Gwobrau 2025

Mae'r Gwobrau yn wobrau sy'n cydnabod, yn dathlu ac yn rhannu gwaith nodedig ym maes gofal cymdeithasol a gofal plant, chwarae a blynyddoedd cynnar yng Nghymru.

Mae'r gwobrau'n cydnabod gwaith grwpiau, timau a sefydliadau, yn ogystal â gweithwyr gofal unigol o bob rhan o'r sectorau cyhoeddus, preifat, gwirfoddol a chydweithredol yng Nghymru.

Rydyn ni nawr yn croesawu ceisiadau ar gyfer Gwobrau 2025 gan grwpiau, timau a sefydliadau, yn ogystal ag enwebiadau ar gyfer gwobrau gweithwyr unigol.

Mae ceisiadau ac enwebiadau ar gyfer y Gwobrau wedi cau.

Mae gan y Gwobrau 2025 chwe chategori:

• pedwar ar gyfer timau, grwpiau a sefydliadau
• dau ar gyfer gweithwyr.

Adeiladu dyfodol disglair i blant a theuluoedd

Noddir gan Hugh James

Mae'r categori hwn yn dathlu sefydliadau, lleoliadau neu brosiectau sy'n gweithio gyda phlant, pobl ifanc a theuluoedd i'w helpu i gyflawni'r hyn sy'n bwysig iddyn nhw. Rydyn ni’n croesawu ceisiadau o bob rhan o feysydd gofal plant, chwarae, y blynyddoedd cynnar a gofal cymdeithasol sy'n darparu gofal o ansawdd uchel ac yn helpu plant a phobl ifanc i ddisgleirio.

Gall ceisiadau fod gan leoliadau gofal cymdeithasol preswyl, gwasanaethau cymunedol neu statudol. Er enghraifft, y rhai sy'n cefnogi pobl ifanc sydd wedi gadael gofal yn ddiweddar, cartrefi preswyl, neu wasanaethau maethu neu fabwysiadu. Neu allai fod yn lleoliad blynyddoedd cynnar, chwarae neu ofal plant sy'n cefnogi plant i gael dechrau rhagorol mewn bywyd.

Datblygu ac ysbrydoli’r gweithlu

Noddir gan BASW Cymru

Mae’r categori hwn yn dathlu sefydliadau, lleoliadau neu brosiectau sy’n defnyddio dulliau effeithiol, creadigol ac arloesol i ddatblygu’r gweithlu er mwyn cyrraedd galwadau a disgwyliadau presennol a dyfodol.

Gall ceisiadau ddod o wasanaethau statudol, preifat neu wirfoddol sy’n cefnogi oedolion neu blant. Rydyn ni hefyd yn edrych am unrhyw ddulliau sy’n ymdrin â dysgu, datblygu a/neu gymwysterau.

Gweithio mewn partneriaeth

Noddir gan Hwb Gwyddorau Bywyd Cymru

Rydyn ni’n chwilio am brosiectau neu sefydliadau ar draws gofal cymdeithasol a gofal plant, chwarae a blynyddoedd cynnar sy'n gweithio mewn partneriaeth i wella canlyniadau llesiant i blant, teuluoedd ac oedolion. Gallai enghreifftiau gynnwys:

• ymchwilwyr sy'n gweithio gyda darparwyr gofal ac awdurdodau lleol i helpu i gael ymchwil ar waith
• awdurdodau lleol sy’n gweithio gyda gofal iechyd, tai, y trydydd sector a/neu grwpiau cymunedol i gefnogi gofal sy’n seiliedig ar le
• timau gofal cymdeithasol neu sefydliadau sy'n gweithio gydag ysgolion a cholegau i ddenu, recriwtio a chadw gweithlu medrus
• grwpiau sy'n cydweithio i gyd-gynhyrchu ffyrdd newydd a gwahanol o weithio.

Dim ond enghreifftiau yw'r rhain. Mae gennym ni ddiddordeb mewn unrhyw gydweithredu sy'n canolbwyntio ar wneud gwahaniaeth cadarnhaol i fywydau pobl.

Gweithio yn unol ag egwyddorion ymarfer sy'n seiliedig ar gryfderau

Mae Deddf Gwasanaethau Cymdeithasol a Llesiant (Cymru) yn disgwyl i ni roi'r bobl rydyn ni’n eu cefnogi wrth wraidd ein hymarfer.

Mae ymarfer sy'n seiliedig ar gryfderau yn adeiladu ar yr egwyddor, pan fo hynny’n bosibl, ein bod yn helpu oedolion, plant a theuluoedd i ddeall sut y gallan nhw ymateb yn fwy effeithiol i'r agweddau ar eu bywydau sy'n achosi pryder iddyn nhw eu hunain neu i’w gweithwyr proffesiynol. Mae gweithio ochr yn ochr gyda phobl, cynnig cymorth a bod yn glir am yr hyn sydd angen digwydd yn arwain at newid cadarnhaol yn y tymor hwy.

I wneud hyn, mae angen i weithwyr, timau a systemau addasu i adlewyrchu ac ymateb i anghenion pobl sydd angen ein cymorth, yn ogystal â deall yr angen am chwilfrydedd proffesiynol.

Gwobr arweinyddiaeth effeithiol

Noddir gan Practice Solutions

Mae arweinyddiaeth dosturiol ac effeithiol yn hanfodol wrth ddarparu gofal a chymorth o ansawdd uchel. Rydyn ni’n chwilio am unigolion o ar draws gofal cymdeithasol a’r blynyddoedd cynnar sydd:

• yn gofalu am anghenion eu cydweithwyr a’r rhai maen nhw’n eu cefnogi
• yn deall heriau a phersbectifau pobl eraill
• hefo empathi tuag at eu timau a’r rhai maen nhw’n cefnogi
• yn helpu i ddatrys problemau a chyflawni canlyniadau gwell.

Gwobr Gofalwn Cymru

Noddir gan Gofalwn Cymru

Rydyn ni’n chwilio am bobl i enwebu gweithwyr neu wirfoddolwyr rhagorol sy'n ymwneud â gofal cymdeithasol neu ofal plant, chwarae a’r blynyddoedd cynnar, sydd wedi gwneud gwahaniaeth cadarnhaol iawn i fywydau plant a phobl.

Gall y gweithwyr fod mewn unrhyw rôl yn y sectorau cyhoeddus, preifat neu wirfoddol, gan gynnwys gwirfoddolwyr. Gallant hefyd fod yn brentisiaid, gofalwyr di-dâl neu'n bobl sy'n astudio ar gyfer cymwysterau wrth weithio.

Prif noddwr

Llais

Mae Llais yn gorff cenedlaethol annibynnol a sefydlwyd gan Lywodraeth Cymru i roi llais cryfach i bobl Cymru mewn gwasanaethau iechyd a gofal cymdeithasol.

Ei rôl yw sicrhau bod llais y cyhoedd yn cael ei glywed gan y sawl sy’n gwneud penderfyniadau. Mae timau Llais lleol yn casglu profiadau pobl o ddefnyddio gwasanaethau iechyd a gofal cymdeithasol i helpu’r sawl sy’n gwneud penderfyniadau i gynllunio a darparu gwasanaethau gwell ym maes iechyd a gofal cymdeithasol.

Mae gan Llais bedair dyletswydd allweddol. Mae’n ymgysylltu â phobl a chymunedau ac yn gwrando ar eu profiadau o wasanaethau iechyd a gofal cymdeithasol, ac mae’n cynrychioli’r safbwyntiau hynny i ddarparwyr gwasanaethau iechyd a gofal cymdeithasol.

Yn ogystal, mae’r sefydliad yn darparu gwasanaeth eiriolaeth cwynion ym mhob rhanbarth yng Nghymru, ac mae’n hyrwyddo ymwybyddiaeth o’i waith ymhlith y cyhoedd a chymunedau lleol.

Noddwyr categori

BASW Cymru

Noddwr y categori 'Datblygu ac ysbrydoli'r gweithlu'

Cymdeithas broffesiynol ar gyfer gwaith cymdeithasol a gweithwyr cymdeithasol yng Nghymru yw BASW Cymru. Mae’n cefnogi aelodau yn eu hymarfer o ddydd i ddydd, yn ymgyrchu ar faterion allweddol sy’n ymwneud â gwaith cymdeithasol, ac yn dylanwadu ar bolisi a deddfwriaeth y llywodraeth ledled Cymru.

Hugh James

Noddwr y categori 'Adeiladu dyfodol disglair i blant a theuluoedd'

Mae Hugh James yn ymdrin ag ystod amrywiol o arbenigeddau cyfreithiol ac wedi cynnal presenoldeb gweithredol yn y sector gofal cymdeithasol yng Nghymru.

Mae’r cwmni’n darparu cyngor a chynrychiolaeth i awdurdodau cyhoeddus mewn achosion yn ymwneud â’r Ddeddf Plant a’r Llys Gwarchod, mae’n rhoi cyngor i awdurdodau cyhoeddus, cyrff chwaraeon a sefydliadau eraill ar ddiogelu, mae’n gweithredu ar ran darparwyr gofal mewn materion yn ymwneud ag eiddo, a materion corfforaethol, masnachol a rheoleiddiol, ac mae’n gweithredu ar ran rheoleiddwyr y sector, gan gynnwys Gofal Cymdeithasol Cymru.

Hwb Gwyddorau Bywyd Cymru

Noddwr y categori 'Gweithio mewn partneriaeth'

Mae Hwb Gwyddorau Bywyd Cymru yn helpu i annog datblygu a defnyddio arloesiadau gwyddor bywyd ym maes iechyd a gofal cymdeithasol yng Nghymru.

Mae’r sefydliad yn cysylltu arloeswyr â phartneriaid ymchwil, cyfleoedd ariannu a phobl ar y rheng flaen ym maes iechyd a gofal cymdeithasol. Wrth gadw’r ddeialog i fynd, maent yn gallu cael yr effaith fwyaf wrth gefnogi arloesiadau sy’n mynd i’r afael â’r anghenion mwyaf hanfodol.

Practice Solutions

Noddwr y wobr 'Arweinyddiaeth effeithiol'

Mae Practice Solutions yn darparu gwasanaeth ymgynghori sy’n seiliedig ar werthoedd i’r sector iechyd a gofal cymdeithasol a’r sector cyhoeddus ehangach ledled Cymru a’r DU. Mae’r cwmni’n ysgogi newid ystyrlon wrth gyfuno arweinyddiaeth, arloesi digidol a gwella gwasanaethau, tra’n cynnal ymrwymiad i bobl a chymunedau.

Gofalwn Cymru

Noddwr y wobr 'Gofalwn Cymru'

Mae Gofalwn Cymru yn codi ymwybyddiaeth a dealltwriaeth y cyhoedd o ofal cymdeithasol, gofal plant, chwarae a blynyddoedd cynnar. Ei nod yw denu rhagor o bobl â’r sgiliau a’r gwerthoedd cywir i weithio mewn rolau gofalu gyda phlant ac oedolion.

Bydd seremoni wobrwyo Gwobrau 2025 yn cael ei chynnal ar 1 Mai 2025. Byddwn ni’n diweddaru'r dudalen hon gyda mwy o wybodaeth amdani yn agosach at yr amser.

Os oes gennych chi gwestiwn neu os na allwch chi ddod o hyd i'r hyn rydych chi’n chwilio amdano, cysylltwch â ni.