Adroddiad blynyddol y gweithlu

Bob blwyddyn, rydyn ni'n cynhyrchu adroddiad sy’n rhoi cipolwg ar y gweithlu gofal cymdeithasol yng Nghymru.

Mae’r adroddiad yn seiliedig ar ddata sy'n cael ei ddarparu gan awdurdodau lleol a darparwyr gwasanaethau annibynnol am niferoedd a nodweddion eu gweithlu.

Mae’n wahanol i'r wybodaeth sy’n cael ei gyhoeddi am y gweithlu cofrestredig gan ei fod yn casglu data ar bawb sy'n gweithio ym maes gofal cymdeithasol.

Mae hefyd yn edrych ar bethau fel contractau ac oriau gwaith, yn ogystal â'r rhai sy'n ymuno a gadael, i ble maen nhw’n symud ac o ble.

Mae cael y darlun mwyaf cyflawn posibl o faint a siâp y gweithlu gofal cymdeithasol yng Nghymru yn ein helpu i gynllunio ymlaen llaw.

Drwy ddarparu eich data, rydych yn cyfrannu at ein dealltwriaeth o’r bobl sy’n gweithio ym maes gofal cymdeithasol yng Nghymru.

O 2026 ymlaen, byddwn yn casglu’r data fel rhan o broses datganiad blynyddol Arolygiaeth Gofal Cymru (AGC), sy’n golygu mai dim ond unwaith y bydd rhaid i ddarparwyr gyflwyno eu data o hyn ymlaen. Yn flaenorol, roedden ni ac AGC yn cynnal dau ymarfer casglu data ar wahân bob blwyddyn.

Bydd AGC yn casglu’r data gan ddarparwyr gofal cymdeithasol, a byddwn ni’n cynhyrchu ein hadroddiad yn seiliedig ar y data maen nhw'n ei gasglu. Yn ogystal â lleihau’r baich amser ar ddarparwyr, mae hyn hefyd yn sicrhau bod y data sydd gan y ddwy sefydliad yn gyson.

Ni fydd y casgliad cyfun newydd yn gofyn am unrhyw wybodaeth nad yw eisoes yn cael ei chasglu fel rhan o’r ddau gasgliad presennol.

Rydyn ni’n casglu’r data i gael gwell dealltwriaeth o’r rhai sy’n gweithio ym maes gofal cymdeithasol yng Nghymru.

Mae sicrhau bod gennym data o’r ansawdd uchaf i ddeall y gweithlu gofal cymdeithasol yng Nghymru yn hynod o bwysig. Heb ddata o ansawdd da, ni allwn wir ddeall siâp a maint gofal cymdeithasol yng Nghymru.

Mae hefyd yn ein helpu i gael gwell syniad o ble mae’r galw am ofal, ym mha fathau o ddarpariaeth, ac i gynllunio’n effeithiol ar gyfer y dyfodol.

Mae data o ansawdd da yn ein galluogi i wneud penderfyniadau gwell, yn seiliedig ar dystiolaeth. Mae hyn yn golygu y gallwn helpu i ddarparu gofal a chymorth gwell i bobl yng Nghymru ac annog cefnogaeth well i’r gweithwyr sy’n ei ddarparu.

Bydd y casgliad cyfun hefyd yn cefnogi ein hymrwymiad i Fframwaith Perfformiad a Gwella gofal cymdeithasol yng Nghymru, drwy symleiddio’r gwaith o gasglu data o ansawdd uchel.

Rydyn ni’n dadansoddi’r data ac yn ei gyflwyno mewn adroddiad rydyn ni’n gyhoeddi bob blwyddyn, sy’n rhoi trosolwg o’r gweithlu cyfan ac yn dadansoddi’r canfyddiadau ar gyfer gwahanol leoliadau.

Dyma’r unig ddata sy'n cael ei gasglu am y gweithlu gofal cymdeithasol cyfan yng Nghymru. Oherwydd hyn, mae gan yr adroddiad amrywiaeth o ddefnyddwyr, gan gynnwys:

• lywodraethau Cymru a’r DU
• Cymdeithas Cyfarwyddwyr Gwasanaethau Cymdeithasol (ADSS Cymru) ac awdurdodau lleol
• rheoleiddwyr fel Arolygiaeth Gofal Cymru a Gofal Cymdeithasol Cymru
• darparwyr gofal
• ymchwilwyr
• y cyfryngau
• aelodau o’r cyhoedd.

Mae’r data wedi cael ei ddefnyddio i gynllunio llefydd hyfforddi ar gyfer gweithwyr cymdeithasol a gweithwyr gofal yng Nghymru, yn ogystal ag i gefnogi prosiectau penodol fel datblygu’r rhaglen frechu ar gyfer gweithwyr gofal yn ystod pandemig Covid‑19.

Byddwn ni hefyd yn defnyddio’r data i gynhyrchu erthyglau a chynnwys cysylltiedig am wahanol agweddau ar ein canfyddiadau drwy Porth Data Gofal Cymdeithasol Cenedlaethol Cymru.

Bydd y casgliad cyfun newydd yn cael ei gynnal drwy broses datganiad blynyddol AGC. Mae hynny’n golygu y bydd angen cyfrif AGC Ar-lein arnoch i gyflwyno eich data.

Os mai chi yw’r person sy’n casglu’r data ar ran eich sefydliad neu’ch lleoliad, efallai y bydd AGC yn eich cyfeirio atoch fel ‘swyddog sefydliadol’, neu efallai y bydd angen i chi gael eich sefydlu fel ‘cynorthwyydd ar-lein’. Mae gwybodaeth am sut y gall Unigolion Cyfrifol a swyddogion sefydliadol greu a dirprwyo i gynorthwywyr ar-lein ar wefan AGC.

Dylai Unigolion Cyfrifol neu swyddogion sefydliadol fewngofnodi i’w cyfrif Ar-lein AGC cyn 1 Ebrill i sicrhau bod manylion eu gwasanaeth yn gyfredol, neu greu cyfrif os oes angen. Os ydych yn ddarparwr gofal cymdeithasol nad yw wedi cofrestru ag AGC eto, cysylltwch â data@gofalcymdeithasol.cymru i sicrhau y gallwch barhau i ddarparu eich data gwerthfawr.

Mae manylion llawn ar sut i gyflwyno data drwy’r broses dataganiad blynyddol ar gael ar wefan AGC.

Bydd y cyfnod ar gyfer cwblhau'r datganiad blynyddol yn cau ar 26 Mai.

Bydd y casgliad newydd yn dilyn amserlen presennol datganiad blynyddol AGC, gan gael ei gynnal bob gwanwyn. Cyn hyn, roedd ein casgliad ni yn cael ei gynnal bob hydref.

Oherwydd yr egwyl fyrrach rhwng y casgliadau eleni, bydd ein canfyddiadau ar gyfer 2025 eu cyhoeddi ar ôl i ddata 2026 gael ei gasglu.

Rydyn ni'n disgwyl i hyn fod yn wir ar gyfer eleni yn unig, wrth i ni symud i’r amserlen gasglu newydd.