Arolwg Dweud Eich Dweud 2024

Mae ein harolwg o’r gweithlu gofal cymdeithasol ar gyfer 2024 bellach wedi cau.

Diolch i’r mwy na 5,000 o bobl a gymerodd ran.

Yn union fel yn 2023, fe wnaethon ni ofyn i weithwyr gofal cymdeithasol ateb cwestiynau am bethau fel iechyd a llesiant, tâl ac amodau, a beth maen nhw'n ei hoffi am weithio yn y sector.

Rydyn ni’n cynnal yr ymchwil hwn eto fel y gallwn ni ddechrau monitro tueddiadau o ran beth mae pobl yn ei feddwl am weithio ym maes gofal cymdeithasol.

Byddwn ni'n cyhoeddi’r canlyniadau ar ein gwefan yn ddiweddarach eleni a byddwn yn defnyddio’r canfyddiadau i lunio’r cymorth rydyn ni a’n partneriaid yn ei gynnig, ac i dynnu sylw llunwyr polisi yn Llywodraeth Cymru at faterion pwysig.

Mae Prifysgol Bath Spa a Chymdeithas Brydeinig y Gweithwyr Cymdeithasol (BASW) yn gweithio gyda ni i gynnal yr ymchwil hwn.

Bydd eich holl atebion yn ddienw a byddwn ni’n rhannu'r canfyddiadau ar ein gwefan ar ôl dadansoddi'r canlyniadau.

Ym mis Hydref, fe wnaethon ni cyhoeddi canlyniadau arolwg peilot 2023, a ddangosodd fod gweithwyr gofal cymdeithasol yn teimlo eu bod nhw’n cael eu gwerthfawrogi gan y bobl a'r teuluoedd y maen nhw’n eu cefnogi. Ond maen nhw hefyd yn teimlo nad ydyn nhw'n cael eu gwerthfawrogi'n ddigonol gan y cyhoedd ac nad ydyn nhw'n cael digon o dâl am y gwaith maen nhw’n yn ei wneud.

Os hoffech chi gael gwybod mwy am arolwg y gweithlu 2023, gallwch chi ddarllen yr adroddiad llawn yma.