Dulliau gwahanol i fyfyrio

Nid y ffordd rydych chi'n myfyrio yw'r peth pwysicaf. Yr hyn sy'n bwysig yw cymryd amser i feddwl am yr hyn rydych chi wedi'i ddysgu, sut mae'n berthnasol i'ch rôl a sut y gall wella eich ymarfer.

Dewiswch y dull sy'n gweddu orau i'ch dysgu ac i'r lefel o fyfyrio sydd ei angen arnoch.

Bydd y dull gorau yn dibynnu ar:

• y gweithgaredd neu'r profiad dysgu
• faint o fanylion sydd eu hangen arnoch
• diben eich myfyrdod
• eich ffordd eich hun o fyfyrio a ffefrir gennych.

Pa bynnag ddull a ddewiswch, dylai myfyrio eich helpu i ddeall eich dysgu, ei ddefnyddio yn ymarferol a gwella canlyniadau i'r bobl rydych chi'n eu cefnogi.

Mae'r dull hwn wedi'i ddatblygu i gefnogi myfyrio yn dilyn unrhyw fath o ddatblygiad proffesiynol parhaus (DPP).

Mae'n eich annog i feddwl am:

• yr hyn ydych chi wedi'i ddysgu
• pam ei fod yn bwysig
• sut mae'n berthnasol i'ch rôl
• sut byddwch chi'n rhoi'r hyn rydych chi wedi'i ddysgu ar waith
• y gwahaniaeth y gallai ei wneud i'r bobl rydych chi'n eu cefnogi.

Mae'r dull hwn yn addas ar gyfer y rhan fwyaf o weithgareddau dysgu a dim ond ychydig funudau y mae'n eu cymryd i'w gwblhau. Gallwch ei ddefnyddio ar ôl hyfforddiant, gweminarau, darllen, goruchwylio, trafodaethau tîm a phrofiadau dysgu bob dydd eraill.

Mae'r dull hwn yn ddefnyddiol pan fyddwch chi eisiau:

• myfyrio'n gyflym ar ôl dysgu
• paratoi ar gyfer goruchwyliaeth
• cofnodi DPP anffurfiol
• nodi camau i wella eich ymarfer.

Strwythur syml ar gyfer meddwl am ddysgu a phrofiad

Mae'r model myfyrio hwn yn defnyddio tri chwestiwn syml i'ch helpu i wneud synnwyr o ddysgu neu brofiad.

Mae'n eich annog i:

• ddisgrifio beth ddigwyddodd
• ystyried pam ei fod yn bwysig
• benderfynu beth fyddwch chi'n ei wneud nesaf.

Mae'r dull hwn yn gyflym, yn ymarferol ac yn hawdd ei ddefnyddio. Mae'n eich helpu i nodi sut y gall dysgu wella eich ymarfer heb orfod ysgrifennu disgrifiad myfyriol manwl.

Mae'r dull hwn yn ddefnyddiol pan fyddwch chi eisiau:

• myfyrio ar ôl cyfarfod neu sesiwn hyfforddi
• meddwl am brofiad bob dydd
• paratoi ar gyfer goruchwyliaeth
• nodi camau gweithredu ar ôl dysgu.

Dull wedi’i strwythuro o fyfyrio'n ddyfnach

Mae cylch myfyriol Gibbs yn eich helpu i archwilio profiad trwy weithio trwy gyfres o gamau.

Mae'n eich annog i feddwl am:

• beth ddigwyddodd
• sut roeddech chi'n teimlo
• beth aeth yn dda
• beth y gellid fod wedi'i wella
• beth wnaethoch chi ei ddysgu
• beth fyddech chi'n ei wneud mewn sefyllfa debyg yn y dyfodol.

Drwy archwilio profiad o safbwyntiau gwahanol, mae'r dull hwn yn eich helpu i ennill dealltwriaeth ddyfnach o'ch ymarfer ac i nodi cyfleoedd ar gyfer datblygu yn y dyfodol.

Mae'r dull hwn yn ddefnyddiol pan fyddwch chi eisiau:

• cwblhau cymhwyster neu adroddiad myfyriol
• archwilio sefyllfa gymhleth
• dysgu o brofiadau heriol
• dadansoddi eich ymarfer yn fanylach.

Dysgu trwy brofiad

Mae cylch dysgu Kolb yn canolbwyntio ar sut mae dysgu'n datblygu trwy brofiad.

Mae'r model yn eich annog i:

• gael profiad
• fyfyrio ar yr hyn a ddigwyddodd
• nodi'r hyn rydych chi wedi'i ddysgu
• gymhwyso'r dysgu hwnnw mewn sefyllfaoedd yn y dyfodol.

Yn hytrach na chanolbwyntio ar yr hyn a ddigwyddodd yn unig, mae'r dull hwn yn eich annog i ddefnyddio'r hyn rydych chi wedi'i ddysgu i wella arfer yn y dyfodol.

Mae'n arbennig o ddefnyddiol wrth ddatblygu sgiliau newydd neu roi cynnig ar wahanol ffyrdd o weithio.

Mae'r dull hwn yn ddefnyddiol pan fyddwch chi eisiau:

• dysgu o brofiadau yn y gweithle
• datblygu sgiliau newydd
• gwella eich ymarfer dros amser
• cymhwyso'r hyn a ddysgwyd mewn sefyllfaoedd gwahanol.

Mae'r enghreifftiau isod yn dangos sut y gallwch fyfyrio ar yr un gweithgaredd dysgu mewn ffyrdd gwahanol.

Nid oes un ffordd gywir o fyfyrio. Dewiswch yr ymagwedd sy'n diwallu eich anghenion orau ac yn cefnogi eich datblygiad proffesiynol.

Gweithgaredd dysgu: mynychu gweminar ar ymarfer sy'n seiliedig ar gryfderau

Dangosodd y weminar sut y gall canolbwyntio ar gryfderau, galluoedd a chanlyniadau unigolyn roi mwy o ddewis a rheolaeth iddyn nhw dros eu bywydau. Amlygodd hefyd bwysigrwydd gweithio mewn partneriaeth â phobl i nodi'r hyn sydd bwysicaf iddyn nhw.