Gwobrau 2027

Mae'r Gwobrau yn cydnabod, yn dathlu ac yn rhannu gwaith nodedig ym maes gofal cymdeithasol, gwaith cymdeithasol a gofal plant, chwarae a’r blynyddoedd cynnar yng Nghymru. 

Mae'r gwobrau'n cydnabod gwaith grwpiau, timau a sefydliadau, yn ogystal â gweithwyr gofal unigol o bob rhan o'r sectorau cyhoeddus, preifat, gwirfoddol a chydweithredol yng Nghymru.   

Rydyn ni nawr yn croesawu ceisiadau ar gyfer Gwobrau 2027 gan grwpiau, timau a sefydliadau, yn ogystal ag enwebiadau ar gyfer y gwobrau i weithwyr unigol. 

Y dyddiad cau ar gyfer ceisiadau ac enwebiadau yw 5pm, 6 Tachwedd 2026.  

Mae gan y Gwobrau 2027 saith categori: 

• pedwar ar gyfer timau, grwpiau a sefydliadau 
• tri ar gyfer gweithwyr. 

Ym mhob categori, bydd ein beirniaid yn chwilio am dystiolaeth o waith sy'n newydd ac yn gwneud gwahaniaeth cadarnhaol gwirioneddol i fywydau'r plant, teuluoedd ac oedolion y maen nhw’n eu cefnogi. 

Gofal rhagorol i blant a theuluoedd

Mae'r categori hwn yn dathlu sefydliadau, lleoliadau neu brosiectau sy'n gweithio gyda phlant, pobl ifanc a theuluoedd i'w helpu i gyflawni'r hyn sy'n bwysig iddyn nhw. Rydyn ni’n croesawu ceisiadau o bob rhan o feysydd gofal plant, chwarae, y blynyddoedd cynnar, gwaith cymdeithasol a gofal cymdeithasol sy'n darparu gofal o ansawdd uchel ac yn helpu plant a phobl ifanc i ddisgleirio. 

Gall y ceisiadau dod o leoliadau preswyl gofal cymdeithasol neu wasanaethau cymunedol neu statudol. Er enghraifft, y rhai sy'n cefnogi pobl ifanc sydd wedi gadael gofal yn ddiweddar, cartrefi preswyl, neu wasanaethau maethu neu fabwysiadu. Neu allai fod yn lleoliad blynyddoedd cynnar, chwarae neu ofal plant sy'n cefnogi plant i gael dechrau rhagorol mewn bywyd. 

Defnydd rhagorol o ddigidol a thechnoleg 

Mae'r categori hwn yn dathlu sefydliadau, lleoliadau neu brosiectau sy'n gwneud defnydd effeithiol neu arloesol o ddigidol a thechnoleg i wella'r gofal a'r cymorth y maen nhw’n eu darparu. Gallai hyn amrywio o ddefnydd arloesol o dechnoleg i drefnu rotas staff i ddefnydd diogel o AI i ddeall mynegiant wyneb pobl ddi-eiriau sy'n defnyddio gwasanaethau. 

Gall y ceisiadau dod o wasanaethau statudol, preifat neu wirfoddol sy'n cefnogi oedolion neu blant o bob rhan o'r meysydd gwaith cymdeithasol, gofal cymdeithasol, gofal plant, chwarae a’r blynyddoedd cynnar. 

Recriwtio a chadw'r gweithlu rhagorol

Mae'r categori hwn yn dathlu sefydliadau, lleoliadau neu dimau sy'n defnyddio dulliau effeithiol, creadigol ac arloesol o recriwtio a / neu gadw'r gweithlu i fodloni gofynion a disgwyliadau presennol ac yn y dyfodol. 

Gall y ceisiadau dod o wasanaethau statudol, preifat neu wirfoddol sy'n cefnogi oedolion neu blant o bob rhan o'r meysydd gwaith cymdeithasol, gofal cymdeithasol, gofal plant, chwarae a’r blynyddoedd cynnar. 

Gofal rhagorol sy'n canolbwyntio ar yr unigolyn

Mae’r Ddeddf Gwasanaethau Cymdeithasol a Llesiant (Cymru) yn disgwyl i weithwyr rhoi'r bobl y maen nhw’n eu cefnogi wrth wraidd eu hymarfer.    

Mae'r categori hwn yn dathlu prosiectau, timau a sefydliadau sy'n: 

• cefnogi pobl i wneud y pethau sy'n bwysig iddyn nhw, yn eu ffordd eu hunain fel eu bod yn gallu byw bywyd fel y maen nhw eisiau 
• cynllunio gofal a chymorth realistig, cyraeddadwy gan eu bod yn deall yr adnoddau sydd ar gael a'r heriau i'r bobl y maen nhw'n eu cefnogi 
• deall yr hyn sydd ei angen ar y bobl y maen nhw'n eu cefnogi oherwydd eu bod yn wirioneddol gwrando arnyn nhw 
• sicrhau bod gan y pobl maen nhw'n eu cefnogi lais, dewis a rheolaeth wrth wneud penderfyniadau a chynllunio ar gyfer eu gofal a'u cymorth, gan arwain at newid cadarnhaol hir dymor 
• deall yr anghydraddoldebau strwythurol sy'n effeithio ar y bobl y maen nhw'n eu cefnogi, er mwyn gallu herio'r rhwystrau hynny a chefnogi pobl yn dosturiol 
• defnyddio deunyddiau a gwasanaethau yn fwy effeithlon, oherwydd maen nhw ond yn defnyddio’r hyn sydd ei angen i gyflawni’r canlyniad 
• cefnogi teuluoedd i reoli risgiau.    

Os ydych chi'n dîm gofal cymdeithasol, gwaith cymdeithasol neu amlddisgyblaethol sy'n gweithio i hyrwyddo'r dull hwn, ail-alinio'ch systemau a'ch prosesau, neu’n helpu eraill i adeiladu eu sgiliau a'u hyder i weithio yn y modd hwn – rydyn ni eisiau clywed gennych chi! 

Ym mhob categori, bydd ein beirniaid yn chwilio am weithwyr gofal eithriadol ar draws y meysydd gofal cymdeithasol, gwaith cymdeithasol a gofal plant, chwarae a’r blynyddoedd cynnar sy'n mynd y tu hwnt i ofynion arferol eu rôl o ddydd i ddydd ac sy'n helpu'r pobl y maen nhw’n eu cefnogi i gyflawni'r hyn sy'n wirioneddol bwysig iddyn nhw. 

Gwobr arweinyddiaeth ysbrydoledig 

Mae arweinyddiaeth dosturiol ac effeithiol yn hanfodol wrth ddarparu gofal a chymorth o ansawdd uchel. Rydyn ni’n chwilio am unigolion ar draws gofal cymdeithasol a’r blynyddoedd cynnar sy'n: 

• gofalu am anghenion eu cydweithwyr a’r rhai y maen nhw’n eu cefnogi 
• deall heriau a phersbectifau pobl eraill 
• empathi tuag at eu timau a’r rhai y maen nhw’n eu cefnogi 
• helpu i ddatrys problemau i gyflawni canlyniadau gwell. 

Gwobr dysgwr y flwyddyn 

Mae dysgu parhaus yn rhan hanfodol o ddatblygiad proffesiynol unrhyw un.  

Rydyn ni am gydnabod a dathlu unigolion rhagorol yn y meysydd gwaith cymdeithasol, gofal cymdeithasol, gofal plant, chwarae a’r blynyddoedd cynnar sydd wedi mynd y tu hwnt yn eu dysgu dros y flwyddyn ddiwethaf. 

Gallen nhw fod yn: 

• fyfyrwyr sy'n astudio am radd neu gymhwyster mewn gwaith cymdeithasol, gofal cymdeithasol, gofal plant, chwarae neu’r blynyddoedd cynnar 
• prentisiaid  
• staff sydd newydd gymhwyso neu'n newydd i'r sector 
• staff profiadol sydd wedi gwthio eu hunain i wella eu gwybodaeth neu ddysgu sgiliau newydd gyda'u datblygiad proffesiynol parhaus 
• pobl sy'n gweithio yn y maes sydd wedi cynnal ymchwil mewn gofal cymdeithasol, gwaith cymdeithasol neu ofal plant, chwarae a’r blynyddoedd cynnar. 

Gwobr Gofalwn Cymru 

Rydyn ni’n chwilio am bobl i enwebu gweithwyr neu wirfoddolwyr rhagorol sy'n ymwneud â gofal cymdeithasol, gwaith cymdeithasol neu ofal plant, chwarae a’r blynyddoedd cynnar, sydd wedi gwneud gwahaniaeth cadarnhaol iawn i fywydau pobl. 

Gall y gweithwyr fod mewn unrhyw rôl yn y sectorau cyhoeddus, preifat neu wirfoddol, gan gynnwys gwirfoddolwyr. Gallan nhw hefyd bod yn brentisiaid neu'n bobl sy'n astudio ar gyfer cymwysterau wrth weithio.  

Bydd seremoni wobrwyo’r Gwobrau 2027 yn cael ei chynnal yn haf 2027. Byddwn ni’n diweddaru'r dudalen hon gyda mwy o wybodaeth yn agosach at yr amser.