Casgliad data gweithlu cyfun newydd yn agor ym mis Ebrill – a yw'ch sefydliad chi'n barod?

Bydd Gofal Cymdeithasol Cymru ac Arolygiaeth Gofal Cymru yn lansio casgliad data gweithlu cyfun newydd ar 1 Ebrill, gan ei gwneud yn haws nag erioed i ddarparwyr gyflwyno eu data.

Rydyn ni ac AGC wedi dod â’n dau gasgliad data blynyddol at ei gilydd i greu un broses gyfun, sy’n golygu mai dim ond unwaith y bydd angen i ddarparwyr gofal cymdeithasol gasglu a chyflwyno eu data.

Yn y gorffennol, roedd gofyn i ddarparwyr gyflwyno dau set o ddata bob blwyddyn – un i AGC drwy’r datganiad blynyddol, ac un i ni drwy’n casgliad data gweithlu blynyddol.

O hyn ymlaen, dim ond drwy broses datganiad blynyddol AGC y bydd data yn cael ei gasglu.

Mae'r data sy'n cael ei gasglu yn cynnwys gwybodaeth am niferoedd y gweithlu, nodweddion ac oriau gwaith.

Ni fydd y casgliad cyfun newydd yn gofyn am unrhyw wybodaeth nad yw eisoes yn cael ei chasglu fel rhan o’r ddau gasgliad presennol.

Byddwn ni'n parhau i gynhyrchu adroddiad bob blwyddyn sy’n darparu darlun o faint a nodweddion y gweithlu gofal cymdeithasol yng Nghymru.

Dyma’r unig ddata sy'n cael ei gasglu am y gweithlu gofal cymdeithasol cyfan yng Nghymru. Oherwydd hyn, mae gan yr adroddiad amrywiaeth o ddefnyddwyr, gan gynnwys:

• lywodraethau Cymru a’r DU
• Cymdeithas Cyfarwyddwyr Gwasanaethau Cymdeithasol (ADSS Cymru) ac awdurdodau lleol
• rheoleiddwyr fel Arolygiaeth Gofal Cymru a Gofal Cymdeithasol Cymru
• darparwyr gofal
• ymchwilwyr
• y cyfryngau
• aelodau o’r cyhoedd.

Mae sicrhau bod gennym ddata o’r ansawdd uchaf i ddeall y gweithlu gofal cymdeithasol yng Nghymru yn hynod bwysig. Heb ddata o ansawdd da, ni allwn ddeall siâp a maint gofal cymdeithasol yng Nghymru yn gywir.

Mae hefyd yn ein helpu i gael gwell dealltwriaeth o ble mae’r galw am ofal, ym mha fathau o ddarpariaeth, ac i gynllunio’n effeithiol ar gyfer y dyfodol.

Mae data o ansawdd da yn ein galluogi i wneud penderfyniadau gwell, yn seiliedig ar dystiolaeth. Mae hyn yn golygu y gallwn helpu i ddarparu gofal a chymorth gwell i bobl yng Nghymru ac annog cefnogaeth well i’r gweithwyr sy’n ei ddarparu.

Bydd y casgliad cyfun hefyd yn cefnogi ein hymrwymiad i Fframwaith Perfformiad a Gwella gofal cymdeithasol yng Nghymru, drwy symleiddio’r gwaith o gasglu data o ansawdd uchel.

Bydd y casgliad cyfun newydd yn cael ei gynnal drwy broses datganiad blynyddol AGC. Mae hynny’n golygu y bydd angen cyfrif AGC Ar-lein arnoch i gyflwyno eich data.

Os mai chi yw’r person sy’n casglu’r data ar ran eich sefydliad neu’ch lleoliad, efallai y bydd AGC yn eich cyfeirio atoch fel ‘swyddog sefydliadol’, neu efallai y bydd angen i chi gael eich sefydlu fel ‘cynorthwyydd ar-lein’. Mae gwybodaeth am sut y gall Unigolion Cyfrifol a swyddogion sefydliadol greu a dirprwyo i gynorthwywyr ar-lein ar wefan AGC.

Dylai Unigolion Cyfrifol neu swyddogion sefydliadol fewngofnodi i’w cyfrif Ar-lein AGC cyn 1 Ebrill i sicrhau bod manylion eu gwasanaeth yn gyfredol, neu greu cyfrif os oes angen. Os ydych yn ddarparwr gofal cymdeithasol nad yw wedi cofrestru ag AGC eto, cysylltwch â data@gofalcymdeithasol.cymru i sicrhau y gallwch barhau i ddarparu eich data gwerthfawr.

Mae manylion llawn ar sut i gyflwyno data drwy’r broses dataganiad blynyddol ar gael ar wefan AGC.

Bydd y cyfnod ar gyfer cwblhau'r datganiad blynyddol yn cau ar 26 Mai.

Os hoffech wybod mwy am y casgliad data cyfun newydd, ewch i’n tudalen adroddiad blynyddol y gweithlu neu cysylltwch â data@gofalcymdeithasol.cymru.