Mae Jo Bolton wedi'i phenodi i rôl ein Cyfarwyddwr Cyllid, Partneriaethau a Gwasanaethau Corfforaethol a bydd yn ymgymryd â'r rôl ar 6 Hydref.
Ar hyn o bryd mae Jo yn Gyfarwyddwr Strategol Gweithrediadau a Gwasanaethau Corfforaethol yn Llais, y corff cyhoeddus annibynnol sy'n sicrhau bod lleisiau pobl yng Nghymru yn cael eu clywed ym maes iechyd a gofal cymdeithasol.
Dywedodd Sarah McCarty, ein Prif Weithredwr: “Rydyn ni’n falch iawn o groesawu Jo, a wnaeth argraff cadarnhaol ar y panel cyfweld gyda'i chyfoeth o brofiad ym maes cyllid a gwasanaethau corfforaethol.
“Bydd ei mewnwelediad a'i harbenigedd yn ased aruthrol i waith Gofal Cymdeithasol Cymru.
“Dangosodd Jo hefyd ymrwymiad dwfn i gefnogi'r sector gofal cymdeithasol a dangosodd ein gwerth craidd o weithio ar y cyd i wella canlyniadau i unigolion sy'n defnyddio gofal a chymorth a'u teuluoedd."
Dywedodd Jo: “Rwy'n falch o ymuno â Gofal Cymdeithasol Cymru. Mae gen i gysylltiad personol dwfn â gofal cymdeithasol trwy'r cymorth a gefais i'm mab a fu marw a'm mam.
“Rwy'n angerddol am weithio gyda phobl sy'n gwneud gwahaniaeth go iawn, ac yn gyffrous i gyfrannu at sefydliad sy'n rhannu fy ngwerthoedd.”
Ychydig am Jo
Mae Jo yn gyfrifydd siartredig gyda chefndir cryf mewn cyllid, arweinyddiaeth a phwrpas cymdeithasol. Dechreuodd ei gyrfa mewn ymarfer cyfrifeg, gan weithio gydag ystod o sefydliadau – llawer ohonyn nhw yn y sectorau elusennau, trydydd a chymdeithasau tai.
Arweiniodd ei diddordeb mewn gwneud gwahaniaeth cadarnhaol at dai, lle bu'n gweithio gyda Chymdeithas Tai Cymunedol Hafod a Bron Afon. Fel rhan o'r uwch dîm arweinyddiaeth yn Bron Afon, chwaraeodd Jo ran allweddol wrth lunio gwerthoedd, diwylliant a systemau'r sefydliad newydd. Datblygodd fframweithiau adrodd ariannol a llywodraethu cryf, a thyfodd ei hangerdd dros weithio gyda phobl a sefydliadau sy'n canolbwyntio ar y gymuned.
Mae Jo hefyd wedi gweithio yn y sector gweithgynhyrchu meddygol, gan arbenigo mewn cynhyrchion wroleg. Yn yr amgylchedd cyflym hwn, cymerodd yr awenau mewn cyllid, AD, TG a chyfleusterau, gan gefnogi'r rheolwr gyfarwyddwr gydag adroddiadau o ansawdd uchel a chynllunio busnes.
Yn ddiweddarach, ymunodd Jo â Chwmpas, cwmni cydweithredol sy'n canolbwyntio ar adeiladu economi decach a gwyrddach. Fel Cyfarwyddwr Cyllid ac Adnoddau, arweiniodd brosiect trawsnewid digidol, gan gyflwyno systemau newydd ar gyfer cyllid, cyflogres a rheoli cwsmeriaid, a throsglwyddo i atebion cwmwl. Roedd hi hefyd yn goruchwylio newidiadau ar draws y sefydliad a wellodd y ffyrdd o weithio i bawb.
Yn fwy diweddar, mae Jo wedi gweithio gyda Llais, lle roedd ei rôl yn canolbwyntio ar wneud gwasanaethau a gweithrediadau corfforaethol yn gryfach, a chefnogi ei genhadaeth bwysig o gynrychiolaeth gyhoeddus.