Diweddariadau i'n porth data yn gwneud data gofal cymdeithasol yn haws i gael mynediad ato a'i ddeall

Rydyn ni wedi diweddaru Porth Data Gofal Cymdeithasol Cenedlaethol Cymru gyda golwg newydd a mwy o nodweddion i’ch cefnogi yn eich gwaith.

Mae’r porth data yn siop un stop ar gyfer data gofal cymdeithasol yng Nghymru.

Mae’n cynnwys data am ofal cymdeithasol ei hun a rhai o’r pethau a allai effeithio ar alw ac angen, fel iechyd, amddifadedd a’r boblogaeth.

Rydyn ni’n cael y data o amrywiaeth o ffynonellau. Daw llawer o’r data ar ofal cymdeithasol o gasgliadau sy'n cael eu cynnal gan Lywodraeth Cymru, fel y Cyfrifiad Plant sy’n Derbyn Gofal a Chymorth. Daw data arall gan y Swyddfa Ystadegau Gwladol (ONS), Iechyd Cyhoeddus Cymru, ac awdurdodau lleol. Mae'r porth hefyd yn cynnwys ein data cofrestru ein hunain.

Rydyn ni hefyd yn ychwanegu crynodebau data i’r porth, i’ch helpu i wneud synnwyr o’r data sy’n cael ei gasglu ym maes gofal cymdeithasol.

Bydd y crynodebau'n amlygu tueddiadau mewn setiau data, yn rhoi mwy o gyd-destun iddyn nhw, neu'n gwneud cysylltiadau rhwng y data a'r ymchwil.

Rydyn ni eisoes wedi cyhoeddi pedwar crynodeb a byddwn yn ychwanegu mwy dros amser.

Y crynodebau data sydd eisoes ar y porth yw:

• Ydy gofalwyr di-dâl Cymru yn colli cyfle i gael cymorth?
• Ymdeimlad o gymuned: Beth ydyn ni'n gwybod am sut mae pobl yn teimlo am ble maen nhw'n byw?
• Plant yng Nghymru sydd mewn perygl o ddioddef camfanteisio
• Y nifer o blant sy'n derbyn gofal.

Mae Claire Miller, ein Harweinydd Porth Data, wedi ysgrifennu blog sy’n disgrifio’r newidiadau sydd wedi’u gwneud i’r porth yn fanylach.

Mae'r blog yn amlygu gwerth y setiau data newydd ac yn darparu dadansoddiad o'r gwahanol fathau o graffiau y bydd gennych chi fynediad iddyn nhw ar y porth nawr.

Ewch i’n gwefan Grŵp Gwybodaeth i ddarllen blog Claire.