Mae ymchwil yn dangos y gall arddull rheoli gael effaith ar os yw pobl yn dewis aros yn eu rôl.
Mae arwain a rheoli effeithiol yn creu amgylchedd cefnogol a threfnus. Mewn amgylchedd cefnogol gall staff deimlo eu bod yn cael eu gwerthfawrogi, bod rhywun yn gwrando arnynt a’u bod yn gallu tyfu. Pan fydd timau yn profi arweiniad cyson, yn cael llwyth gwaith teg a chyfathrebu cryf, mae eu boddhad yn y swydd yn gwella - ac felly hefyd y cyfraddau cadw.
Dangosodd canfyddiadau arolwg Dweud eich Dweud 2025 bod 73 y cant o weithwyr gofal cymdeithasol yn teimlo eu bod yn cael cefnogaeth gan eu rheolwyr. Ond roedd naw y cant o'r gweithlu yn teimlo nad oeddynt yn cael cefnogaeth. Mae cysylltiad cryf rhwng cymorth gan reolwyr a chanlyniadau da o ran llesiant a chadw staff. Mae ymchwil gan Brifysgol Caerdydd yn dangos y gall cefnogaeth dda gynyddu morâl staff a lleihau gorweithio, gan olygu gwell cyfraddau cadw staff am dymor hir.
Mae ymchwil gan Sgiliau Gofal a Chymdeithas Gweithwyr Cymdeithasol Prydain (BASW) yn dangos y gall creu gweithleoedd cadarnhaol a thosturiol helpu i wella llesiant a chyfraddau cadw staff. Trwy flaenoriaethu tosturi a pharch yn y gweithle, gall arweinwyr leihau lefelau straen a chreu amgylcheddau lle mae staff yn teimlo eu bod yn cael eu gwerthfawrogi. Gall hyn arwain at lai o drosiant staff (Figgett, 2017; Thompson et al., 2021).
Mae'r gwaith ymchwil hwn hefyd yn dangos y gall rheolwyr wella cyfraddau cadw trwy flaenoriaethu sgyrsiau rheolaidd gyda'u staff a chreu diwylliant o gyfathrebu agored. Mae hyn yn helpu staff i deimlo bod rheolwyr yn gwrando arnynt a'u parchu, sy'n eu gwneud yn fwy tebygol o fod eisiau aros.
Dyma adnoddau i gefnogi arwain a rheoli i gadw'r gweithlu.
Oes meysydd neu adnoddau eraill rydych chi'n teimlo a fyddai'n eich helpu i wella cadw'r gweithlu? Gadewch i ni wybod drwy e-bostio strategaethgweithlu@gofalcymdeithasol.cymru.
