Os oes angen i ymgeiswyr lenwi ffurflen gais safonol, gallwch ddefnyddio'r pecyn cais i ofyn iddyn nhw roi enghreifftiau o sut maen nhw wedi dangos eich gwerthoedd yn ymarferol.
Gallwch ofyn iddyn nhw wneud hyn yn eu llythyr eglurhaol, neu fel rhan o'u datganiad personol ar y ffurflen gais.
Mae gofyn am enghreifftiau o'u gwaith, gwirfoddoli neu fywyd personol ar gyfer pob un o'ch gwerthoedd fel rhan o'u datganiad personol neu lythyr cais, yn golygu y gall ymgeiswyr ddefnyddio enghreifftiau na fydden nhw wedi'u rhannu fel arall.
Felly, efallai y byddwch yn cael gwell syniad o sut mae eu gwerthoedd a'u hymddygiadau'n cyd-fynd â gwerthoedd eich sefydliad.
Datganiadau enghreifftiol i'w cynnwys yn y pecyn cais
Gall ffurflenni cais byr ar-lein, sy'n hawdd eu cwblhau ar ffôn symudol, annog ceisiadau gan ymgeiswyr niwroamrywiol ac ymgeiswyr sy'n cael eu digalonni gan ffurflenni cais hir.
Ar y ffurflen, gallech ofyn am eu henw, manylion cyswllt ac un cwestiwn yn gofyn pam eu bod yn meddwl eu bod yn rhannu gwerthoedd eich cartref plant.
Yna, gallech ofyn iddyn nhw gwblhau'r ffurflen gais lawn gyda'r holl wybodaeth ar gyfer recriwtio diogel a theg pan fyddant yn dod i gyfweliad.
Enghraifft
Pam rydych chi eisiau gweithio i ni? Defnyddiwch a rhannwch enghreifftiau o'ch gwaith, gwirfoddoli neu feysydd eraill o'ch bywyd lle rydych chi wedi dangos eich bod chi'n rhannu ein gwerthoedd o fod yn ganolog i'r plentyn, yn barchus ac yn dosturiol, cymryd cyfrifoldeb a gweithio mewn tîm.
Ffordd arall o annog ystod ehangach o ymgeiswyr i wneud cais yw cynnig y cyfle iddyn nhw anfon cais fideo neu sain byr lle maen nhw’n recordio eu hunain yn ateb cwestiynau'r cais. Gall hyn fod yn addasiad rhesymol defnyddiol ar gyfer ystod ehangach o ymgeiswyr.
Gall y panel sy'n llunio'r rhestr fer ddefnyddio tabl i benderfynu pwy i'w wahodd i gyfweliad, a sicrhau bod y bobl sy'n llunio'r rhestr fer wedi'u hyfforddi a'u briffio ar sut i chwilio am y gwerthoedd a'r ymddygiadau.
Gall defnyddio tabl hefyd helpu'r panel i gofnodi'r meini prawf hanfodol eraill ar gyfer y swydd megis sgiliau, profiad a chymwysterau perthnasol.
Mae gennym ni enghraifft o dabl y gallwch ei ddefnyddio i ddangos sut mae'r ymgeisydd yn dangos, yn dangos yn rhannol, neu ddim yn dangos y meini prawf hanfodol, a'r dystiolaeth ar gyfer hyn.
Mae'r rhes gyntaf yn rhestru'r rôl. Yr ail res yw enw'r ymgeisydd.
Mae'r golofn gyntaf yn rhestru meini prawf hanfodol. Er enghraifft:
Sgiliau a phrofiad
Cymwysterau
Gwerthoedd
Mae'r colofnau sy'n weddill yn caniatáu nodiadau yn erbyn y sgorio ac a yw'r ymgeisydd yn dangos eu bod nhw :
ac unrhyw dystiolaeth i brofi hyn.
