Fframwaith dysgu ac ymsefydlu ar gyfer rheolwyr blynyddoedd cynnar a gofal plant

Mae'r fframwaith yn broses ddysgu ac ymsefydlu genedlaethol sy'n seiliedig ar dystiolaeth i'ch helpu i adeiladu'r wybodaeth, y sgiliau a'r hyder sydd eu hangen ar gyfer arweinyddiaeth a rheolaeth effeithiol ym maes gofal, chwarae, dysgu a datblygiad plant. Mae'n cefnogi ymsefydlu i rolau rheoli yn ogystal â datblygiad proffesiynol parhaus drwy gydol gyrfa rheolwr.

Mae dwy ran i’r fframwaith:

Rhan A – Gwybodaeth

Mae Rhan A yn seiliedig ar dair prif safon sy'n canolbwyntio ar yr hyn y mae angen i chi ei wybod fel rheolwr:

• Safon 1: Arwain ymarfer plentyn-ganolog
• Safon 2: Fframweithiau damcaniaethol ar gyfer arwain a rheoli
• Safon 3: Deall sut i arwain a rheoli perfformiad tîm effeithiol

Rhan B – Cymhwysedd

Mae Rhan B yn seiliedig ar chwe phrif safon sy'n canolbwyntio ar y cymwyseddau a enillwyd wrth weithio fel rheolwr:

• Safon 1: Arwain a rheoli ymarfer plentyn-ganolog
• Safon 2: Arwain a rheoli perfformiad tîm effeithiol
• Safon 3: Arwain a rheoli ansawdd y gweithle/lleoliad
• Safon 4: Ymarfer proffesiynol
• Safon 5: Arwain a rheoli ymarfer sy'n hybu'r broses o ddiogelu plant
• Safon 6: Arwain a rheoli iechyd, diogelwch a diogeledd yn y gweithle/lleoliad

Os ydych chi'n newydd i rôl rheolwr blynyddoedd cynnar a gofal plant, rydyn ni'n argymell cwblhau Rhan A a Rhan B o'r fframwaith fel rhan o'ch cyfnod ymsefydlu. Bydd y fframwaith yn eich helpu i ddatblygu'r wybodaeth a'r sgiliau sydd eu hangen i arwain a rheoli gwasanaethau blynyddoedd cynnar a gofal plant yn effeithiol.

Os ydych chi'n rheolwr profiadol, rydyn ni'n argymell defnyddio'r fframwaith fel rhan o'ch datblygiad proffesiynol parhaus. Gall cwblhau Rhan A a Rhan B eich helpu i adnewyddu a chryfhau eich gwybodaeth, myfyrio ar eich ymarfer a nodi meysydd i'w datblygu ymhellach.

Gall Rhan A hefyd helpu pobl sy'n ystyried symud i rôl reoli drwy ddatblygu eu dealltwriaeth o arweinyddiaeth a rheolaeth yn y sector.

Mae dwy ddogfen i'w cwblhau:

• Cofnod tystiolaeth: Rhan A (Gwybodaeth) - i gwblhau Rhan A o'r fframwaith
• Cofnod tystiolaeth: Rhan B (Cymhwysedd) - i gwblhau Rhan B o'r fframwaith

Byddwch yn cwblhau'r fframwaith trwy gofnodi tystiolaeth yn yr ardal log tystiolaeth ym mhob dogfen. Mae'r fframwaith yn annog dull holistaidd, lle gellir mapio darnau unigol o dystiolaeth ar draws sawl safon.

Mae'r fframwaith hwn yn nodi safonau sy'n cyfateb i'r deilliannau dysgu gorfodol ar gyfer y cymwysterau Ymarfer canlynol:

• Lefel 4 Paratoi ar gyfer Arwain a Rheoli ym maes Gofal, Chwarae, Dysgu a Datblygiad Plant
• Lefel 5 Arwain a Rheoli Gofal, Chwarae, Dysgu a Datblygiad Plant: Ymarfer

Mae’r safonau hyn yn egluro’r wybodaeth a’r ymarfer gofynnol ar gyfer rheolwyr blynyddoedd cynnar a gofal plant.

Er bod y fframwaith yn defnyddio’r un deilliannau dysgu â’r cymwysterau hyn, fframwaith gweithle ydyw, nid cymhwyster a asesir. Mae hyn yn golygu eich bod chi’n ei gwblhau drwy gasglu a chyflwyno tystiolaeth o’ch gweithle i ddangos eich cymhwysedd. Bydd hyn wedyn yn cael ei adolygu a’i ddefnyddio i benderfynu a ydych chi’n bodloni’r safonau.

Unigolion sy'n cwblhau'r fframwaith

Os ydych chi'n cwblhau'r fframwaith, chi sy'n gyfrifol am gwblhau'r rhannau perthnasol a chofnodi tystiolaeth sy'n dangos eich bod yn deall y safonau a sut rydych yn eu defnyddio yn eich rôl.

Person a enwebwyd

Mae person a enwebwyd yn cefnogi’r rheolwr ac yn ei arwain drwy rannau A a B y fframwaith, gan adolygu a chadarnhau ei fod wedi bodloni’r safonau.

Bydd y person a enwebwyd yn cefnogi'r rheolwr drwy gydol y broses trwy drafod cynnydd, arsylwi arfer a rhoi adborth. Unwaith y bydd yr holl safonau wedi'u bodloni, bydd y rheolwr a'r person a enwebwyd yn llofnodi'r dystiolaeth, ac yn lawrlwytho tystysgrif cwblhau.

Pan fydd yr holl safonau wedi'u bodloni, bydd bydd y person a enwebwyd yn lawrlwytho'r dystysgrif gwblhau isod. Bydd angen i'r person a enwebwyd a'r rheolwr lofnodi'r dystysgrif.

Cadwch y dystysgrif gwblhau a'r logiau tystiolaeth wedi'u cwblhau yn ddiogel fel tystiolaeth.

Lawrlwytho'r dystysgrif

Os oes gennych gwestiwn neu os na allwch ddod o hyd i'r hyn rydych yn chwilio amdano, cysylltwch â ni.