Adroddiad newydd yn amcangyfrif bod 84,908 o bobl yn gweithio ym maes gofal cymdeithasol yng Nghymru

Mae amcangyfrif o 84,908 o bobl yn gweithio yn y maes gofal cymdeithasol yng Nghymru yn ôl ein hadroddiad diweddaraf ar gyfansoddiad y gweithlu. 

Mae hyn yn gynnydd bach o gymharu â'r flwyddyn flaenorol.

Casglon ni ddata ar gyfer Adroddiad y gweithlu gofal cymdeithasol gyda chymorth awdurdodau lleol a darparwyr gwasanaethau a gomisiynir rhwng mis Hydref a mis Rhagfyr 2025.

Mae’r adroddiad blynyddol hwn yn rhoi darlun i ni o faint a nodweddion y gweithlu gofal cymdeithasol yng Nghymru.

Mae’n cynnwys data fel oedran, rhyw ac ethnigrwydd y gweithlu, yn ogystal â gwybodaeth am nifer yr oriau mae pobl yn eu gweithio, pa fath o gontract sydd ganddyn nhw ac a oes angen fisa arnyn nhw i weithio.

Dyma’r pumed tro i ni gasglu data am y gweithlu cyfan fel un ymarfer. Ar gyfer yr adroddiad hwn, gofynnon ni i ddarparwyr am ddata am y gweithlu fel yr oedd ar 31 Mawrth 2025.  

Dyma’r unig ddata sy'n cael ei gasglu am y gweithlu gofal cymdeithasol cyfan yng Nghymru. Oherwydd hynny, mae llawer o bobl a sefydliadau gwahanol yn defnyddio’r adroddiad i lywio eu gwaith. Mae’r rhain yn cynnwys:

• Llywodraeth Cymru a Llywodraeth y DU
• Cymdeithas Cyfarwyddwyr Gwasanaethau Cymdeithasol Cymru (ADSS Cymru) ac awdurdodau lleol
• rheoleiddwyr fel Arolygiaeth Gofal Cymru (AGC) a Gofal Cymdeithasol Cymru
• darparwyr gofal
• ymchwilwyr
• y cyfryngau
• aelodau o’r cyhoedd.

Mae sicrhau bod gennym ddata o’r ansawdd uchaf i ddeall y gweithlu gofal cymdeithasol yng Nghymru yn hynod bwysig. Heb ddata o ansawdd da, ni allwn ddeall siâp a maint gofal cymdeithasol yng Nghymru yn gywir.

Mae hefyd yn ein helpu i gael gwell dealltwriaeth o ble mae’r galw am ofal, ym mha fathau o ddarpariaeth, ac i gynllunio’n effeithiol ar gyfer y dyfodol.

Mae data o ansawdd da yn ein galluogi i wneud penderfyniadau gwell, yn seiliedig ar dystiolaeth. Mae hyn yn golygu y gallwn helpu i ddarparu gofal a chymorth gwell i bobl yng Nghymru ac annog cefnogaeth well i’r gweithwyr sy’n ei ddarparu.

Yn ddiweddar, cynhalion ni casgliad data newydd ar y cyd gydag Arolygiaeth Gofal Cymru (AGC) am y tro cyntaf.

Daethon ni ac AGC â’n dau gasgliad data blynyddol ynghyd yn un broses ar gyfer 2026. Mae hyn yn golygu mai dim ond unwaith y mae angen i ddarparwyr gofal cymdeithasol gasglu a chyflwyno eu data erbyn hyn.

Yn flaenorol, roedd darparwyr yn gorfod cyflwyno dwy set o ddata ar wahân bob blwyddyn – un i AGC drwy’r datganiadau blynyddol ac un i ni drwy ein casgliad data blynyddol.

Bellach, dim ond drwy broses datganiad blynyddol AGC y mae data’n cael ei gasglu, sy’n cael ei chynnal bob gwanwyn.

Mae’r cyntaf o’r casgliadau data cyfun hyn eisoes wedi digwydd a bydd yn cael ei adlewyrchu yn adroddiad 2026, y byddwn ni’n ei gyhoeddi yn ddiweddarach eleni.