Adroddiad effaith: 2024 i 2025

Rydyn ni wedi ymrwymo i wella llesiant y gweithlu gofal cymdeithasol a'r blynyddoedd cynnar. Mae ein harolwg gweithlu gofal cymdeithasol 2024 yn dangos, er bod llesiant y gweithlu yn is na chyfartaledd y DU, mae arwyddion cadarnhaol. Er enghraifft, mae 77 y cant o weithwyr yn dweud wrthym fod eu morâl yn dda a 41 y cant yn dweud eu bod yn teimlo bod ganddynt ddigon o gefnogaeth i reoli straen.

Er mwyn cefnogi'r gweithlu, rydyn ni wedi rhannu adnoddau llesiant, cynnal llawer o ddigwyddiadau dysgu a threfnu mentrau fel Wythnos Llesiant, a gafodd dderbyniad da. Mae'r ymdrechion hyn, ynghyd ag eraill fel Cynllun Cyflawni'r Gweithlu Gofal Cymdeithasol 2024 i 2027, yn anelu at greu gweithlu llawn cymhelliant, ymgysylltiedig a gwerthfawrogi.

Cydnabyddiaeth i'r gweithlu

Rydyn ni'n ymroddedig i sicrhau bod y gweithlu gofal cymdeithasol a'r blynyddoedd cynnar yn cael ei gydnabod a'i werthfawrogi'n fawr. Mae ein harolygon diweddar yn dangos bod barn y cyhoedd am y gweithlu wedi gwella, gyda 32 y cant a 24 y cant yn dweud bod ganddyn nhw farn uwch am weithwyr gofal cymdeithasol a gweithwyr blynyddoedd cynnar yn y drefn honno o'i gymharu â thair blynedd yn ôl. Yn ogystal, mae 80 y cant o'n gweithlu yn teimlo eu bod yn cael eu gwerthfawrogi gan y bobl maen nhw'n eu cefnogi.

Rydyn ni wedi arwain mentrau, fel ein Gwobrau blynyddol a'r Wobr Gofalu trwy'r Gymraeg, i ddathlu a rhannu arfer da ledled Cymru. Rydyn ni hefyd yn darparu arweinyddiaeth genedlaethol i ddylanwadu ar ddarpariaeth polisi a gwasanaethau, fel ein gwaith gyda'r Fforwm Gwaith Gofal Cymdeithasol. Mae ein gwasanaeth cymorth i gyflogwyr wedi cynnal llawer o ddigwyddiadau sy'n darparu adnoddau a chefnogaeth i gyflogwyr, gan ddangos ein hymrwymiad i werthfawrogi a chydnabod y gweithlu.

Denu a recriwtio

Rydyn wedi gwneud camau cadarnhaol wrth ddenu a recriwtio pobl i'r sectorau gofal cymdeithasol a'r blynyddoedd cynnar. Trwy ein hymgyrchoedd Gofalwn Cymru, rydyn ni wedi helpu mwy o bobl i ddod o hyd i waith ym maes gofal cymdeithasol a'r blynyddoedd cynnar diolch i'r cynnydd mewn swyddi ac ymweliadau ar wefan Gofalwn Cymru. Mae ein rhaglenni hyfforddi, megis Cyflwyniad i Ofal Cymdeithasol a Chyflwyniad i Flynyddoedd Cynnar a Gofal Plant, wedi paratoi llawer o bobl yn llwyddiannus ar gyfer gyrfaoedd yn y sectorau.

Rydyn wedi gweithio'n galed, ochr yn ochr â phartneriaid cenedlaethol a lleol, i gynyddu hyder y cyhoedd yn y gweithlu gofal cymdeithasol. Mae 73 y cant o'r cyhoedd yn dweud bod ganddyn nhw hyder mewn gweithwyr gofal, ac mae 86 y cant yn dweud eu bod yn gwybod beth yw safon dderbyniol o ofal. Rydyn yn sicrhau bod y gweithlu wedi'i reoleiddio'n dda ac yn addas i ymarfer, gyda mwy na 64,000 o bobl bellach wedi'u cofrestru gyda ni.

Lle nad yw gweithwyr gofal cymdeithasol yn bodloni disgwyliadau'r Cod Ymarfer Proffesiynol, mae ein fframwaith addasrwydd i ymarfer yn caniatáu inni gymryd camau fel y gallwn ni amddiffyn y cyhoedd a chynnal uniondeb y proffesiwn. Rydyn hefyd wedi adolygu a diweddaru'r Codau Ymarfer Proffesiynol ar gyfer gweithwyr gofal cymdeithasol a chyflogwyr. Fe wnaethon ni hyn trwy ymgysylltu â'r sector i osod safonau clir ac ystyrlon. Mae'r mentrau hyn wedi helpu i adeiladu ymddiriedaeth a sicrwydd yn ansawdd y gofal a ddarperir gan y gweithlu gofal cymdeithasol.

Cefnogi sgiliau'r gweithlu

Rydyn wedi gwneud ymdrechion sylweddol i sicrhau bod y gweithlu gofal cymdeithasol a'r blynyddoedd cynnar yn gymwys, yn wybodus ac yn fedrus. Rydyn wedi cefnogi datblygu a gweithredu cymwysterau a datblygiad proffesiynol parhaus trwy gynnal llawer o sesiynau ymgysylltu a digwyddiadau hyfforddi. Mae mentrau, fel adnoddau Sgiliau Hanfodol Cymru a'r adolygiad o Safonau Galwedigaethol Cenedlaethol, wedi cael derbyniad da ac maen nhw'n darparu cefnogaeth gadarnhaol i'r gweithlu.

Rydyn hefyd wedi hyrwyddo a chefnogi prentisiaethau, sydd wedi cyfrannu at gynnydd o 31 y cant mewn ardystiadau prentisiaethau. Yn ogystal, mae ein cyrsiau Cymraeg a'n hadnoddau hyfforddi diogelu wedi gwella sgiliau a gwybodaeth y gweithlu ymhellach. Mae ein cymunedau ymarfer yn darparu dysgu a chefnogaeth werthfawr, gan helpu gweithwyr i rannu syniadau a gwella eu harfer.

Rydyn wedi cefnogi gwasanaethau gofal cymdeithasol i fabwysiadu dulliau sy'n seiliedig ar gryfderau, gan ganolbwyntio ar yr hyn sy'n bwysig i unigolion a'u cefnogi i gyflawni eu nodau personol a'u llesiant. Rydyn wedi rhedeg rhaglenni datblygu arweinyddiaeth, gan gynnwys sesiynau arweinyddiaeth tosturiol, ac wedi datblygu adnoddau i hyrwyddo diwylliannau cadarnhaol yn y gweithle.

Rydyn wedi gwneud cynnydd nodedig wrth ddefnyddio arloesedd, ymchwil a data o ansawdd uchel i wella ymarfer a pholisi gofal cymdeithasol. Fe wnaethon ni lansio strategaeth Ymlaen i helpu i greu diwylliant lle mae tystiolaeth a syniadau newydd yn ganolog i ofal cymdeithasol. Mae ein Porth Data Gofal Cymdeithasol Cenedlaethol wedi'i wella i ddarparu gwell mewnwelediadau a delweddu data. Fe wnaethom gefnogi'r rhaglen DEEP i helpu staff rheng flaen i ddefnyddio ymchwil yn eu hymarfer a lansio gwefan Insight Collective i rannu cyfleoedd ymchwil a hyfforddiant.

Mae ein hymdrechion i hyrwyddo llythrennedd digidol a gwella aeddfedrwydd data wedi helpu awdurdodau lleol i wneud gwell defnydd o'u data. Mae'r mentrau hyn gyda'i gilydd wedi cyfrannu at sector gofal cymdeithasol mwy gwybodus, effeithlon ac arloesol.