Adroddiad effaith: 2023 i 2024

Nid yw'n gyfrinach bod y sectorau gofal cymdeithasol a gofal plant, chwarae a'r blynyddoedd cynnar yn wynebu anawsterau difrifol oherwydd cyllidebau llai, problemau staffio a'r argyfwng costau byw. Hefyd, cafodd y pandemig effaith sylweddol ar y gweithlu a'n cymunedau, yn enwedig y bobl sy'n dibynnu ar ofal a chymorth o ansawdd da a'u gofalwyr. Mae'r ffaith fod mwy o deuluoedd yn byw mewn tlodi yn rhoi mwy o bwysau ar y sectorau, ac mae'r ffaith fod y boblogaeth yn heneiddio a bod pobl yn byw yn hirach yn cynyddu'r galw am wasanaethau.

Rydyn yn ymwybodol o'r heriau, ond rydyn yn credu bod gennym gyfleoedd sylweddol i gefnogi gwelliannau i bobl Cymru. Ni allwn gyflawni'r newidiadau hyn ar ein pennau ein hunain. Rydyn yn gwybod bod cydweithio’n allweddol a bod pob un ohonom yn gallu cyfrannu at y canlyniadau a nodi ein heffaith yn glir.

Ein blaenoriaeth yw gweithio gydag eraill i ddatrys y problemau hyn sy'n gysylltiedig â'r gweithlu. Rhaid i ni weithredu'n gyflym a chydweithio er mwyn ymdopi â heriau presennol a denu pobl newydd i'r gweithlu. Mae angen i ni greu'r amodau cywir i ganiatáu i bobl ddarparu gwasanaethau o safon. 

Er gwaethaf yr heriau, mae ein gweithwyr gofal yn parhau i fynd y tu hwnt i'r disgwyl er mwyn darparu gofal a chymorth rhagorol i bobl Cymru. Rydyn yn gwybod bod degau o filoedd o weithwyr gofal cymdeithasol, gofal plant, chwarae a’r blynyddoedd cynnar diwyd ac ymroddedig yn darparu gofal a chymorth o ansawdd uchel bob dydd i bobl o bob oed ac ym mhob sefyllfa, gan eu helpu i ffynnu a chyflawni'r hyn sy'n bwysig iddynt.

Hoffem ddiolch yn fawr i bawb sy'n gweithio yn y sectorau gofal cymdeithasol, gofal plant, chwarae a’r blynyddoedd cynnar am eu gwaith caled, eu hymroddiad a’u proffesiynoldeb parhaus yn y cyfnod heriol hwn.

Diolch yn fawr

Sue Evans, ein Prif Weithredwr, a Mick Giannasi, ein Cadeirydd