Rhowch eich barn am ein Codau Ymarfer Proffesiynol

Mae'r ymgynghoriad bellach wedi cau. Diolch i bawb wnaeth rannu eu barn gyda ni.

Byddwn ni'n cyhoeddi ein camau nesaf yn fuan.

Mae’r Cod Ymarfer Proffesiynol i Gyflogwyr Gofal Cymdeithasol a’r Cod Ymarfer Proffesiynol i Weithwyr Gofal Cymdeithasol yn sail i’n gwaith rheoleiddio. Nid ydynt wedi cael eu diweddaru ers 2017 ac ers hynny mae ein cofrestr wedi cynyddu’n sylweddol, o ychydig dros 11,000 o bobl i fwy na 60,000 o bobl.

Rhwng Awst a Rhagfyr 2023, fe wnaethon ni siarad â mwy na 300 o bobl yn y sector yng Nghymru. Gofynnom am eu barn am y canlynol:

• y ddau god ymarfer proffesiynol
• saith dogfen canllawiau ymarfer
• egwyddorion addasrwydd i ymarfer.

Ar y cyfan, roedd pobl yn teimlo bod yr adnoddau’n dda ond mae mwy o waith i’w wneud i’w gwreiddio mewn ymarfer a gwella sut mae pobl yn eu defnyddio.

Dywedodd pobl mai’r prif newidiadau sydd eu hangen yn y Codau yw eu gwneud yn fyrrach a symlach, er mwyn i bobl allu deall yn well yr hyn disgwylir iddyn nhw ei wneud.

Fel rhan o’n gwaith ymgysylltu, helpodd pobl yn y sector ni i newid geiriad y codau. Nawr, rydyn ni eisiau clywed eich barn am y fersiynau newydd arfaethedig.

Os ydych chi’n weithiwr neu’n gyflogwr gofal cymdeithasol, nid yw’r codau diwygiedig yn gofyn i chi newid eich ymarfer mewn unrhyw ffordd. Nod y geiriad newydd arfaethedig yw ei gwneud hi’n fwy clir beth sy’n ddisgwyliedig gennych chi, gan gynnwys:

• yr angen i gynnal ffiniau proffesiynol, a hynny wyneb yn wyneb ac ar-lein
• pwysigrwydd meithrin perthnasau cadarnhaol â phobl eraill, teuluoedd a gofalwyr
• annog gofal sy’n seiliedig ar gryfderau, yn hytrach na chanolbwyntio ar beth i beidio â’i wneud
• bod helpu unigolion i wneud yr hyn sy’n bwysig iddyn nhw yn parhau i fod wrth wraidd ymarfer.

Rydyn ni hefyd wedi cryfhau’r iaith o amgylch cydraddoldeb ac amrywiaeth. Rydyn ni’n cydnabod Cymru sy’n wrth-hiliol ac sy’n hyrwyddo tegwch.

Yn ystod ein gwaith ymgysylltu, fe wnaethon ni hefyd glywed nad yw fersiwn Gymraeg y codau bob amser yn defnyddio Cymraeg clir a dealladwy. Rydyn ni’n awyddus iawn i glywed barn siaradwyr Cymraeg am y fersiynau diwygiedig, ac a ydych chi’n meddwl eu bod yn gliriach ac yn haws eu deall. Rydyn ni hefyd yn awyddus i wybod a oes unrhyw faterion eraill y mae angen i ni eu hystyried ar gyfer ein gweithlu sy’n siarad Cymraeg.

Ar ôl yr ymgynghoriad, byddwn ni’n diweddaru’r Codau Ymarfer ac yn cyhoeddi’r fersiynau newydd. Byddwn ni hefyd yn cyhoeddi dyddiad ar gyfer pa bryd bydd y codau newydd yn dod i rym, i roi amser i’r sector baratoi ar eu cyfer. Bydd y codau presennol yn parhau mewn grym tan y dyddiad gweithredu hwnnw. Ar ôl y dyddiad hwn, bydd angen i weithwyr a chyflogwyr gofal cymdeithasol weithio i’r codau newydd.

Byddwn ni hefyd yn diweddaru’r canllawiau ymarfer sy’n gysylltiedig â’r codau. Bydd y canllawiau’n cael eu diweddaru i gynnwys yr adborth a gawsom yn ystod ein gwaith ymgysylltu.

O hyn allan, byddwn ni’n parhau i ddatblygu a gwella’r canllawiau hynny i’w gwneud mor hawdd â phosib i weithwyr gofal cymdeithasol a chyflogwyr eu defnyddio yn eu hymarfer o ddydd i ddydd.