol fel Cyfarwyddwr Cyllid ar gyfer cymdeithas dai newydd ei sefydlu lle arweiniodd ar reolaeth ariannol a chynllunio a gwasanaethau corfforaethol. Gan adeiladu ar y profiad hwn, penodwyd Andrew yn Brif Weithredwr y Grŵp i arwain y gwaith o greu Cymuned Dai Cydfuddiannol lle arweiniodd ar sefydlu llais y tenant fel rhan o sefydlu diwylliant newydd sy'n seiliedig ar werthoedd, gan arloesi llawer o weithgareddau ymgysylltu ac adfywio cymunedol ar gyfer pobl leol a'u cymunedau.

Cafwyd profiadau mwyaf diweddar Andrew yn y sector preifat fel Cyfarwyddwr Cyllid a Gweithrediadau mewn busnes adeiladu sy'n datblygu systemau busnes a'r gallu i gefnogi twf cyflym.

Mae gan Andrew gyfoeth o brofiad o ddarparu arweinyddiaeth strategol lwyddiannus, gan gynnwys sefydlu llywodraethu effeithiol, fframweithiau ariannol, cynllunio strategol a diwylliannau sy'n seiliedig ar werthoedd i gefnogi gweithlu sydd wedi'i rymuso.

Yn ei amser hamdden mae Andrew yn mwynhau bod yn yr awyr agored yn coginio a gwneud gwaith coed gwyrdd. Mae'n aelod o Fwrdd Cymdeithas Tai. Mae Andrew yn angerddol am gefnogi pobl i wneud gwahaniaeth cadarnhaol. Ymunodd â Gofal Cymdeithasol Cymru ym mis Tachwedd 2020.

Magwyd David yng Ngogledd Cymru a mynychodd Brifysgol Abertawe. Mae ei yrfa wedi ymestyn dros amser mewn sectorau cyhoeddus, preifat a gwirfoddol gyda ffocws ar wella profiad defnyddwyr. Yn ddiweddar ymunodd David â Gofal Cymdeithasol Cymru ar ôl gweithio i Lywodraeth Cymru.

Yn ystod ei gyfnod yn Llywodraeth Cymru, fe oruchwyliodd raglen fawr o welliannau i wasanaethau cwsmeriaid. Ef oedd y swyddog arweiniol ar gyfer Operation Jasmine, adolygiad annibynnol o esgeulustod mewn cartrefi gofal yng Ngwent, ar ran y Prif Weinidog.

Aeth David ymlaen i fod yn swyddog arweiniol ar gyfer Deddf Rheoleiddio ac Arolygu Gofal Cymdeithasol (Cymru) 2016. Roedd hefyd yn Gyfarwyddwr Rhaglen ar gyfer sefydlu Addysg a Gwella Iechyd Cymru (HEIW). Yna datblygodd a rheolodd David y rhaglen newydd ar gyfer gofal cymdeithasol a ddeilliodd o Wasanaethau Cymdeithasol Cynaliadwy: Fframwaith Gweithredu.

Y tu allan i'r gwaith, mae David yn ymddiriedolwr elusen ar gyfer Ymddiriedolaeth Bywyd Gwyllt De a Gorllewin Cymru. Mae wedi bod yn llywodraethwr ysgol yn Abertawe ac yn hyfforddwr siarad cyhoeddus. David oedd Cadeirydd cyntaf Cyngor Dadlau Ysgolion y Byd yn Singapore yn 2001.

Mae David yn falch o weithio i sefydliad cenedlaethol sy'n cefnogi gwasanaethau effeithiol i bobl ledled y wlad.

Dechreuodd Lisa ei gyrfa mewn rolau ymgynghori, rheoli prosiect ac arweiniad yn y DU ac Awstralia mewn sectorau gan gynnwys gofal iechyd, cyfleustodau, TG, y cyfryngau a thelathrebu. Roedd ei gwaith yn canolbwyntio ar sut i reoli perthnasoedd cwsmeriaid, gan gynnwys datblygu strategaeth, dylunio gweithredol, dylunio swyddi a recriwtio, dylunio prosesau busnes, ac arwain prosiectau gweithredu a rheoli newid ar raddfa fawr.

Yna newidiodd Lisa ei gyrfa, gan benderfynu canolbwyntio ar wasanaeth cyhoeddus. Ar ôl astudiaethau ôl-raddedig mewn datblygu a pholisi iechyd, treuliodd saith mlynedd yn y London School of Economics. Yno bu’n gwneud ymchwil ar systemau gofal cymdeithasol rhyngwladol ac enillodd PhD ar ddulliau’r llywodraeth o wella ansawdd gofal preswyl i bobl hŷn.

Ymunodd Lisa â Gofal Cymdeithasol Cymru yn 2018 fel Cyfarwyddwr Cynorthwyol Ymchwil, Data ac Arloesi. Yn y rôl, bu’n gweithio ledled Cymru i sefydlu gwasanaethau ymchwil, arloesi a data ar gyfer y sector gofal cymdeithasol, bu’n arwain ar ddatblygiad gwasanaethau a chymorth y Grŵp Gwybodaeth, a chyd-ddatblygodd y strategaeth ‘Ymlaen’.

Ym mis Medi 2024, daeth Lisa yn Gyfarwyddwr Gwella a Datblygu i ni. Mae’n teimlo’n freintiedig iawn i gael y cyfle i arwain ein gwaith gwella a datblygu ehangach, ac i gefnogi pobl sy’n arwain ac yn gweithio ym maes gofal cymdeithasol ledled Cymru.

Ar ôl cael ei magu yng Nghaerdydd, dychwelodd Lisa i’r ddinas yn 2017 ar ôl llawer o flynyddoedd yn Llundain a Sydney.