Gwobr Gofalu trwy’r Gymraeg 2025

Mae’r wobr Gofalu trwy’r Gymraeg yn wobr flynyddol sy’n cydnabod, yn dathlu ac yn rhannu gwaith y rhai sydd wedi gwneud gwahaniaeth go iawn i fywydau pobl trwy ddarparu gofal a chymorth trwy gyfrwng y Gymraeg.

Mae’r wobr yn cydnabod gwaith pobl sy’n gweithio ym maes gofal cymdeithasol, gwaith cymdeithasol a gofal plant, chwarae a’r blynyddoedd cynnar yn y sector cyhoeddus, preifat, gwirfoddol a chydweithredol yng Nghymru.

Unrhyw weithwyr cyflogedig ym maes gofal cymdeithasol, gwaith cymdeithasol neu ofal plant, chwarae neu’r blynyddoedd cynnar sy’n darparu gofal a chymorth trwy gyfrwng y Gymraeg.

Er enghraifft, gallan nhw fod yn gweithio mewn cartref gofal, meithrinfa neu fod yn weithiwr gofal cartref.

Gallen nhw fod ag unrhyw lefel o Gymraeg – rhugl, rhywfaint o Gymraeg neu’n ddysgwr. Y peth pwysig yw eu bod nhw’n defnyddio’r Gymraeg yn eu gwaith gyda’r bobl y maen nhw’n gofalu amdanyn nhw.

Bydd ein beirniaid yn chwilio am weithwyr sy’n gwneud gwahaniaeth cadarnhaol i fywydau pobl trwy ddefnyddio’r Gymraeg.

Bydd panel bach o feirniaid yn mynd trwy’r enwebiadau ac yn llunio rhestr fer.

Byddwn ni’n rhoi gwybod i chi a’r person rydych chi wedi’i enwebu os ydyn nhw wedi cael ei ddewis ar gyfer y rownd derfynol.

Byddwn ni wedyn yn gwahodd aelodau o’r cyhoedd i bleidleisio dros yr enillydd drwy’r cyfryngau cymdeithasol a’n gwefan.

Bydd yr enillydd yn cael ei gyhoeddi mewn digwyddiad yn yr Eisteddfod Genedlaethol yn Wrecsam am 11am, ddydd Iau, 7 Awst 2025.

Dyma’r rheolau mynediad:

Cyffredinol

• Cewch enwebu rhywun am ddim
• Mae’r wobr Gofalu trwy’r Gymraeg yn agored i unrhyw weithiwr cyflogedig sy’n gweithio ym maes gofal cymdeithasol neu ofal plant, chwarae a’r blynyddoedd cynnar yng Nghymru
• Rhaid i bawb sy’n cael eu henwebu ddarparu rhywfaint o ofal a chymorth trwy gyfrwng y Gymraeg
• Rhaid i’r gwaith rydych chi’n siarad amdano yn y ffurflen enwebu fod wedi cael ei wneud ers Tachwedd 2023
• Cewch chi ddim enwebu rhywun rydych chi’n perthyn yn agos iddo – er enghraifft, cewch chi ddim enwebu eich gwraig, gŵr, mab neu ferch – na rhywun rydych chi mewn perthynas bersonol ag
• Ni fyddwn ni’n derbyn enwebiadau ar gyfer mwy na dau aelod o staff o’r un gweithle neu sefydliad
• Rhaid i’r rhai sydd wedi’u henwebu weithio i’r safonau ymddygiad ac ymarfer a ddisgrifir yn y Cod Ymarfer Proffesiynol ar gyfer Gofal Cymdeithasol
• Ni fyddwn ni’n derbyn unrhyw enwebiadau ar ôl y dyddiad cau, sef 5pm ddydd Gwener, 27 Mehefin 2025.

Eich enwebiad

• Rhaid i chi ateb pob cwestiwn ar y ffurflen enwebu
• Rhaid i chi gadw at yr uchafswm geiriau – ni fydd y beirniaid yn edrych ar unrhyw enwebiadau sy’n mynd dros y terfyn geiriau
• Bydd y beirniaid ond yn edrych ar yr wybodaeth ar y ffurflen enwebu ac ni fyddan nhw’n edrych ar ddeunydd ychwanegol, fel lluniau neu fideos
• Rhaid i chi roi manylion cyswllt ar eich cyfer chi a’r person rydych chi’n ei enwebu
• Rhaid i chi wneud yn siŵr bod yr unigolyn wedi rhoi caniatâd i chi ei enwebu cyn cyflwyno’r ffurflen
• Os bydd y person rydych chi wedi’i enwebu yn cael ei roi ar y rhestr fer, byddwn ni’n defnyddio’r wybodaeth rydych chi’n ei rhoi i ni ar y ffurflen enwebu i hyrwyddo’r wobr Gofalu trwy’r Gymraeg a’i enwebiad
• Ni allwn ni ddychwelyd eich ffurflen enwebu.

Dylech chi wneud yn siŵr eich bod chi a’r person rydych chi’n ei enwebu wedi darllen a deall y telerau ac amodau hyn cyn i chi anfon eich enwebiad atom ni:

Cyhoeddusrwydd

Rhaid i chi a’r person rydych chi’n ei enwebu gytuno i ni ddefnyddio’r wybodaeth yn eich ffurflen enwebu i wneud y canlynol:

• hyrwyddo a rhoi cyhoeddusrwydd i’r wobr Gofalu trwy’r Gymraeg, gan gynnwys datganiadau i'r wasg, negeseuon cymdeithasol ac erthyglau ar-lein
• rhannu ymarfer nodedig a helpu pobl eraill i ddysgu yn y sectorau gofal cymdeithasol a gofal plant, chwarae a’r blynyddoedd cynnar.

Gallai pawb sydd wedi cyrraedd y rownd derfynol gael cyhoeddusrwydd yn y cyfryngau yng Nghymru.

Byddwn ni’n rhoi tlws i’r enillydd a thystysgrif i bawb sydd wedi cyrraedd y rownd derfynol. Ni fydd unrhyw wobr ariannol na’r hyn sy’n cyfateb iddi.

Bydd pawb sydd wedi cyrraedd y rownd derfynol a’u henwebwyr yn cael eu gwahodd i seremoni wobrwyo Gofalu trwy’r Gymraeg yn yr Eisteddfod Genedlaethol yn Wrecsam ddydd Iau, 7 Awst 2025. Os na fydd y rhai sydd wedi cyrraedd y rownd derfynol yn gallu dod i’r seremoni, bydd angen iddyn nhw roi gwybod i ni ymlaen llaw a dweud wrthym ni pwy fydd yn derbyn y wobr neu’r dystysgrif ar eu rhan.

Os byddwn ni’n canfod bod rhywun sydd wedi cyrraedd y rownd derfynol neu ei enwebydd wedi torri’r rheolau – cyn neu ar ôl cyflwyno’r wobr – efallai y bydd y beirniaid yn gwahardd y gweithiwr. Os bydd hyn yn digwydd, rhaid anfon y tlws a/neu’r dystysgrif yn ôl atom ni ar unwaith.