Helpwch ni i gael cipolwg ar y gweithlu gofal cymdeithasol yng Nghymru

Rydyn ni'n gofyn i awdurdodau lleol a darparwyr gwasanaethau annibynnol anfon data atom ar niferoedd a nodweddion eu gweithlu fel rhan o’n casgliad data gweithlu blynyddol.

Rydyn ni'n casglu data am y gweithlu er mwyn rhoi cipolwg ar y gweithlu gofal cymdeithasol yng Nghymru.

Rydyn ni'n dadansoddi’r data ac yn ei gyflwyno mewn adroddiad sy’n rhoi trosolwg o’r gweithlu cyfan ac yn dadansoddi’r canfyddiadau ar gyfer gwahanol leoliadau.

Byddwn ni'n cyhoeddi ein hadroddiad ar gasgliad 2023 yn ddiweddarach eleni.

Byddwn ni hefyd yn defnyddio’r data i gynhyrchu erthyglau a chynnwys cysylltiedig am wahanol agweddau ar ein canfyddiadau drwy Porth Data Gofal Cymdeithasol Cenedlaethol Cymru.

Bydd casgliad data eleni yn dechrau ar 9 Medi ac yn cau ar 31 Hydref.

Rydyn ni angen i'ch sefydliad anfon data atom drwy GCCarlein.

Os ydych chi'n gasglwr data ar gyfer eich sefydliad, dylech chi weld ‘Casgliad Data Gweithlu’ yn ymddangos yn y ddewislen uchaf ar ôl mewngofnodi i’ch cyfrif GCCarlein.

Unwaith y byddwch wedi clicio drwodd i’r ardal casgliad data, fe welwch ganllawiau ar sut i gwblhau eich datganiad.

Mae rhaid i awdurdodau lleol anfon eu data atom, ond mae data gan ddarparwyr a gomisiynir yn ein helpu i greu darlun mwy cyflawn o'r sector gofal cymdeithasol yng Nghymru.

Mae darparwyr a gomisiynir yn cynnwys busnesau masnachol, a sefydliadau di-elw a thrydydd sector. Anfonodd 68 y cant o'r sefydliadau hyn eu data atom yn 2022.

Mae cael y darlun mwyaf cyflawn o faint a siâp y gweithlu gofal cymdeithasol yng Nghymru yn ein helpu i gynllunio ar gyfer y dyfodol.

Trwy ddarparu eich data, rydych chi'n cyfrannu at ein dealltwriaeth o'r bobl sy'n gweithio ym maes gofal cymdeithasol yng Nghymru.

Os nad ydych chi'n siŵr pwy yw’r casglwr data ar gyfer eich sefydliad, cysylltwch â data@gofalcymdeithasol.cymru.

Ewch i’n tudalen casgliad data gweithlu i ddarganfod mwy am y casgliad, pam rydyn ni'n casglu’r data, beth rydyn ni'n ei wneud ag ef, a sut rydyn ni'n gweithio gydag Arolygiaeth Gofal Cymru i leihau’r baich o anfon data i’r ddau sefydliad.