Mae manteision cryf i gynnal proses denu staff a recriwtio sy’n seiliedig ar werthoedd. Mae’r broses yn sicrhau bod pobl sy'n mynd i mewn i ofal cymdeithasol yn cael eu hysgogi gan dosturi, urddas a chymorth ac yn canolbwyntio ar y person.
Trwy recriwtio staff sydd â gwerthoedd personol yn cyd-fynd â'r swydd, mae sefydliadau'n gweld gwell boddhad swydd, ymrwymiad cryfach ac, yn y pen draw, cyfraddau cadw gwell.
Mae canlyniadau arolwg Dweud eich Dweud 2025 yn dangos bod angen gwella cyfraddau cadw gweithwyr gofal cymdeithasol, a hynny ar frys.
Mae ymchwil gan Sgiliau Gofal (2021) yn dangos bod cyfraddau cadw staff isel yn bygwth cynaliadwyedd a chysondeb gofal. Oherwydd hyn, mae’n gwneud denu a recriwtio staff yn anoddach. Pan fydd aelodau staff yn gadael drwy’r amser, rhaid i sefydliadau dreulio mwy o amser a gwario arian yn recriwtio gweithwyr newydd. Gall darpar ymgeiswyr hefyd benderfynu peidio â gwneud cais os yw gweithle yn adnabyddus am ansefydlogrwydd.
Fe gynhaliodd Prifysgol Caerdydd ymchwil a oedd yn edrych ar recriwtio a chadw staff ym maes gofal cymdeithasol. Mae’r ymchwil yn pwysleisio bod cadw staff yn dechrau ar y pwynt o ddenu a recriwtio. Mae hefyd yn awgrymu y dylai sefydliadau baratoi staff newydd ar gyfer y rôl er mwyn lleihau trosiant cynnar (Turley et al., 2020).
Mae ymchwil Sgiliau Gofal gyda chyflogwyr yn dangos y gall arferion recriwtio sy'n seiliedig ar werthoedd wella cyfraddau cadw. Drwy wneud hyn mae cyflogwyr yn gwneud yn siŵr bod gweithwyr yn deall realiti gweithio mewn gofal cymdeithasol (Figgett, 2017). Gall proffiliau swyddi clir a gonest, disgwyliadau realistig o’r rôl, ynghyd â phrosesau sefydlu clir leihau niferoedd sy’n gadael yn gynnar. Gyda'i gilydd, mae posib denu ymgeiswyr sy'n fwy addas ar gyfer y rôl ac sy’n fwy tebygol o aros.
Dyma adnoddau i’ch cefnogi ddenu a recriwtio staff.
Oes meysydd neu adnoddau eraill rydych chi'n teimlo a fyddai'n eich helpu i wella cadw'r gweithlu? Gadewch i ni wybod drwy e-bostio strategaethgweithlu@gofalcymdeithasol.cymru.
