Canllawiau newydd i helpu pobl â dementia ac anableddau dysgu i siarad am yr hyn sy'n bwysig iddyn nhw

Rydyn ni wedi datblygu dau ganllaw newydd i gefnogi pobl sy'n gweithio gyda neu'n gofalu am unigolion â dementia ac anableddau dysgu, er mwyn eu helpu i gael sgyrsiau ystyrlon am yr hyn sy’n bwysig iddyn nhw.

Mae'r canllawiau 'Beth sy'n bwysig', sy'n rhan o grŵp ehangach o adnoddau, ar gael ar ein gwefan. Maen nhw ar gyfer unrhyw un sy'n cefnogi pobl ag anghenion gofal cymdeithasol - fel aelodau o'r teulu, gofalwyr a gweithwyr proffesiynol.

Maen nhw’n cynnig camau syml i helpu pobl i ddweud beth maen nhw ei eisiau, ei angen ac yn ei fwynhau mewn bywyd - gan gynnwys risgiau neu'r hyn sy'n eu poeni.

Bydd y canllawiau hyn yn helpu pobl i deimlo eu bod yn cael eu clywed a'u deall. Byddant hefyd yn helpu ymarferwyr a gofalwyr i roi gwell cefnogaeth sy'n addas i fywyd, dymuniadau a phryderon pob person.

Gweithion ni gyda phobl sydd â phrofiad byw i lunio'r canllawiau, er mwyn sicrhau eu bod mor berthnasol a defnyddiol â phosibl.

Dywedodd ein Prif Weithredwr Sarah McCarty: “Mae’r canllawiau ‘Beth sy’n bwysig’ yn adnoddau gwych i helpu pobl i ddarparu gofal effeithiol mewn ffordd sydd wedi’i theilwra i’r person maen nhw’n ei gefnogi.

“Mae sgyrsiau ‘Beth sy’n bwysig’ yn helpu unigolion i gael eu clywed, eu parchu, a’u grymuso i fyw’r bywyd sy’n bwysig iddyn nhw.

“Rydyn ni’n ddiolchgar i’r grŵp rhanddeiliaid, ac i Here2There a Practice Solutions a gyfrannodd at greu’r canllawiau.

“Hoffen ni ddiolch yn arbennig i’r rhai sydd â phrofiad byw, y mae eu lleisiau wedi helpu i lunio’r canllawiau mewn ffyrdd ystyrlon a dilys. Daethant â dealltwriaeth ddofn a chreadigrwydd i’r gwaith, ac roedd yn bleser cydweithio â nhw.”