Dychwelyd i ymarfer gwaith cymdeithasol

Os ydych chi eisiau dychwelyd i weithio fel gweithiwr cymdeithasol ond nad ydych erioed wedi cofrestru gyda ni, neu nad ydych wedi bod yn ymarfer ers tro, efallai y bydd angen i chi ddarparu tystiolaeth eich bod yn bodloni ein gofynion. 

Mae angen i chi:

• wneud cais i gofrestru gyda ni, a gofyn i'r person priodol gymeradwyo'ch cais
• llunio portffolio o dystiolaeth i ddangos eich bod chi'n addas i ymarfer.

Pan fyddwch chi’n cyflwyno'ch portffolio, bydd angen i chi dalu £200 fel ffi i'w asesu, ynghyd â'ch ffi i wneud cais.

Gweithgareddau

Gallwch chi gynnwys enghreifftiau o:

• astudio neu hyfforddiant ffurfiol trwy gyrsiau neu raglenni wedi’u hachredu
• astudio preifat, gan gynnwys ymchwil a gwaith darllen perthnasol
• seminarau
• addysgu
• gweithgareddau eraill y gellid disgwyl yn rhesymol eu bod yn symud datblygiad proffesiynol gweithiwr cymdeithasol yn ei flaen 
• ymarfer dan oruchwyliaeth neu gysgodi ymarfer, gan gynnwys gwaith prosiect, cysgodi gwaith cymdeithasol, gwaith gwirfoddol perthnasol, a myfyrio ar ymarfer gwaith cymdeithasol a’i ddadansoddi.

Os penderfynwch chi gynnwys ymarfer dan oruchwyliaeth neu gysgodi ymarfer, bydd angen cytundeb arnoch gyda’ch cyflogwr. Cytundeb ffurfiol yw hwn, a ddylai:

• ddisgrifio pa weithgareddau y byddwch chi’n eu gwneud
• cynnwys y cyfnod y mae’r cytundeb a’r lleoliad yn ei gwmpasu
• gwneud yn siŵr bod goruchwyliwr i oruchwylio’ch lleoliad
• gwneud yn siŵr eich bod yn cael eich goruchwylio’n briodol ac yn cael cyfleoedd i fyfyrio ar eich dysgu
• gwneud yn siŵr na fyddai unrhyw gysylltiad heb oruchwyliaeth â phobl sy’n defnyddio gofal a chymorth, neu ofalwyr, yn cael ei ganiatáu
• cynnwys cadarnhad o’ch lleoliad a’r gweithgareddau gan eich cyflogwr.

Os ydych chi wedi gweithio fel gweithiwr cymdeithasol cymwysedig yn y gorffennol, gallwch ddefnyddio astudiaethau preifat ar gyfer hyd at 50 y cant o’ch portffolio.

Os nad ydych chi erioed wedi gweithio fel gweithiwr cymdeithasol cymwysedig, gallwch chi ddefnyddio astudiaethau preifat ar gyfer hyd at 25 y cant o’ch portffolio.

Dogfennau

Dylai eich portffolio gynnwys:

• tystysgrifau i ddangos eich bod wedi cwblhau neu fynychu cyrsiau
• tystiolaeth neu werthusiadau byr o gysgodi ymarfer neu ymarfer arall
• rhestr o'r llyfrau rydych chi wedi'u darllen ar gyfer gwaith i ddatblygu eich ymarfer.

Mae angen i'ch portffolio ddangos bod eich dysgu yn berthnasol i'r gwaith cymdeithasol presennol. Bydd angen i chi hefyd ddangos sut mae eich dysgu yn ystyried:

• y rolau allweddol a'r safonau galwedigaethol cenedlaethol ar gyfer gwaith cymdeithasol
• y wybodaeth a'r ddealltwriaeth sydd eu hangen arnoch fel gweithiwr cymdeithasol
• y sgiliau y mae angen i chi eu cael fel gweithiwr cymdeithasol
• deddfwriaeth gyfredol, polisi ac arferion gwaith cymdeithasol.

Mae faint o dystiolaeth sydd angen i ni ei gweld yn dibynnu ar ba mor hir rydych chi wedi bod oddi ar y Gofrestr:

• os bu’n llai na thair blynedd ers i chi gofrestru’n weithiwr cymdeithasol, nid oes angen i chi ddarparu tystiolaeth i ddychwelyd i ymarfer, dim ond gwneud cais i gofrestru.
• os bu rhwng tair a chwe blynedd ers i chi gofrestru’n weithiwr cymdeithasol, mae angen i’ch portffolio ddangos 180 awr o wybodaeth a dealltwriaeth broffesiynol
• os bu dros chwe blynedd ers i’ch cofrestriad ddod i ben ac nad ydych wedi cofrestru ers hynny, mae angen i’ch portffolio ddangos eich bod wedi treulio 360 awr yn diweddaru eich gwybodaeth a’ch dealltwriaeth broffesiynol
• os nad ydych chi erioed wedi cofrestru a’ch bod wedi cymhwyso fel gweithiwr cymdeithasol dros chwe blynedd yn ôl, mae angen i’ch portffolio ddangos eich bod wedi treulio 360 awr yn diweddaru eich gwybodaeth a’ch dealltwriaeth broffesiynol.

Byddwn yn edrych ar eich tystiolaeth ac yn defnyddio’r meini prawf i benderfynu a yw’n dangos gwybodaeth a dealltwriaeth gyfredol briodol i ni brosesu eich cais.

Os bydd angen mwy o dystiolaeth arnom ni, rhown wybod i chi.

Os gwnaethoch chi gymhwyso ar ôl 1 Ebrill 2016, bydd angen i chi hefyd gwblhau'r rhaglen Gadarnhau ar gyfer gweithwyr cymdeithasol sydd newydd gymhwyso, os nad ydych wedi gwneud hynny eisoes.

Os gwnaethoch chi gymhwyso y tu allan i Gymru, gallwch ddefnyddio cymhwyster cyfatebol fel y rhaglen ASYE.

Os oes gennych unrhyw gwestiynau am ddychwelyd i ymarfer, anfonwch e-bost at ein tîm cofrestru: ymholiadau@gofalcymdeithasol.cymru.