Ymlaen - y strategaeth ymchwil, arloesi a gwella newydd ar gyfer gofal cymdeithasol

Heddiw rydyn ni wedi lansio Ymlaen, ein strategaeth ymchwil, arloesi a gwella newydd.

Nod y strategaeth hon yw creu diwylliant lle mae tystiolaeth yn ganolog i ddarpariaeth gofal cymdeithasol, a lle mae pobl yn teimlo cefnogaeth ag ysbrydoliaeth i drio pethau newydd.

Strategaeth ar y cyd yw Ymlaen. Gyda’n partneriaid, rydyn ni am greu awyrgylch cynhwysol a hygyrch lle mae ymchwil a thystiolaeth yn helpu i lywio ac ysbrydoli penderfyniadau ar bob lefel.

Rydyn ni eisiau i bobl sy’n arwain, yn datblygu ac yn darparu gofal cymdeithasol i deimlo’n hyderus i ddefnyddio tystiolaeth ac arloesedd i wneud gwahaniaeth positif i ofal a chymorth yng Nghymru.

Rydyn ni’n gwybod bod gwaith gwych yn digwydd ar draws gofal cymdeithasol yng Nghymru. Byddwn ni'n defnyddio gwybodaeth a phrofiad ymarferwyr i ganolbwyntio ar yr hyn sy'n bwysig ac i sicrhau newid sy'n gweithio'n ymarferol.

Bydd Ymlaen hefyd yn ein helpu i ddatblygu dealltwriaeth well o effaith ein gwaith. Mae’n bwysig ein bod ni’n dysgu’n barhaus, ac yn addasu beth rydyn ni’n ei wneud i wneud y gorau o’r effaith positif gallwn ni ei chael ar bobl sy'n darparu gofal a chymorth.

Wrth gyd-weithio gyda’n partneriaid i roi’r strategaeth ar waith, byddwn ni'n dysgu gan bobl sy’n gweithio yng ngofal cymdeithasol ac yn defnyddio gofal a chymorth, a gan ymchwil a data.

Byddwn ni’n gwerthuso ein heffaith wrth fynd ymlaen a byddwn yn agored ac yn dryloyw ynglŷn â’r hyn sy'n gweithio a’r hyn nad yw'n gweithio. Byddwn ni’n hyblyg, gan ddefnyddio'r hyn rydyn ni’n ei ddysgu i addasu ein ffordd o weithredu lle bo angen.