Gweithlu gofal cymdeithasol a blynyddoedd cynnar sy'n cael ei gydnabod a'i werthfawrogi'n fawr

Mae ein gweithlu gofal cymdeithasol yn haeddu gwobr deg sy'n adlewyrchu ei gyfraniad hollbwysig at lesiant pobl a chymunedau.

Fel aelodau o'r Fforwm Gwaith Teg Gofal Cymdeithasol, fe wnaethom barhau i ddylanwadu ac ymrwymo i ymgorffori gwaith teg a gwella telerau ac amodau'r rhai sy'n gweithio ym maes gofal cymdeithasol. Fe wnaethom gadeirio ac arwain y gweithgor a ddatblygodd y Fframwaith Cyflog a Datblygu Gyrfa a oedd yn destun ymgynghoriad yn 2023. Cafwyd cefnogaeth eang i'r fframwaith hwn a bydd yn cael ei ddatblygu ymhellach yn 2024/25.

Cynhaliwyd ein seremoni wobrwyo Gwobrau ar 27 Ebrill 2023. Roedd yn gyfle i ni gydnabod, dathlu a rhannu ymarfer rhagorol ym maes gofal cymdeithasol a gofal plant, chwarae a'r blynyddoedd cynnar yng Nghymru. Mae'r Gwobrau’n agored i weithwyr gofal ar bob lefel, yn ogystal â thimau, prosiectau a sefydliadau o bob rhan o'r sectorau cyhoeddus, gwirfoddol ac annibynnol sydd wedi gwneud gwahaniaeth cadarnhaol i fywydau pobl.

Roedd dros 40 o brosiectau a gweithwyr o bob rhan o Gymru wedi gwneud cais neu wedi cael eu henwebu ar gyfer gwobrau 2023. Dewiswyd y 15 a gyrhaeddodd y rownd derfynol gan banel o feirniaid a oedd yn cynnwys aelodau o'n Bwrdd, cynrychiolwyr o sefydliadau partner a phobl sydd â phrofiad o ddefnyddio gwasanaethau gofal a chymorth. 

Mae sylwadau pobl sy'n defnyddio gwasanaethau ein prosiectau buddugol a'r rhai a gafodd ganmoliaeth uchel yn dangos bod y gofal a'r cymorth y maent yn eu derbyn yn gwneud gwahaniaeth mawr i'w bywydau.

Mae gallu derbyn gofal a chymorth gan rywun sy'n gallu siarad eich iaith yn rhan bwysig o dderbyn gofal urddasol o ansawdd uchel. Roedd seremoni wobrwyo Gofalu trwy'r Gymraeg 2023, a gynhaliwyd yn Eisteddfod Genedlaethol Llŷn ac Eifionydd ar 10 Awst, yn gyfle i gydnabod, dathlu a rhannu gwaith pobl sy'n darparu gofal a chymorth rhagorol trwy gyfrwng y Gymraeg.

Eleni, dewiswyd pump o bobl o bob rhan o Gymru ar gyfer rownd derfynol y wobr gan banel o feirniaid arbenigol. Cafodd yr enillydd, arweinydd chwarae o Gaerdydd, Ross Dingle, ei ddewis trwy bleidlais gyhoeddus lle pleidleisiodd dros 2,250 o bobl.

Cwblhaodd mwy na 3,100 o bobl sydd wedi cofrestru gyda ni ein harolwg cyntaf o'r gweithlu, a oedd yn gofyn cwestiynau am faterion fel:

• llesiant

• y profiad o weithio ym maes gofal cymdeithasol

• cyflog ac amodau

• hyfforddiant a chymwysterau.

Ym mis Hydref, cyhoeddwyd canlyniadau'r arolwg. Byddwn yn defnyddio'r canfyddiadau i lywio'r cymorth a'r gwasanaethau sy'n cael eu cynnig gennym, yn ogystal â gwaith ein sefydliadau partner. Yn y dyfodol byddwn yn gallu gweld sut y gallwn wella a chefnogi mwy o feysydd ar gyfer y gweithlu yn ein holl waith. Fe wnaethom lansio arolwg 2024 ym mis Ionawr er mwyn gallu monitro'r hyn y mae'r gweithlu'n ei ddweud wrthym dros amser. Byddwn yn rhannu canlyniadau'r arolwg hwnnw yn hydref 2024. 

Fe wnaethom gyhoeddi fersiwn newydd o'r cerdyn gweithiwr gofal yn 2024. Mae gweithwyr gofal cymdeithasol a gweithwyr y blynyddoedd cynnar yn gallu defnyddio'r cerdyn hwn i gael cerdyn arian-yn-ôl a chasgliad o gynigion manwerthu gan y darparwr disgowntiau pwrpasol Discounts for Carers.

Ar ddiwedd mis Mawrth 2024, roedd cerdyn gan 45,232 o weithwyr gofal cymdeithasol a gofal plant, chwarae a'r blynyddoedd cynnar. O'r rhain:

• mae 8,705 yn weithwyr gofal cymdeithasol nad ydynt wedi cofrestru gyda ni

• mae 1,762 yn weithwyr y blynyddoedd cynnar a gofal plant.