Gwasanaethau gofal cymdeithasol sy'n ymwreiddio ac yn defnyddio dulliau gofal a chymorth sy'n seiliedig ar gryfderau

Mae dull canlyniadau sy'n seiliedig ar gryfderau yn cefnogi pobl sy'n defnyddio gwasanaethau gofal a chymorth a'u teuluoedd i fyw'r bywydau gorau posibl trwy ddatblygu eu cryfderau a'u galluoedd. Mae'n ymwneud â chydnabod bod pawb yn gallu cyfrannu at eu bywydau a derbyn cyfrifoldeb am eu bywydau: yr unigolyn, ei rwydwaith o ffrindiau a theulu, a'i gymuned.

Fe wnaethom barhau i gefnogi pum awdurdod lleol i ddatblygu a darparu hyfforddiant er mwyn datblygu hyder a sgiliau'r rhai sy'n gweithio mewn timau gwaith cymdeithasol, plant ac oedolion wrth gymhwyso'r dull hwn. Hefyd, fe wnaethom gefnogi eu timau rheoli i baratoi ar gyfer y newid systemig sydd ei angen i gefnogi'r dull gweithredu. Rydyn yn paratoi adnoddau hyfforddi ar-lein ar gyfer rheolwyr yn y sector gofal cymdeithasol ehangach, a bydd cynnig i gefnogi rheolwyr ar gael yn 2024 i 2025. 

Yn 2023 i 2024, fe wnaethom ganolbwyntio ein cefnogaeth ar y rhan o'r rhaglen drawsnewid sydd â'r lefel uchaf o gymhlethdod a goblygiadau ar gyfer y gweithlu gofal cymdeithasol a lle gallwn ychwanegu'r gwerth mwyaf – dileu elw ym maes gwasanaethau plant. Yn benodol, dileu elw ym maes gofal preswyl i blant.

Er mwyn ein helpu i gefnogi'r gwaith o feithrin gallu mewn awdurdodau lleol, fe wnaethom anfon holiadur atyn nhw ym mis Rhagfyr er mwyn derbyn gwybodaeth am anghenion recriwtio, cadw a hyfforddiant yn ymwneud â dulliau gweithredu therapiwtig. Byddwn ni'n mynd ati i ddadansoddi'r data a rhannu'r prif ganfyddiadau gyda Llywodraeth Cymru.

Ym mis Mehefin, fe wnaethom gyhoeddi gwerthusiad o raglen newydd sy'n canolbwyntio ar ryddhau cleifion o ysbytai. Nod y rhaglen oedd datblygu sgiliau a galluogrwydd newydd er mwyn adfer y cydbwysedd yn ymwneud â dibynnu ar ddulliau gweithredu sy'n seiliedig ar risg a phroblemau, gyda'r bwriad o ddatblygu a darparu gofal sy'n canolbwyntio ar yr unigolyn. Roedd y rhaglen ar y cyd (BRR) yn rhaglen hybrid o 'Sgiliau Cyfathrebu Cydweithredol' (gofal cymdeithasol) a Nodau Gofal (iechyd) ym maes datblygu hyfforddiant a sgiliau. 

Yn ôl gwerthusiad y Sefydliad Gofal Cymdeithasol er Rhagoriaeth, roedd y rhan fwyaf o bobl a gymerodd ran yn y rhaglen yn teimlo'n fwy hyderus yn siarad â chleifion am yr hyn sy'n bwysig iddyn nhw. Dywedodd bron pawb eu bod yn deall y ddyletswydd gofal yn well erbyn hyn.

O'r 68 o bobl a gymerodd ran yn y rhaglen, daeth 12 yn 'fentoriaid' neu'n 'eiriolwyr' gan fynychu rhagor o hyfforddiant i'w helpu i ymgorffori'r dull gweithredu.

Rydym wedi cyhoeddi gwaith ymchwil perthnasol a chyfredol am ofal sy'n seiliedig ar le a dulliau gweithredu sy'n ystyriol o drawma, a'u cyfraniad at ddarparu gofal cymdeithasol yng Nghymru.