Gwobrau 2025

Mae'r Gwobrau yn wobrau sy'n cydnabod, yn dathlu ac yn rhannu gwaith nodedig ym maes gofal cymdeithasol a gofal plant, chwarae a blynyddoedd cynnar yng Nghymru.

Mae'r gwobrau'n cydnabod gwaith grwpiau, timau a sefydliadau, yn ogystal â gweithwyr gofal unigol o bob rhan o'r sectorau cyhoeddus, preifat, gwirfoddol a chydweithredol yng Nghymru.

Rydyn ni nawr yn croesawu ceisiadau ar gyfer Gwobrau 2025 gan grwpiau, timau a sefydliadau, yn ogystal ag enwebiadau ar gyfer gwobrau gweithwyr unigol.

Mae ceisiadau ac enwebiadau ar gyfer y Gwobrau wedi cau.

Mae ein panel beirniaid wedi dewis 11 prosiect, tîm a sefydliad, a saith gweithiwr, yn rownd derfynol Gwobrau 2025, ar draws chwe chategori.

Adeiladu dyfodol disglair i blant a theuluoedd

Noddir gan Hugh James

Cylch Meithrin y Gurnos

Mae Cylch Meithrin y Gurnos yn lleoliad gofal plant cyfrwng Cymraeg ym Merthyr Tudful. Yn ei amgylchedd heddychlon, gall plant ganolbwyntio ar chwarae a dysgu, rhyngweithio cymdeithasol, creadigrwydd a lles emosiynol. Maent yn tyfu llysiau yn yr ardd ac yn darganfod buddion ffordd iach o fyw mewn ardal lle gall mannau gwyrdd diogel fod yn anodd eu canfod.

Mae’r gwasanaeth hefyd yn hyrwyddo’r Gymraeg yn y gymuned trwy gynnal digwyddiadau a meithrin perthnasoedd, yn dangos i rieni bod y Gymraeg yn ased i ddyfodol eu plant, mae’r lleoliad wedi newid meddwl a chreu cyfleoedd gydol oes i blant.

Teuluoedd yn Gyntaf, Cyngor Bwrdeistref Sirol Blaenau Gwent

Mae gwasanaeth Teuluoedd yn Gyntaf Cyngor Bwrdeistref Sirol Blaenau Gwent yn darparu cymorth ataliol i deuluoedd â phlant o dan 18 oed, neu’r rhai o dan 25 oed sydd ag anghenion ychwanegol. Mae gwasanaethau’n cynnwys ymgysylltu â’r gymuned, cyfryngu, gweithwyr cymdeithasol mewn ysgolion a therapyddion teulu.

Mae ymagwedd y gwasanaeth, sy’n seiliedig ar gryfderau ac yn canolbwyntio ar ddeilliannau, yn golygu bod cymorth yn cael ei adeiladu ar sail yr hyn sy’n bwysig i deuluoedd a phobl ifanc. Gwrandewir ar y bobl sy’n cael cymorth a gallant gymryd perchnogaeth dros eu cynlluniau cymorth, ac o ganlyniad, bu cynnydd mewn teuluoedd yn cyflawni eu nodau.

Gwasanaeth Cymorth Teuluoedd Casnewydd, Cyngor Dinas Casnewydd a Barnardo’s

Mae Gwasanaeth Cymorth Teuluoedd Casnewydd yn bartneriaeth strategol rhwng Cyngor Dinas Casnewydd a Barnardo's. Trwy ei gwasanaeth Ymateb Cyflym a’i thîm therapiwtig, mae’r bartneriaeth yn defnyddio ymyrraeth flaengar, ystyriol o drawma, i leihau nifer y plant mewn gofal yng Nghasnewydd.

Mae’r gwasanaeth Ymateb Cyflym yn bodloni anghenion brys teuluoedd sydd ar fin mynd i ofal, tra bod y tîm therapiwtig yn cefnogi teuluoedd sydd â phrofiad o fod mewn gofal. Mae’r dull cydweithredol hwn yn cadw cymorth yn gyson ac nad oes angen i deuluoedd ailadrodd eu hanes. Caiff amserau aros eu torri a chaiff lleisiau plant a theuluoedd eu clywed a’u grymuso o’r dechrau’n deg.

Datblygu ac ysbrydoli'r gweithle

Noddir gan BASW Cymru

Recriwtio Gweithwyr Cymdeithasol Plant yn Rhyngwladol, Cyngor Bwrdeistref Pen-y-bont ar Ogwr

Nod prosiect ‘Recriwtio gweithwyr cymdeithasol plant yn rhyngwladol’ yw cyflawni’r deilliannau gorau i blant a theuluoedd trwy sicrhau’r cydbwysedd cywir o sgiliau a phrofiad yn nhimau gwaith cymdeithasol plant yr awdurdod lleol. Mae’r prosiect yn canolbwyntio ar recriwtio gweithwyr cymdeithasol rhyngwladol cymwys a phrofiadol i helpu lleihau dibyniaeth y timau ar weithwyr asiantaeth, cadw staff a gwella profiad y gweithlu.

Hyd yn hyn, mae’r prosiect wedi recriwtio 13 o weithwyr cymdeithasol o Dde Affrica, Zimbabwe ac Unol Daleithiau America, sydd wedi dod â sefydlogrwydd i’r timau.

Elm – Mental Health Care UK yn Sir Ddinbych

Mae Elm Mental Health Care UK o’r farn bod trawsnewid ei ddiwylliant staff a buddsoddi yn y diwylliant hwnnw yn hanfodol i ddarparu gofal rhagorol i’r bobl y mae’n eu cefnogi.

Trwy ganolbwyntio ar ddatblygiad proffesiynol, ymgysylltu â’r gymuned a lles staff, mae staff yn gallu darparu gofal o ansawdd uchel yn well gan eu bod yn teimlo eu bod yn cael eu cefnogi yn eu rolau. Mae rhaglenni hyfforddiant ar gael yn barod i staff, gan gynnwys gwersi Cymraeg. Mae’r cyfleoedd hyn wedi arwain at ddyrchafiadau a datblygiad proffesiynol sylweddol. Mae staff yn teimlo’u bod yn cael eu gwerthfawrogi, eu clywed a’u bod yn gallu ymgorffori gwerthoedd y lleoliad, sef cynhwysiant a gweithio ar y cyd.

Gwobr Arweinyddiaeth Ysbrydoledig

Noddir gan Practice Solutions

Avril Bracey, Pennaeth Gwasanaeth Gofal Cymdeithasol Oedolion Cyngor Sir Gaerfyrddin

Enwebwyd gan Corinne Everett-Guy, Uwch-reolwr Timau Gwaith Cymdeithasol yng Nghyngor Sir Gaerfyrddin.

Dechreuodd Avril ei gyrfa mewn gofal cymdeithasol 45 mlynedd yn ôl fel gweithiwr dan hyfforddiant mewn gwasanaethau plant. Yn ystod ei gyrfa, dywed Corinne fod Avril “wedi profi ei bod yn arweinydd ac yn llysgennad cryf ar gyfer gofal cymdeithasol oedolion” a’i bod hi “yn gwthio ffiniau yn gyson i greu newid cadarnhaol, parhaol”.

Mae Avril wedi cefnogi “dulliau arloesol” mewn gofal cymdeithasol oedolion ac roedd hi’n rhan annatod o ddatblygu’r Noddfa Hwyrnos, sef gwasanaeth lles y tu allan i oriau i bobl mewn perygl o gael argyfwng iechyd meddwl.

Mae “caredigrwydd, anhunanoldeb, uniondeb a pharodrwydd Avril i fynd y filltir ychwanegol” yn golygu ei bod hi’n dangos “parch ac urddas cyson tuag at bawb mae hi’n cyfarfod â nhw”.

Dywed Corinne fod Avril yn “ysbrydoliaeth, gan osod meincnod ar gyfer rhagoriaeth mewn arweinyddiaeth gofal cymdeithasol. Mae ei gallu i ysbrydoli a symbylu ei gwasanaeth wedi arwain at ddiwylliant o welliant parhaus a safonau uchel.”

Mae un cyfarwyddwr yn disgrifio bod Avril fel “arweinydd ysbrydoledig mewn gofal cymdeithasol. Yn ei chyfnod fel Pennaeth Gwasanaethau Oedolion yn Sir Gaerfyrddin, mae hi wedi trawsnewid gofal cymdeithasol oedolion, gan newid bywyd cannoedd o oedolion agored i niwed.” Ychwanega, “mae Avril yn ymgorffori arweinyddiaeth yn seiliedig ar werthoedd.”

Mae Avril wedi eiriol dros ofalwyr di-dâl ac mae wedi datblygu mentrau i wella ymarfer, hefyd. Aeth ymhell y tu hwnt i’r disgwyl i gefnogi ei thîm yn ystod pandemig Covid-19, gydag un uwch-reolwr yn dweud: “O 7 y bore tan 11 y nos, gweithiodd Avril yn ddiflino i sicrhau bod ein tîm yn barod ar gyfer y pandemig. Fe wnaeth ei rhagofal a’i chynllunio trwyadl sicrhau bod gan yr holl staff ddigon o PPE a chefnogaeth.”

Ffion Cole, Prif Swyddog, Cyngor Bwrdeistref Sirol Pen-y-bont ar Ogwr

Enwebwyd gan Alex Williams, Rheolwr Grŵp – Hybiau Ardal.

Mae Ffion wedi gweithio i Gyngor Bwrdeistref Sirol Pen-y-bont ar Ogwr ers 11 mlynedd ac mae’n Rheolwr Tîm Hyb Ardal Tîm y Gogledd.

Cydnabyddir arddull arwain Ffion ar draws yr awdurdod lleol. Mae gweithwyr cymdeithasol newydd gymhwyso neu amhrofiadol yn aml yn cael eu gosod yn ei ‘hacademi gwaith cymdeithasol’ am eu chwe mis cyntaf yn y gwaith. Yma, cânt eu cefnogi a’u meithrin gan dîm arbenigol Ffion.

Hefyd, mae Ffion yn cynnig mentora ffurfiol a chymorth anffurfiol i reolwyr sydd eisiau dysgu sut i ddatblygu diwylliant ac arddull arwain Ffion a’i thîm.

Yn rhan o’i rôl, mae Ffion yn arwain cefnogi gweithwyr cymdeithasol sydd wedi cael eu recriwtio’n rhyngwladol.

Yn flaenorol, roedd dros 50 y cant o’r staff yn weithwyr asiantaeth, ond mae nifer y staff asiantaeth wedi lleihau’n sylweddol mewn cwta 18 mis ac mae dros 50 y cant o’r gweithwyr cymdeithasol yn yr hybiau ardal bellach yn rhyngwladol.

Meddai un gweithiwr cymdeithasol rhyngwladol: “Sicrhaodd Ffion fod y broses sefydlu mor hwylus â phosibl, esboniodd hi bopeth a’m helpu i ymgartrefu’n dda, gartref ac yn y tîm.”

Mae Ffion wedi helpu i adeiladu gweithlu cyson a sefydlog, sydd o fudd i blant a theuluoedd yn yr ardal, gan fod gweithwyr yn gallu meithrin perthynas barhaus â’r bobl maen nhw’n eu cefnogi.

Hefyd, mae Ffion yn cadw lleisiau plant a theuluoedd yn ganolog i ymarfer ei thîm.

Meddai’r Uwch Weithiwr Cymdeithasol, Hannah Jones: “Mae [Ffion] yn haeddu hyn gymaint. Mae’n derbyn popeth fel y daw ac mae hi bob amser yn barod i helpu. Ers i mi fod yn y tîm, rwy’ wedi dysgu cymaint heb deimlo dan bwysau, ond yn cael fy nghefnogi bob amser."

Keri Warren, Pennaeth Gwasanaethau Plant a Phobl Ifanc yng Nghyngor Castell-nedd Port Talbot

Enwebwyd gan Nune Aleksanyan, Ruth Griffiths, Chris Frey Davies, Maria Selby a Victoria Smith, bob un yn brif swyddogion yng Ngwasanaethau Plant a Phobl Ifanc Cyngor Castell-nedd Port Talbot.

Mae Keri wedi bod yn rhan “ymroddedig” o’r uwch dîm rheoli yng Nghyngor Castell-nedd Port Talbot ers 2012, pan ymunodd fel Prif Swyddog, cyn dod yn Bennaeth y Gwasanaethau Plant a Phobl Ifanc yn 2018.

Dywed y prif swyddogion fod Keri wedi bod “yn ddim llai nag eithriadol” yn y ffordd mae hi wedi arwain gwasanaethau plant Castell-nedd Port Talbot. A hithau’n “garedig ei natur”, mae Keri yn blaenoriaethu lles staff, wrth i’r tîm weithio tuag at “gyflawni deilliannau cadarnhaol i deuluoedd”. Mae Keri yn atgoffa’r tîm am bwysigrwydd ymarfer gwaith cymdeithasol da trwy greu amgylchedd dysgu iach a diogel, annog trafodaethau agored a chael ymateb cyfunol i reoli risg.

Mae Keri wedi gwneud yn siŵr bod y systemau a’r prosesau cywir ar waith i sicrhau bod staff yn teimlo’n ddiogel pan fyddant yn delio â sefyllfaoedd anodd yn y gymuned.

Mae adborth gan staff y gwasanaeth yn amlygu natur agos atoch a chefnogol Keri. Dywed un aelod o staff: “Mae Keri yn gefnogol ac mae’n annog cydbwysedd rhwng bywyd a gwaith fel y gallwn ddelio â bywyd y tu hwnt i’r gwaith heb deimlo’n euog.”
Dywed un uwch reolwr: “Mae [Keri] yn gosod safon uchel trwy esiampl ac mae bob amser yn ystyried ffyrdd o roi cyfleoedd i weithwyr ddatblygu a thyfu fel ymarferwyr. Mae llais y plentyn a’r teulu o’r pwys mwyaf iddi.”

Mae ffocws Keri ar les a datblygiad proffesiynol staff, a dull sy’n canolbwyntio ar y plentyn, wedi creu “amgylchedd cefnogol sy’n meithrin arloesi a chydweithredu”.

Gwobr Gofalwn Cymru

Noddir gan WeCare Wales

Casey Baker, Gweithiwr Gofal Cymdeithasol, Byw â Chymorth Cyngor Bwrdeistref Sirol Pen-y-bont ar Ogwr

Enwebwyd gan Ceri Williams, Rheolwr Gwasanaeth Darparwr gyda Byw â Chymorth Cyngor Bwrdeistref Sirol Pen-y-bont ar Ogwr.

Mae agwedd greadigol a pherson-ganolog Casey at ei rôl wedi’i gwneud “yn ffigur annwyl ymhlith y bobl mae hi’n eu cefnogi, a’i chydweithwyr”.

Mae Casey bob amser yn chwilio am ffordd o ddod â gwen i wyneb y bobl mae hi’n eu cefnogi. Mae hi’n trefnu partïon pen-blwydd a Nadolig, diwrnodau sba, nosweithiau crefft, nosweithiau gemau a nosweithiau gwneud pitsa i’r bobl mae hi’n eu cefnogi. Ond “nid dim ond gweithgareddau yw’r rhain; maen nhw’n brofiadau wedi’u cynllunio’n ofalus sy’n dod â hwyl ac ymdeimlad o gymuned i bawb sy’n cymryd rhan.”

Gallu Casey i gysylltu â phobl ar lefel bersonol sy’n ei gwneud hi’n weithiwr gofal cymdeithasol eithriadol. Mae hi’n ddibynadwy, yn sylwgar ac mae wedi creu amgylchedd meithringar lle mae pawb yn teimlo o bwys, a’u bod yn cael eu cefnogi. Dywed Ceri: “Awydd diffuant i wneud gwahaniaeth cadarnhaol sy’n gyrru gweithredoedd Casey.”

Mae ei hymroddiad yn mynd y tu hwnt i’w dyletswyddau rheolaidd. Wrth ddarparu gofal diwedd oes i un o’r bobl mae hi’n eu cefnogi, aeth Casey ati ar ei phen ei hun i addurno ystafell yr unigolyn ar gyfer ei phen-blwydd i sicrhau ei bod hi’n gallu dathlu o hyd, er ei bod yn gaeth i’r gwely. Cynigiodd Casey “gysur a llawenydd ar adeg anodd”. Hefyd, mae Casey yn cefnogi ac yn annog ei thîm. A hithau’n arwain trwy esiampl, mae wedi creu awyrgylch cydweithredol a thosturiol, ac mae’n ysbrydoli ei chydweithwyr gyda’i pharodrwydd i fynd y filltir ychwanegol.

Dywed Ceri: “Mae gweithredoedd Casey yn arddangos y safonau gofal ac ymroddiad uchaf.”

Gayle Jones, Cydlynydd Gofal yn Habitat Homecare, Abertawe

Enwebwyd gan Lisa Buchanan, Unigolyn Cyfrifol a Chyfarwyddwr yn Habitat Homecare.

Mae Lisa yn disgrifio bod Gayle fel “conglfaen y tîm”, sydd bob amser yn mynd y tu hwnt i’r disgwyl.

Dywed un o’r bobl y mae Gayle yn eu cefnogi: “Mae [Gayle] yn mynd y filltir ychwanegol a does dim byd byth yn ormod o drafferth iddi. Mae hi’n gweithio mor galed ac yn gwneud fy mywyd o ddydd i ddydd gymaint yn haws.”

Ar hyn o bryd, mae Gayle yn cwblhau ei chymhwyster Lefel 5 mewn iechyd a gofal cymdeithasol. Mae Gayle bob amser yn chwilio am ffyrdd o wella’i gwaith ac ansawdd bywyd y bobl mae hi’n eu cefnogi.

Ar ôl clywed am fenter genedlaethol Iechyd Cyhoeddus Cymru ar iechyd y geg, Gwên am Byth, cysylltodd Gayle â hyfforddwyr Gwên am Byth i drefnu sesiynau i’w chydweithwyr. Mae arfer gorau ym maes iechyd y geg bellach yn rhan o’r drefn ddyddiol yn Habitat Homecare.

Dywed Lisa fod Gayle “yn ymgorffori tosturi ac uniondeb” ym mhob agwedd ar ei gwaith. Dros y Nadolig, mae hi’n paratoi prydau i gleientiaid sydd mewn perygl o fod yn unig. Mae hi’n “cael ei pharchu’n fawr iawn gan ei chydweithwyr ac mae’n annwyl iawn i’w chleientiaid”.

Wrth ddychwelyd i’w swydd ar ôl colli ei phartner, meddai Gayle: “Roeddwn i am wneud fy ngwaith i’r bobl sydd fy angen i a chael ffocws.”

Dywedodd rheolwr gofal Habitat Homecare: “Mae hi bob amser yn barod i roi help llaw, cynnig arweiniad a chefnogi ei chydweithwyr trwy unrhyw heriau y gallant eu hwynebu. Mae cyfraniadau Gayle at y tîm yn amhrisiadwy ac mae ei hymroddiad diwyro wedi gwneud argraff barhaus.”

Sarah Sharpe, Gofalwr Plant Cofrestredig yn Poppins Daycare ym Mro Morgannwg

Enwebwyd gan Lee Walker-Metzelaar, Gofalwr Plant.

Mae angerdd ac ymroddiad Sarah yn disgleirio yn ei gwaith fel gofalwr plant. Dywed Lee fod gan Sarah “amynedd di-ben-draw” dros y plant mae hi’n gofalu amdanynt.

Ar ei rhandir yn y Barri, mae Sarah yn addysgu’r plant i blannu, tyfu a chynaeafu eu ffrwythau a’u llysiau eu hunain. Gyda’i Hachrediad Hygge, mae hi’n meithrin perthynas iach gyda bwyd a natur.

Mae Sarah wedi helpu rhieni i fanteisio ar gymorth hanfodol ar gyfer eu plant. Mae hi wedi cyfeirio teuluoedd at Ddechrau’n Deg i gael dosbarthiadau magu plant, ymweliadau iechyd ychwanegol a sesiynau chwarae gartref.

Dywed un rhiant: “Allen ni ddim bod yn fwy diolchgar”. Mae un arall yn disgrifio sut mae gofal Sara wedi rhoi “ymdeimlad anhygoel o chwarae a hyder” i’w blentyn.

Mae Sarah yn cynnig gofal plant am ddim am awr i rieni fel y gallant fynd i’w meddyg teulu i gael prawf ceg y groth.

Hefyd, mae Sarah yn gweithio gyda’r awdurdod lleol i gefnogi gofalwyr plant newydd a hyrwyddo cyrsiau hyfforddiant, ac mae’n cynnig nosweithiau mentora am ddim i ofalwyr plant.

Yn 2024, enillodd Sarah wobr ‘Gweithiwr Chwarae y Flwyddyn’ Clybiau Plant Cymru am ei hymrwymiad i ddysgu. Hefyd, enillodd Wobr y Gymdeithas Broffesiynol ar gyfer Gofal Plant a’r Blynyddoedd Cynnar (PACEY) Cymru.

Meddai Lee, “Sarah sydd â’r galon fwyaf a mwyaf caredig o blith pawb rwy’n eu hadnabod.”

Terri Steele, Gofalwr Plant Cofrestredig Hunangyflogedig o Geredigion

Enwebwyd gan Claire Protheroe, Pennaeth Contractau a Phrosiectau’r Gymdeithas Broffesiynol ar gyfer Gofal Plant a’r Blynyddoedd Cynnar (PACEY) Cymru.

Mae “egni heintus, brwdfrydedd a gwerthfawrogiad Terri o anghenion plant” yn golygu bod rhieni’r plant mae hi’n gofalu amdanynt yn llwyr ymddiried ynddi, ac mae gan blant “y rhyddid i archwilio [a] gofod i fod yn rhwystredig.”

Mae Terri yn angerddol am ddysgu. Mae ganddi gymhwyster Ysgol Goedwig ac mae’n addysgu’r plant am arddio, yr amgylchedd a diwylliant Cymru. Maen nhw’n dysgu iaith arwyddion, hefyd.

Meddai un rhiant: “Roedd gwybod pa mor hapus yw fy mab gyda Terri yn golygu bod dychwelyd i’r gwaith mor ddi-boen â phosibl. Ni allwch roi pris ar hynny, ond gallwch roi gwobr iddi ar ei gyfer.”

Enwebodd rhieni a gofalwyr Terri ar gyfer Gwobr Hyrwyddwr Lles y Gymdeithas Broffesiynol ar gyfer Gofal Plant a’r Blynyddoedd Cynnar (PACEY) Cymru, lle bu’n enillydd ar y cyd.

Mae Terri hefyd yn ymwneud â’r sector blynyddoedd cynnar a gofal plant. Mae hi’n cymryd rhan mewn fforymau gofalwyr plant, lle mae’n helpu i amlygu’r heriau sy’n wynebu’r sector.

Hefyd, mae hi wedi gweithio gydag Uned Gofal Plant Ceredigion i hyrwyddo gofal plant fel gyrfa ac fe’i henwebwyd am wobr ar gyfer y gwaith hwn.

Enwebwyd Terri ar gyfer y Gwobrau yn rhannol gan deulu a gefnogodd yn dilyn marwolaeth eu mab, a ddywedodd: “Mae [Terri] wedi rhoi sicrwydd, tosturi a lle i’m merch lle bydd ei brawd bach bob amser yn cael ei gofio a’i garu ... Ni fyddwn am anfon fy mhlentyn i unman arall.”

Gweithio mewn partneriaeth

Noddir gan Hwb Gwyddorau Bywyd Cymru

Cysylltu Sir Gâr

Mae Cysylltu Sir Gâr yn brosiect partneriaeth sy’n cael ei gynnal gan Gyngor Sir Caerfyrddin a’i nod yw helpu trigolion i fyw a heneiddio’n dda.

Mae’r bartneriaeth yn gweithio gyda sefydliadau trydydd sector i wneud yn siŵr bod pobl yn cael y gwasanaethau iawn, ar yr adeg iawn. Mae amrywiaeth o wasanaethau gan ddarparwyr lleol ar gael trwy blatfform Cysylltu Sir Gâr. Mae’r rhain yn cynnwys atal hunanladdiad, gwasanaethau cam-drin domestig a phrosiectau ymgysylltu cymunedol. Gall arbenigwyr o wahanol sefydliadau cydlynu dull person-ganolog i helpu’r bobl a gefnogant i gyflawni’r deilliannau gorau posibl.

Delta CONNECT

Mae prosiect Delta CONNECT yn ddull cydweithredol gan awdurdodau lleol, y bwrdd iechyd lleol a gwasanaethau cymunedol ar draws gorllewin Cymru, gyda’r nod o wella deilliannau lles i oedolion hŷn sydd â chyflyrau cronig a’r rhai mewn perygl o ynysu’n gymdeithasol.

Mae Delta CONNECT yn cyfuno gwasanaethau gofal cymdeithasol a gofal iechyd i’w gwneud hi’n haws i bobl reoli eu hiechyd a’u lles. Mae’n defnyddio technoleg a chymorth wedi’i bersonoli, fel galwadau rhagweithiol a gwasanaeth ymateb 24/7, i gynnig gofal ataliol a rhagweithiol. Diolch i’r gwasanaeth, caiff cleifion eu rhyddhau o’r ysbyty 5 niwrnod yn gynt, ar gyfartaledd.

Porth Lles

Mae Porth Lles Cyngor Bwrdeistref Sirol Wrecsam yn bartneriaeth â nifer o sefydliadau awdurdod lleol, iechyd a thrydydd sector. Dim ond unwaith y mae angen i bobl adrodd eu hanes er mwyn cael at wybodaeth, cyngor a chymorth gan yr amrywiol sefydliadau sy’n defnyddio’r platfform digidol. Mae’r Porth Lles hefyd yn darparu gwybodaeth am sut i gael gafael ar gymorth i bobl ifanc, ar dai a thenantiaethau, a chymorth i deuluoedd.

Mae’r porth yn lleihau’r rhwystrau rhag cael cymorth a chafodd ei greu i ymateb i’r adborth gan deuluoedd a oedd wedi cael y broblem hon.

Gweithio yn unôl ag egwyddorion ymarfer sy’n seiliedig ar gryfderau

Cefnogi Pobl i Gyflawni’r Hyn sy’n Bwysig, Tîm Dilyniant Cyngor Sir y Fflint

Mae model cymorth ‘Dilyniant’ Cyngor Sir y Fflint yn defnyddio dull seiliedig ar gryfderau i helpu oedolion ag anableddau dysgu mewn lleoliadau byw â chymorth i ddod yn fwy annibynnol.

Mae’r tîm dilyniant, y bobl sy’n cael eu cefnogi a’u teulu yn cydweithio i osod nodau cyflawnadwy, seiliedig ar gryfderau, gan roi’r sawl sy’n derbyn gofal yn ganolog i bob penderfyniad. Mae hyn yn golygu eu bod yn cael y lefel gywir o gymorth i annog annibyniaeth.

Trwy ganolbwyntio ar yr hyn y gallant ei wneud, yn hytrach na’r hyn na allant eu wneud, caiff sgiliau eu datblygu, nid dim ond eu cynnal. Mae hyn yn helpu pobl i gyflawni’r hyn sy’n bwysig iddyn nhw ac yn lleihau eu dibyniaeth ar wasanaethau.

Gwasanaeth Gofal Dementia a Gofal Seibiant Gorllewin Morgannwg, Marie Curie

Mae’r gwasanaeth ataliol hwn yn cynnig cymorth i bobl sy’n byw gyda dementia cyfnod hwyr yn Abertawe a Chastell-nedd Port Talbot trwy integreiddio gofal iechyd, dan oruchwyliaeth nyrs gofrestredig, a rhaglen cyfeillion, wedi’i rhedeg gan wirfoddolwyr.

Mae gofal cartref a gofal seibiant yn cynnig cymorth meddygol ymarferol i helpu pobl aros gartref am gyfnod hirach. Mae gwirfoddolwyr hyfforddedig yn darparu gofal cyfannol, gan helpu’r bobl maen nhw’n eu cefnogi i gynnal eu rhwydweithiau cymdeithasol, mwynhau eu hobïau a hel atgofion, gan ddarparu gofal seibiant i aelodau eu teulu, hefyd.

Mae dull y gwasanaeth, yn seiliedig ar gryfderau, yn rhoi’r sawl a gynorthwyir yn ganolog i bob penderfyniad, gan eu helpu i gynnal eu hannibyniaeth yn ddiogel.

Cylchoedd Cefnogi, Ategi

Mae prosiect Cylchoedd Cefnogi Ategi, ym Mhontypridd, yn fodel o ymarfer seiliedig ar gryfderau, sy’n grymuso pobl ag anghenion cymhleth i ddefnyddio’u sgiliau mewn cymuned gefnogol. Mae Cylchoedd Cefnogi yn canolbwyntio ar yr hyn y gall pobl ei wneud a sut gallant gyfrannu.

Mae’n creu amgylchedd sy’n caniatáu i bobl ag anableddau dysgu ysgafn, amhariadau corfforol a heriau iechyd meddwl feithrin hyder, datblygu galluoedd newydd a gwneud cysylltiadau cymdeithasol ystyrlon. Mae’r dull hwn yn newid y ffocws o gyfyngiadau i gryfderau, gan helpu pobl i ddiffinio’u llwybrau a goresgyn heriau trwy eu galluoedd eu hunain.

Prif noddwr

Llais

Mae Llais yn gorff cenedlaethol annibynnol a sefydlwyd gan Lywodraeth Cymru i roi llais cryfach i bobl Cymru mewn gwasanaethau iechyd a gofal cymdeithasol.

Ei rôl yw sicrhau bod llais y cyhoedd yn cael ei glywed gan y sawl sy’n gwneud penderfyniadau. Mae timau Llais lleol yn casglu profiadau pobl o ddefnyddio gwasanaethau iechyd a gofal cymdeithasol i helpu’r sawl sy’n gwneud penderfyniadau i gynllunio a darparu gwasanaethau gwell ym maes iechyd a gofal cymdeithasol.

Mae gan Llais bedair dyletswydd allweddol. Mae’n ymgysylltu â phobl a chymunedau ac yn gwrando ar eu profiadau o wasanaethau iechyd a gofal cymdeithasol, ac mae’n cynrychioli’r safbwyntiau hynny i ddarparwyr gwasanaethau iechyd a gofal cymdeithasol.

Yn ogystal, mae’r sefydliad yn darparu gwasanaeth eiriolaeth cwynion ym mhob rhanbarth yng Nghymru, ac mae’n hyrwyddo ymwybyddiaeth o’i waith ymhlith y cyhoedd a chymunedau lleol.

Noddwyr categori

BASW Cymru

Noddwr y categori 'Datblygu ac ysbrydoli'r gweithlu'

Cymdeithas broffesiynol ar gyfer gwaith cymdeithasol a gweithwyr cymdeithasol yng Nghymru yw BASW Cymru. Mae’n cefnogi aelodau yn eu hymarfer o ddydd i ddydd, yn ymgyrchu ar faterion allweddol sy’n ymwneud â gwaith cymdeithasol, ac yn dylanwadu ar bolisi a deddfwriaeth y llywodraeth ledled Cymru.

Hugh James

Noddwr y categori 'Adeiladu dyfodol disglair i blant a theuluoedd'

Mae Hugh James yn ymdrin ag ystod amrywiol o arbenigeddau cyfreithiol ac wedi cynnal presenoldeb gweithredol yn y sector gofal cymdeithasol yng Nghymru.

Mae’r cwmni’n darparu cyngor a chynrychiolaeth i awdurdodau cyhoeddus mewn achosion yn ymwneud â’r Ddeddf Plant a’r Llys Gwarchod, mae’n rhoi cyngor i awdurdodau cyhoeddus, cyrff chwaraeon a sefydliadau eraill ar ddiogelu, mae’n gweithredu ar ran darparwyr gofal mewn materion yn ymwneud ag eiddo, a materion corfforaethol, masnachol a rheoleiddiol, ac mae’n gweithredu ar ran rheoleiddwyr y sector, gan gynnwys Gofal Cymdeithasol Cymru.

Hwb Gwyddorau Bywyd Cymru

Noddwr y categori 'Gweithio mewn partneriaeth'

Mae Hwb Gwyddorau Bywyd Cymru yn helpu i annog datblygu a defnyddio arloesiadau gwyddor bywyd ym maes iechyd a gofal cymdeithasol yng Nghymru.

Mae’r sefydliad yn cysylltu arloeswyr â phartneriaid ymchwil, cyfleoedd ariannu a phobl ar y rheng flaen ym maes iechyd a gofal cymdeithasol. Wrth gadw’r ddeialog i fynd, maent yn gallu cael yr effaith fwyaf wrth gefnogi arloesiadau sy’n mynd i’r afael â’r anghenion mwyaf hanfodol.

Practice Solutions

Noddwr y wobr 'Arweinyddiaeth effeithiol'

Mae Practice Solutions yn darparu gwasanaeth ymgynghori sy’n seiliedig ar werthoedd i’r sector iechyd a gofal cymdeithasol a’r sector cyhoeddus ehangach ledled Cymru a’r DU. Mae’r cwmni’n ysgogi newid ystyrlon wrth gyfuno arweinyddiaeth, arloesi digidol a gwella gwasanaethau, tra’n cynnal ymrwymiad i bobl a chymunedau.

Gofalwn Cymru

Noddwr y wobr 'Gofalwn Cymru'

Mae Gofalwn Cymru yn codi ymwybyddiaeth a dealltwriaeth y cyhoedd o ofal cymdeithasol, gofal plant, chwarae a blynyddoedd cynnar. Ei nod yw denu rhagor o bobl â’r sgiliau a’r gwerthoedd cywir i weithio mewn rolau gofalu gyda phlant ac oedolion.

Bydd seremoni wobrwyo Gwobrau 2025 yn cael ei chynnal ar 1 Mai 2025. Byddwn ni’n diweddaru'r dudalen hon gyda mwy o wybodaeth amdani yn agosach at yr amser.

Os oes gennych chi gwestiwn neu os na allwch chi ddod o hyd i'r hyn rydych chi’n chwilio amdano, cysylltwch â ni.