Awgrymiadau ar gyfer cymathu gwerthoedd mewn sefydlu, goruchwylio ac arfarnu

Mae'r cam cymathu yn ymwneud â sut y gallwch chi gefnogi gweithwyr newydd i integreiddio i ddiwylliant eich gweithle, mewn ffordd sy'n sicrhau eu bod nhw:

• yn cyflawni'r canlyniadau gorau i blant a phobl ifanc
• yn teimlo eu bod yn ffynnu ac yn mwynhau gwaith
• eisiau aros mewn gwaith.

Gallwch ddysgu mwy am adeiladu diwylliant cadarnhaol yn y gwaith yn ein canllaw diwylliannau cadarnhaol.

Cynhwyswch gyfleoedd gwahanol i staff newydd ddysgu am eich diwylliant, eich gwerthoedd a'ch disgwyliadau o ran sut maen nhw'n rhoi eich gwerthoedd ar waith yn eu rôl yn ystod ychydig wythnosau cyntaf eu cyfnod sefydlu.

Defnyddiwch y wybodaeth y gallech fod wedi'i dysgu am werthoedd, arddulliau dysgu a dewisiadau cyfathrebu'r ymgeisydd i ddatblygu cynllun sefydlu a hyfforddi cynhwysol, personol.

Cynhwyswch ffocws ar lesiant staff, a strategaethau ar gyfer rheoli eu llesiant a'u gwydnwch eu hunain yn eu cyfnod sefydlu. Mae hyn yn dangos eich bod chi:

• yn eu gwerthfawrogi
• yn cydnabod heriau yn y rolau
• yn rhoi eich gwerthoedd ar waith drwy ofalu amdanyn nhw.

Rhowch adborth rheolaidd i staff newydd ar yr hyn maen nhw'n ei wneud a sut maen nhw'n rhoi eich gwerthoedd a'ch ymddygiadau ar waith.

Mae hyn yn golygu rhoi cyfleoedd iddyn nhw fyfyrio ar eu hymddygiad, a deall yr hyn sydd angen iddyn nhw ei wneud yn unol â'ch diwylliant a'ch disgwyliadau.

Defnyddiwch oruchwyliaeth reolaidd fel cyfle i gydnabod pryd mae staff yn arddangos gwerthoedd ac ymddygiadau cadarnhaol, ac i godi a mynd i'r afael â phryderon ynghylch ymddygiad ac agwedd.

Modelwch eich gwerthoedd yn ymarferol drwy wneud yn siŵr eich bod yn dangos parch a thrugaredd i bobl drwy:

• trefnu a pheidio â chanslo goruchwyliaeth
• cymryd amser i baratoi ar gyfer y sgwrs lawn
• gwrando nid barnu
• cefnogi staff i gymryd cyfrifoldeb am unrhyw newidiadau y mae angen iddyn nhw eu gwneud i sicrhau y gallant ffynnu a llwyddo yn eu rôl.

Gwnewch yn siŵr bod gan y bobl sy'n cynnal gwerthusiadau'r hyfforddiant a'r sgiliau i'w wneud, a'u bod yn gallu modelu'r gwerthoedd y byddant yn eu trafod yn yr asesiad.

Rhowch adborth sy'n seiliedig ar werthoedd i atgyfnerthu'r gwerthoedd a'r ymddygiadau cadarnhaol yr hoffech eu gweld mewn staff ac i'w helpu i deimlo eu bod yn cael eu gwerthfawrogi.

Gallwch wneud hyn:

• mewn goruchwyliaeth
• yn anffurfiol mewn sgyrsiau o ddydd i ddydd
• drwy gydnabyddiaeth staff ffurfiol, fel negeseuon e-bost misol gan arweinwyr neu wobrau gwerthoedd staff. 

Mae gennym ni dempled tystysgrif gwobr y gellir ei lawrlwytho.

Cynhwyswch eich gwerthoedd a'ch ymddygiadau mewn sgyrsiau gwerthuso drwy gysylltu amcanion a chyflawniadau â'ch gwerthoedd, adolygu'r flwyddyn ddiwethaf a gosod amcanion SMART ar gyfer y flwyddyn nesaf sy'n cyd-fynd â'ch gwerthoedd.

Mae amcanion SMART yn:

• penodol
• mesuradwy
• cyraeddadwy
• perthnasol
• amserol.