Ymrwymiad 1: creu amgylcheddau gweithio diogel sy’n gwella’n barhaus ac sy’n gefnogol i iechyd a llesiant

Mae’n bwysig cymryd agwedd eang i gefnogi iechyd a diogelwch corfforol, iechyd meddwl, a llesiant ariannol pobl.

Dylai sefydliadau ddarparu amgylcheddau gweithio diogel i weithwyr.

Dylai sefydliadau gynnig cymorth, neu gyfeirio at wasanaethau a all ddarparu cymorth. Gallai hyn gynnwys cwnsela, rhaglen cymorth i weithwyr neu wasanaethau iechyd galwedigaethol. Dylai sefydliadau annog staff i gael arfer hunanofal da sy'n cynnwys agwedd iach at ddiet, gweithgaredd corfforol, ymlacio a chysgu. Dylai fod gan staff fynediad da at wasanaethau a all helpu gyda chyngor ariannol.

Mae’n bwysig bod rheolwyr yn benodol yn cael yr arweiniad parhaus sydd ei angen i gefnogi eu timau, fel y gallant gael sgyrsiau sensitif ag unigolion a chyfeirio at gymorth arbenigol lle bo angen. Bydd unrhyw unigolyn sy'n rhannu gwybodaeth am gyflwr iechyd yn cael ei drin yn deg a chyda thrugaredd, a gyda chyfleoedd gyrfa gyfartal.

Mae hyn yn cysylltu â’r

• Cod Ymarfer ar gyfer Cyflogwyr Gofal Cymdeithasol, adran 5.7
• Cod Ymarfer Proffesiynol ar gyfer gweithwyr Gofal Cymdeithasol, adrannau 1.5 a 4.5

Mewn sefydliad, mae hyn yn golygu:

• diwylliant o lesiant
• deall bod yr hyn sy’n digwydd inni yn ein bywydau yn effeithio arnom yn ein gwaith
• adnabod yr arwyddion bod rhywun wedi ymlâdd a dan straen oherwydd gwaith
• cydnabod staff sydd â chyflyrau hirdymor a’u helpu i wneud eu gwaith
• hybu llesiant, ar gyfer staff a’r bobl maen nhw’n gweithio gyda nhw, drwy bolisïau, gweithdrefnau a ffyrdd o weithio
• mynediad i iechyd galwedigaethol
• darparu’r offer iawn ar gyfer y gwaith
• cyfeirio ymlaen neu ddarparu cefnogaeth emosiynol, gan gynnwys cefnogaeth gan gymheiriaid
• prosesau iechyd a diogelwch clir, i staff a’r bobl maen nhw’n gweithio gyda nhw, gan gynnwys asesiadau risg
• bod llwythi gwaith yn rhesymol ac yn gyraeddadwy ac yn cael eu hadolygu’n rheolaidd.