Arfer gwrth-wahaniaethol
Claire Bevan a Caroline Rees, Cyngor Abertawe
Mae Caroline Rees yn Athrawes Ymgynghorol y Blynyddoedd Cynnar ac yn Athrawes Gyswllt Dechrau'n Deg gyda Chyngor Abertawe. Mae hi'n cefnogi lleoliadau blynyddoedd cynnar i ddarparu ymarfer o ansawdd uchel sy'n diwallu anghenion plant, teuluoedd a chymunedau.
Mae Claire Bevan yn Swyddog Comisiynu Blynyddoedd Cynnar a Gofal Plant gyda Chyngor Abertawe. Mae’n gweithio'n agos gyda darparwyr gofal plant ledled y ddinas i gefnogi gwasanaethau blynyddoedd cynnar cynhwysol, cynaliadwy ac o ansawdd uchel.
Mae'r ddwy yn chwarae rhan allweddol yn nhaith Abertawe i ymgorffori Cynllun Gweithredu Gwrth-hiliaeth Llywodraeth Cymru ar draws y sector gofal plant. Drwy weithio gyda darparwyr a chydweithwyr, ac mewn cydweithrediad â thîm DARPL, mae Caroline a Claire wedi helpu i ddarparu hyfforddiant sector gyfan, gweithdai myfyriol a mannau diogel ar gyfer trafodaethau gonest.
Mae'r gwaith hwn yn canolbwyntio ar wrando brofiadau byw pobl o hiliaeth a dysgu oddi wrthynt drwy waith DARPL, gan ystyried sut y gellir gwella systemau, polisïau ac arferion bob dydd yn y sector blynyddoedd cynnar.
Yn y gynhadledd, byddan nhw'n rhannu dysgu ymarferol o daith Abertawe, yr heriau sy'n wynebu, a sut mae newid ystyrlon yn dechrau drwy wrando, myfyrio a meithrin partneriaethau cryf.
Arolwg gweithlu blynyddoedd cynnar a gofal plant
Michael Davies, Cwmni Strategic Research and Insight (SRI)
Mae Michael Davies yn Gyfarwyddwr Cyswllt yn Strategic Research and Insight (SRI), ac yn Rheolwr Prosiect ar gyfer Arolwg gweithlu’r blynyddoedd cynnar a gofal plant 2026.
Mae Michael yn siaradwr Cymraeg a ganddo dros 15 mlynedd o brofiad yn y maes ymchwil, gan gynnwys y 10 mlynedd diwethaf yn SRI. Mae’n arbenigo mewn cynllunio, cynnal ac adrodd ar ymchwil ledled Cymru ar ran sefydliadau yn y sector cyhoeddus.
Mae Michael wedi arwain a chyflawni ystod eang o brosiectau ymchwil ym meysydd y blynyddoedd cynnar, gofal plant, iechyd a gofal cymdeithasol. Mae hyn yn cynnwys gwaith ar gyfer Llywodraeth Cymru, Iechyd Cyhoeddus Cymru a Gofal Cymdeithasol Cymru.
Drwy weithio gyda darparwyr, ymarferwyr a rhanddeiliaid yn y sector blynyddoedd cynnar ledled Cymru, mae Michael wedi datblygu dealltwriaeth gadarn o’r sector a’r materion sy’n effeithio ar y gweithlu. Mae’n mwynhau cynhyrchu ymchwil ymarferol a hawdd ei ddeall, sy’n helpu i lywio polisi ac yn rhoi cyfle i bobl rannu eu profiadau a chlywed eu lleisiau.
Arweinyddiaeth a rheolaeth
Natalie MacDonald, Prifysgol Cymru y Drindod Dewi Sant
Natalie MacDonald yw Pennaeth Ysgol y Gwyddorau Cymdeithasol ym Mhrifysgol Cymru y Drindod Dewi Sant. Gyda dros 20 mlynedd o brofiad ar draws addysg, gofal ac arweinyddiaeth plentyndod cynnar, mae hi wedi gweithio yn y byd academaidd ac wedi ymarfer, gan gynnwys rolau mewn addysg feithrin a darpariaeth Dechrau’n Deg.
Yn ddiweddar, fe wnaeth Natalie gwblhau ei Doethuriaeth mewn Addysg, gan ganolbwyntio ar sut mae polisi addysg a gofal cynnar yn cael ei ddehongli ac yn dylanwadu ar ymarfer. Mae hi’n arwain ac yn cyfrannu at ymchwil blynyddoedd cynnar, gan gynnwys prosiectau a gomisiynwyd gan Lywodraeth Cymru, ac mae’n gwasanaethu ar nifer o grwpiau cynghori cenedlaethol sy’n cefnogi datblygu polisi, cymwysterau a dysgu proffesiynol ledled Cymru. Mae ei gwaith yn cael ei yrru gan ymrwymiad i gryfhau’r cysylltiad rhwng ymchwil, polisi ac ymarfer i wella canlyniadau i blant, teuluoedd a’r gweithlu.
Jaime Budding, Cyngor Sir Caerfyrddin
Mae Jaime Budding yn Swyddog Gofal Plant Preswyl ac yn Ymarferydd Ystyriol o Drawma gyda Chyngor Sir Caerfyrddin. Mae hi'n cefnogi plant a phobl ifanc sydd wedi profi trawma a phrofiadau bywyd anodd, gan eu helpu i feithrin hyder a gwneud dewisiadau cadarnhaol.
Mae Jaime yn gweithio yn bennaf yn Llety Diogel Hafan, sy'n darparu cymorth i bobl ifanc sy'n symud ymlaen o leoliadau diogel. Mae hi hefyd yn gweithio mewn lleoliadau Dechrau'n Deg, lle mae'n defnyddio ei sgiliau Cymraeg i gefnogi plant ifanc a helpu i annog y genhedlaeth nesaf o siaradwyr Cymraeg.
Mae Jaime wedi cyflawni cymhwyster Lefel 3 mewn Iechyd a Gofal Cymdeithasol ac ar hyn o bryd mae'n astudio tuag at gymhwyster Lefel 4 mewn Arweinyddiaeth a Rheolaeth mewn Iechyd a Gofal Cymdeithasol.
Bydd Jaime yn rhannu sut mae hi wedi annog ei thîm i gofleidio arweinyddiaeth dosturiol a chreu amgylchedd mwy cefnogol i'r staff a'r bobl ifanc maen nhw'n gweithio gyda nhw.
Fframwaith NEST
Gemma Kearney, Cyngor Powys
Mae Gemma Kearney yn athrawes gymwysedig gyda dros 16 mlynedd o brofiad yn y blynyddoedd cynnar a Dechrau'n Deg. Mae'n arwain gwaith ar draws gofal plant Dechrau'n Deg, gofal plant nad yw'n rhan o Dechrau'n Deg, cynaliadwyedd a datblygiad, a chwarae. Mae’n arwain tîm amlddisgyblaethol sy'n canolbwyntio ar wella ansawdd, sicrhau darpariaeth ddigonol a hyrwyddo gwelliant parhaus ar draws y sector.
Mae Gemma yn arwain ar yr Asesiad Digonolrwydd Gofal Plant (ADGP) ac Asesiad Digonolrwydd Chwarae (ADCh), gan helpu i lunio gwasanaethau gofal plant a chwarae sy'n ymatebol, yn gynaliadwy ac yn gynhwysol. Mae’n angerddol am ddysgu ac ymarfer cynhwysol o ansawdd uchel sy’n cael ei arwain gan y plentyn ac sy’n seiliedig ar brofiadau, ynghyd ag arferion cynhwysol. Mae ganddi hefyd radd Meistr mewn Anghenion Dysgu Ychwanegol (ADY).
Sharon Titley, Cyngor Powys
Mae Sharon Titley wedi gweithio ym maes iechyd a gofal cymdeithasol ers 1999 ac mae ganddi BA (Anrh) mewn Polisi Cymdeithasol. Mae wedi gweithio ar draws gwasanaethau iechyd meddwl, cyfiawnder adferol, cyfiawnder troseddol a gwasanaethau plant, ac ar hyn o bryd mae'n gweithio ym maes comisiynu gwasanaethau plant ym Mhowys.
Mae ei gwaith yn canolbwyntio ar wasanaethau llesiant emosiynol a Fframwaith NYTH NEST. Mae hi'n hyrwyddo gweithio perthynol, cyd-gynhyrchu a newid systemau. Mae Sharon yn arbennig o angerddol am ymgorffori arferion perthynol sy’n ystyriol o drawma ar draws sefydliadau, fel bod plant a theuluoedd yn cael profiad o gymorth cydgysylltiedig ble bynnag y maent yn cael mynediad at wasanaethau.
Leanne Griffiths, Cyngor Powys
Mae Leanne Griffiths yn Swyddog Ymgynghorol Plentyndod Cynnar a Chwarae gyda Chyngor Sir Powys. Mae wedi gweithio gyda phlant a theuluoedd Dechrau'n Deg ers 2005, yn gyntaf fel Arweinydd Lleoliad ac, ers 2018, yn ei rôl ymgynghorol bresennol. Mae gan Leanne angerdd dros gefnogi darpariaeth blynyddoedd cynnar o ansawdd uchel.
Mae'n ymweld â lleoliadau’n rheolaidd, yn darparu hyfforddiant, ac yn cynnig arweiniad parhaus. Mae Leanne yn gweithio'n agos gydag ymarferwyr i helpu i greu profiadau chwarae ysbrydoledig sy’n cael eu harwain gan y plentyn ac sy'n meithrin dysgu, datblygiad a lles plant.
Jessica Williams a Naomi Watkins, Arweinwyr Lleoliad Dechrau’n Deg, Sêr Bach y Cwm, Ystradgynlais
Mae Sêr Bach y Cwm yn lleoliad cyn-ysgol sy'n darparu rhaglen Dechrau'n Deg Llywodraeth Cymru i blant dwy i dair oed. Mae'r lleoliad yn cynnig sesiynau rhan-amser Dechrau'n Deg i deuluoedd yn ardal Ystradgynlais.
Mae'r lleoliad wedi ennill gradd ragorol gan Arolygiaeth Gofal Cymru (AGC). Maent yn canolbwyntio ar ddarparu gofal o ansawdd uchel sy'n cefnogi lles a datblygiad plant mewn amgylchedd cynnes, diogel ac ysgogol.
Un o uchafbwyntiau gyrfa Jess oedd ennill Prentis Uwch y Flwyddyn yng Ngwobrau Prentisiaethau Cymru yn 2004, ar ôl cwblhau'r cymhwyster Arwain a Rheoli Lefel 5.
Un o uchafbwyntiau gyrfa Naomi oedd derbyn Gwobr Arweinyddiaeth Gofal Plant Powys 2025 yng Nghynhadledd Gofal Plant Powys.
Mae'r lleoliad yn dilyn fframwaith NEST Llywodraeth Cymru ac yn rhoi pwyslais mawr ar gefnogi teuluoedd. Bydd Jessica a Naomi yn siarad am y ffordd maent yn cefnogi teuluoedd drwy fod yn oedolyn dibynadwy, gan roi amser a lle i rieni fynegi eu teimladau, a'u helpu i gael mynediad at asiantaethau sy’n gallu diwallu anghenion y rhiant a'u plentyn.
Amie Evans, Meithrinfa Enfys Fach, Aberhonddu
Amie Evans yw'r Rheolwr Busnes ac Unigolyn Cyfrifol ym Meithrinfa Enfys Fach yn Aberhonddu. Mae hi wedi arwain datblygiad Pentref Enfys, sef dull sy'n canolbwyntio ar y gymuned i gryfhau ymyrraeth gynnar a chymorth i blant a theuluoedd. Mae’r gwaith hwn yn cyd-fynd ag egwyddorion Fframwaith NYTH/NEST.
Mae Amie yn gynghorydd cymwysedig ac yn ddiweddar cwblhaodd MSc mewn Seicoleg a Thrawma Plentyndod gyda Choleg Prifysgol Llundain (UCL) a Chanolfan Anna Freud. Hi oedd yr unig gyfranogwr Cymreig ar y rhaglen. Mae ei gwaith yn canolbwyntio ar ymarfer sy'n ystyriol o drawma, ymyrraeth gynnar, ymgysylltu â theuluoedd a lles emosiynol plant.
Trwy Bentref Enfys, mae Amie wedi canolbwyntio ar ddod â chefnogaeth yn nes at deuluoedd, gan greu cyfleoedd hygyrch i gysylltu, gwella llesiant, cael cymorth cynnar a chryfhau’r berthynas rhwng rhieni a phlant mewn amgylchedd blynyddoedd cynnar cyfarwydd. Mae ganddi angerdd dros ddangos sut y gall lleoliadau blynyddoedd cynnar chwarae rhan allweddol wrth roi egwyddorion NYTH/NEST ar waith a gwella’r cymorth sydd ar gael i blant a theuluoedd yn eu cymunedau.
Llesiant
Nikki Davies, Cymru Iach ar Waith
Mae Nikki Davies yn Uwch Gynghorydd Iechyd yn y Gweithle gyda Cymru Iach ar Waith ac yn angerddol am wella iechyd, llesiant a chyflogaeth gynhwysol. Mae hi’n helpu sefydliadau greu gweithleoedd saff, iach a chefnogol ble gall unigolion ffynnu.
Mae ganddi ddiddordeb penodol mewn iechyd menywod a datblygu cyfleoedd gwaith hyblyg sy’n helpu pobl aros mewn gwaith, dychwelyd i’r gwaith a datblygu eu gyrfaoedd mewn gwahanol adegau o fywyd.
Mae hi wedi ymrwymo i ddiddymu rhwystrau, hybu cydraddoldeb a llesiant a gweithio gydag eraill i ddatblygu datrysiadau ymarferol sy’n fanteisiol i weithwyr a chyflogwyr.
Corinne Nott a Clare Hinton, Aman Little Inspirations
Mae Corinne Nott a Clare Hinton wedi gweithio yn y sector blynyddoedd cynnar am fwy nag 20 mlynedd ac yn dod â chyfoeth o brofiad a hyfforddiant i'w rolau. Fel tîm rheoli Aman, maen nhw wedi gweithio'n galed i ddatblygu meithrinfa maen nhw'n falch ohoni. Mae eu hymdrechion wedi helpu'r feithrinfa i gyflawni adroddiad arolygu rhagorol gan Arolygiaeth Gofal Cymru (AGC), yn ogystal ag ennill nifer o Wobrau Tîm Gofal Plant Rhondda Cynon Taf, gan gynnwys gwobrau am les staff, arweinydd y flwyddyn ac ymarferydd y flwyddyn.
Mae Corinne a Clare yn rhoi plant wrth galon popeth a wnânt. Maent hefyd yn rhoi pwyslais cryf ar les staff ac ar adeiladu tîm cefnogol a chadarn.
Mae Little Inspirations yn sefydliad sydd wedi ennill gwobrau ac sy’n gweithredu 14 o feithrinfeydd dydd ledled De Cymru. Mae'n canolbwyntio ar werthfawrogi a grymuso staff a phlant, ac ar greu amgylchedd cadarnhaol lle mae pawb yn teimlo'n hapus, yn ddiogel ac yn saff.
