Ein aelodau Bwrdd

Cadeirydd y Bwrdd, mae Katija yn arweinydd profiadol iawn yn y trydydd sector a'r sector cyhoeddus gyda phortffolio cyfoethog o rolau bwrdd, yn enwedig ym meysydd iechyd, gofal, cynhwysiant ariannol a chyfiawnder cymdeithasol. Yn flaenorol yn Aelod Annibynnol o Fwrdd Iechyd Prifysgol Aneurin Bevan, mae ei diddordebau penodol yn gorwedd ym mhenderfynyddion ehangach iechyd a chysylltedd y sectorau iechyd a gofal.

Cyn ei phenodiad fel Cadeirydd roedd Katija yn uwch arweinydd yn y Groes Goch Brydeinig ac ymddiriedolwr elusennau amlwg, mae hi'n dadlau dros y trydydd sector i fod yn rhan annatod o ddarparu gwasanaethau'r sector cyhoeddus. Yn ei bywyd y tu allan i'r gwaith, mae Katija yn ofalwr di-dâl. Mae bod yn rhan o'r gymuned rhedeg a beicio yn Ne Cymru hefyd yn bwysig iddi, yn enwedig trwy parkrun, lle mae hi'n Gyfarwyddwr Ddigwyddiad ac yn annog pawb i fwynhau amser yn yr awyr agored, cysylltu ag eraill ac yn y byd natur.
 

Aaron yw Rheolwr Rhaglen Teleofal TEC Cymru. Cyn hynny, roedd Aaron yn gweithio â gwasanaeth teleofal Cyngor Caerdydd, lle’r oedd yn hwyluso’r ddarpariaeth larymau gofal cymdeithasol oedolion i ddinasyddion, gan eu helpu i gadw’u hannibyniaeth yn eu cartref.

Cyn hyn roedd Aaron yn gadeirydd Rhwydwaith Gwella Dysgu Technoleg Gynorthwyol. Ac mae ar hyn o bryd yn aelod o’r Bwrdd Gwella Ansawdd ar gyfer y Gymdeithas Gwasanaethau Teleofal. Mae'n eiriolwr brwd dros ofal sy’n cael ei hwyluso gan dechnoleg.

Mae Aaron yn falch o hyrwyddo potensial technoleg i wella diogelwch i bobl sydd angen cymorth ychwanegol, fel y gallan nhw gadw’u hannibyniaeth yn eu hamgylchedd bob dydd.

Mae Abyd yn Ddarllenydd mewn Gwaith Cymdeithasol ym Mhrifysgol Caerdydd, lle mae’n gweithio ers 20 mlynedd. Cyn hyn, roedd Abyd yn gweithio mewn gofal cymdeithasol plant, mewn iechyd meddwl, ac mewn gwaith cymdeithasol mewn derbyn ac asesu a chanolfannau teulu.

Mae wedi cydlynu hyfforddiant mewn gofal plant ac amddiffyn plant, rheoli a datblygu. Ac roedd yn weithiwr cymdeithasol annibynnol am fwy na 25 mlynedd.

Roedd Abyd yn gyfrifol am sefydlu’r prosiectau cynadledda grŵp teuluoedd cyntaf yn ne Cymru. Ac mae wedi cadeirio cynadleddau amddiffyn plant mewn awdurdodau lleol cyn mynd ymlaen i addysgu gwaith cymdeithasol cymhwyso ym Mhrifysgol Caerdydd.

Mae Abyd yn aelod o bwyllgor BASW Cymru, yn un o ymddiriedolwyr Tros Gynnal Plant ac mae ar grŵp llywio Race Alliance Wales. Yn fwyaf diweddar, mae wedi bod yn aelod o Banel Arbenigwyr y Llywodraeth a oedd yn edrych ar y Gwasanaeth Gofal Cenedlaethol ac mae’n rhan o weithgor Gwrth-hiliol Cymru.

Mae diddordebau ymchwil Abyd yn cynnwys cynadledda grŵp teuluol a gwrth-hiliaeth, ac yn ddiweddar cyd-olygodd Social Work in Wales, a gafodd ei gyhoeddi fis Mehefin 2023. Mae Abyd yn Fwslim ‘Ismaili Dwyrain Affrica’, yn rhedwr ac yn mwynhau ffotograffiaeth, pêl droed a cherddoriaeth ryngwladol.

Mae Dr Edwin Mutambanengwe yn weithiwr cymdeithasol cymwysedig sydd â phrofiad ar draws y sectorau cyhoeddus, preifat a thrydydd sector, yn y DU ac yn rhyngwladol. Mae wedi gweithio ar lefelau rheng flaen a rheoli, yn bennaf ym maes amddiffyn plant. Canolbwyntiodd ei ymchwil doethuriaeth ar wyddoniaeth weithredu, gan archwilio sut y gellir trosi deddfwriaeth, polisïau ac arferion yn effeithiol yn ganlyniadau ystyrlon i blant a theuluoedd.

Mae Edwin hefyd yn Addysgwr Ymarfer cymwysedig a Hyfforddwr Gwaith Cymdeithasol. Mae wedi addysgu mewn sefydliadau addysg uwch ac yn parhau i oruchwylio myfyrwyr gwaith cymdeithasol mewn partneriaeth â phrifysgolion.

Mae'n angerddol am ddatblygu ymarfer ac yn cyfrannu at y proffesiwn trwy gymryd rhan yng Ngrŵp Diddordeb Arbennig Diaspora BASW. Mae hefyd wedi cymryd rhan yn flaenorol yn y Ffrydiau Gwaith Arferion Gwaith ar gyfer Gwaith Cymdeithasol Lloegr.

Mae Einir yn weithiwr cymdeithasol cymwysiedig. Mae hi wedi gweithio mewn rolau gwahanol ar draws gwasanaethau plant ac oedolion, gan gynnwys mewn arweinyddiaeth a rheolaeth.

Mae Einir yn siaradwr Cymraeg.

Mae gan Helen Mary Jones 40 mlynedd o brofiad o weithio ym maes gwasanaethau cyhoeddus, gan gynnwys fel Aelod o’r Senedd, lle bu’n gadeirydd y Pwyllgor Plant a Phobl Ifanc a’r Pwyllgor Diwylliant. Bu’n Gadeirydd Grwpiau Trawsbleidiol ar Blant a Phobl Ifanc, Plant sy’n Derbyn Gofal, a Hawliau Dynol. Gwasanaethodd fel Gweinidog yr Wrthblaid dros Iechyd a Gwasanaethau Cymdeithasol a Gweinidog yr Wrthblaid dros yr Economi.

Y tu allan i wleidyddiaeth mae wedi dal rolau sylweddol, gan gynnwys prif weithredwr elusen gwaith ieuenctid genedlaethol a Dirprwy Gyfarwyddwr y Comisiwn Cyfle Cyfartal. Fe’i penodwyd i’r Bwrdd Ymyrraeth Gweinidogol a anfonwyd i Gyngor Sir Penfro yn dilyn cyfres o fethiannau diogelu. Mae hi wedi cyflwyno ar bolisi cyhoeddus ym Mhrifysgolion Harvard, Houston ac Austin. Ym mis Medi 2021 cafodd ei hethol i Fwrdd Plant yng Nghymru, y corff ymbarél ar gyfer sefydliadau plant. Ar hyn o bryd mae'n gweithio fel ymgynghorydd polisi a materion cyhoeddus.

Mae Isobel wedi gweithio yn y sector gofal a chymorth di-elw ers 14 mlynedd. Mae ganddi dros ddegawd o brofiad o reoli Sicrwydd Ansawdd a Gwella mewn gwasanaethau gofal cofrestredig, er mwyn galluogi canlyniadau gwell i bobl sy'n defnyddio gwasanaethau. Isobel hefyd yw Arweinydd Diogelu cymdeithas dai fawr ledled Cymru sy'n darparu gofal a chymorth ledled De a Chanolbarth Cymru.

Mae gan Kieran bron i 15 mlynedd o brofiad arweiniol mewn amrywiaeth o elusennau sy’n darparu gofal a chymorth yng Nghymru a ledled y DU. Ar hyn o bryd mae’n gweithio fel Prif Weithredwr Mind Cwm Taf Morgannwg.

Cyn hynny bu’n darparu cymorth datblygu polisi i Weinidogion Llywodraeth Cymru, yn arwain gweithgareddau marchnata a masnachol yn y sector chwaraeon ac yn cefnogi ystod eang o gwmnïau gyda chysylltiadau cyhoeddus a materion cyhoeddus.

Cafodd Mark ddiagnosis o arthritis gwynegol pan oedd yn 11 mis oed, ac yn raddol mae wedi ymledu drwy ei gorff. Erbyn iddo gyrraedd wyth oed, roedd angen gofal llawn amser arno, a oedd yn cael ei ddarparu gan ei deulu, ac erbyn iddo fod yn 10 oed roedd yn defnyddio cadair olwyn. Ar ôl marwolaeth ei dad yn 2008, dechreuodd Mark gael gofal llawn amser gan asiantaeth allanol.

Ers 2011, mae Mark wedi bod yn mynychu canolfan ddydd New Horizons, yr unig ganolfan ddydd yng Nghymru i bobl ag anableddau corfforol. Yn New Horizons, mae Mark wedi chwarae rhan flaenllaw mewn tri phrosiect llwyddiannus, ac mae’n awr yn aelod o banel cleientiaid newydd sy’n cynrychioli anghenion a dymuniadau cleientiaid mewn cyfarfodydd â rheolwyr y ganolfan ddydd a’r awdurdod lleol.

Yn 2023, roedd Mark yn rhan o’r panel ‘Arbenigwyr drwy brofiad’ yn ein Cynadleddau dathlu gwaith cymdeithasol. Mae’n edrych ymlaen at, ac yn gobeithio, cynnig safbwyntiau gwahanol i’r Bwrdd ac at wneud gwahaniaeth positif er budd y gymuned genedlaethol ehangach.

Mae Neil wedi bod yn weithiwr cymdeithasol ers 37 mlynedd. Ar ôl hyfforddi yng Ngogledd Iwerddon, mae wedi gweithio am y rhan fwyaf o'i yrfa yng Nghymru, mewn nifer o awdurdodau yng Ngogledd Cymru fel Gweithiwr Cymdeithasol, Rheolwr Tîm, Rheolwr Gwasanaeth a Phennaeth Gwasanaeth. Yn fwyaf diweddar, bu'n Gyfarwyddwr Gwasanaethau Cymdeithasol yn Sir y Fflint am 14 mlynedd, tan iddo ymddeol yn haf 2024.

Mae gan Neil brofiad manwl o weithio'n llwyddiannus mewn gwasanaethau anabledd dysgu, diogelu, gwasanaethau pobl hŷn, partneriaethau a gwasanaethau plant ac mae ganddo angerdd dros wella gwasanaethau mewn gofal cymdeithasol.

Ar hyn o bryd mae Progress yn gweithio gyda'r Adran Busnes a Masnach ac mae ganddo dros 10 mlynedd o brofiad ar draws Llywodraeth, iechyd a gofal cymdeithasol, pŵer ac ynni yn ogystal â thechnoleg ariannol.

Mae ganddo radd Meistr a Doethuriaeth mewn rheolaeth, gyda diddordeb ymchwil mewn systemau busnes, arweinyddiaeth foesegol, ymddygiad sefydliadol ac entrepreneuriaeth.

Mae diddordebau Progress yn cynnwys gwylio a chwarae pêl-droed yn ogystal â threulio amser gyda'r teulu.

Mae Sarah, sydd â’i gwreiddiau ethnig ym Mhacistan, wedi byw yng Nghonwy ers 20 mlynedd. Mae gan Sarah radd Baglor mewn Gwyddorau Meddygol, a gradd Meistr a oedd yn canolbwyntio ar Iechyd y Cyhoedd, o Brifysgol Manceinion, ac yn ddiweddar cwblhaodd Ddiploma Addysg Uwch mewn Arweinyddiaeth a Rheolaeth Iechyd.

Sarah yw Unigolyn Cyfrifol a rheolwr cofrestredig cartref nyrsio yng Nghonwy, ac mae ganddi brofiad uniongyrchol o ddarparu a rheoli gwasanaethau a reoleiddir, gan wneud yn siŵr bod pob unigolyn yn byw bywyd sy’n bwysig iddyn nhw.

Mae gan Sarah rôl flaenllaw mewn hybu llesiant cymuned yr henoed yng Nghonwy ac mae’n credu’n gryf mewn gwella partneriaethau, arferion gorau comisiynu, a darparu gofal o safon uchel sy’n canolbwyntio ar yr unigolyn. Mae ei diddordebau y tu allan i’r gwaith yn cynnwys teithio, ffitrwydd ac adeiladu.

Hyd at fis Rhagfyr 2022 roedd Sue yn arweinydd strategol sefydledig yn y trydydd sector gyda dros 30 mlynedd o brofiad o weithio ym maes iechyd a gofal cymdeithasol, gan gynnwys 15 mlynedd fel Cyfarwyddwr Cymru yng Nghymdeithas Alzheimer. Roedd rolau Sue, ar lefel strategol a gweithredol, yn canolbwyntio ar ariannu, cynllunio a darparu gwasanaethau o ansawdd uchel, sy'n cael eu harwain gan anghenion, i bobl yr effeithir arnynt gan ddementia. Mae Sue yn credu yng nghryfder a chyfoeth amrywiaeth a gwerth deall a dysgu o leisiau a phrofiadau lluosog i yrru gwelliant a hygyrchedd.

Cafodd Sue yr anrhydedd o gael ei dyfarnu ag MBE yn 2017 am wasanaethau i ddementia yng Nghymru. Ar hyn o bryd mae hi'n aelod o Fwrdd Anweithredol Criced Cymru, Ombwdsmon Gwasanaethau Cyhoeddus Cymru a Chymdeithas Tai Unedig Cymru. Ar ôl bod yn ofalwr o bell i'w ddau riant a oedd yn byw gyda dementia, mae Sue bellach yn defnyddio ei hamser sbâr i wirfoddoli fel Galwr Cydymaith i bobl yr effeithir arnynt gan ddementia ac mae'n mwynhau cerddoriaeth fyw a’r theatr.

Mae gan Trystan Pritchard brofiad ledled y sector cyhoeddus a’r trydydd sector yng Nghymru. Ar hyn o bryd, mae’n Gyfarwyddwr Cynorthwyol Partneriaethau, Ymgysylltu a Chanfyddiad i Addysg a Gwella Iechyd Cymru. Yn y gorffennol mae wedi bod mewn rolau uwch mewn Byrddau Iechyd, y trydydd sector a llywodraeth leol. Mae ei feysydd arbenigedd yn cynnwys ymgysylltu, rheoli strategol, arweinyddiaeth a hyfforddi.

Mae Trystan yn aelod o Bwyllgor Cenedlaethol y Loteri yng Nghymru ac mae’n cadeirio Mantell Gwynedd, y cyngor gwirfoddoli sirol. Mae hefyd wedi gwasanaethu fel Cadeirydd Pwyllgor Cyngor ar Bopeth Cymru.

Mae’n siaradwr Cymraeg rhugl ac mae ei ddiddordebau’n cynnwys mynydda, rygbi Cymru a threulio amser gyda’i deulu.