Mae’r Grant Datblygu Gweithlu Gofal Cymdeithasol Cymru (SCWWDP) yn raglen grant hir-sefydlog i gefnogi hyfforddiant a datblygu’r gweithlu ar draws gofal cymdeithasol yng Nghymru.
Heddiw, rydyn ni wedi cyhoeddi’r adroddiad themau a chanfyddiadau cenedlaethol o sut y buddsoddwyd y grant SCWWDP gan y rhanbarthau yn 2023 i 2024.
Prif ganfyddiadau 2023 i 2024 yw:
- yn gyffredinol, mae’r cyfanswm gwariant ar SCWWDP wedi cynyddu 1.8 y cant (£219,086), o £12,475,258 i £12,694,344
- roedd y cyfanswm gwariant yn cynnwys:
- £7,640,051 o’r grant SCWWDP
- 30 y cant o gyllid cyfatebol (£3,274,308) a gyfrannwyd gan bob awdurdod lleol
- £1,779,985 o gyllid awdurdod lleol ychwanegol (yn ychwanegol at 30 y cant o gyllid cyfatebol)
- roedd cynnydd o 9.2 y cant yn y gwariant ar staff sy’n darparu dysgu a datblygu uniongyrchol
- bu bron i hanner yr awdurdodau lleol (45.5 y cant) weld cynnydd mewn presenoldeb hyfforddiant ar draws y sector.
Yn 2023 i 2024 bu i’r grant SCWWDP:
- gefnogi rhaglenni dysgu a datblygu ym mhob un o’r saith rhanbarth yng Nghymru, gyda thuedd barhaus o ddarpariaeth ar lefel leol
- gefnogi 1,889 o ddysgwyr cymwysterau galwedigaethol, cynnydd o 3.3 y cant ers y llynedd
- gefnogi 1,356 o bobl ar hyfforddiant cymhwyso gwaith cymdeithasol, cynnydd o 15.9 y cant ers y llynedd
- gefnogi 996 o bobl gyda hyfforddiant ôl-gymhwyso mewn gwaith cymdeithasol, cynnydd o 16.8 y cant ers y llynedd
- gefnogi 448 o bobl gyda dyfarniadau arbenigol ôl-gymhwyso gwaith cymdeithasol, er enghraifft ymarfer galluogi, asesydd budd gorau a Gweithiwr Proffesiynol Iechyd Meddwl Cymeradwy (AMHP). Roedd hyn yn gynnydd o 15.2 y cant ers y llynedd
- ddarparu 135,169 o leoedd hyfforddi gyda phresenoldeb o 82.8 y cant
- helpu i gynyddu presenoldeb mewn hyfforddiant gwasanaethau ehangach megis iechyd, yr heddlu, addysg, gofalwyr di-dâl a gwirfoddolwyr. Roedd hyn yn gynnydd o 28.2 y cant ers y llynedd.
Dywedodd Sarah McCarty, ein Prif Weithredwr, “Rydyn ni am i’r gweithlu gofal cymdeithasol gael ei ysgogi, ei ymgysylltu a'i werthfawrogi, gyda’r gallu, y cymhwysedd a’r hyder i ddiwallu anghenion gofal a chymorth pobl Cymru.
“Y gweithlu gofal cymdeithasol yw ased mwyaf y sector ac mae datblygu'r gweithlu yn rhan annatod o sicrhau y gall pobl ragori yn eu rolau presennol ond hefyd fod yn barod ar gyfer y dyfodol.
“Bob blwyddyn rydyn ni’n dosbarthu tua £7 miliwn o gyllid i gefnogi datblygiad y gweithlu gofal cymdeithasol yn rhanbarthol. Mae awdurdodau lleol yn darparu cyllid cyfatebol i’r grant, sy’n cael ei ddefnyddio i gefnogi hyfforddiant a gweithgarwch datblygu'r gweithlu yn eu sefydliadau eu hunain ac ar gyfer darparwyr yn y sector annibynnol a gwirfoddol.
“Mae ystod eang o gymorth ar gael ac mae'r cyfleoedd dysgu a datblygu a ariennir drwy SCWWDP wedi'u teilwra i anghenion lleol y gweithlu ar draws y sector ym mhob rhanbarth ac yn cael ei oruchwylio gan bartneriaeth traws-sector.
“Rydyn ni’n falch o gyhoeddi'r themâu a'r canfyddiadau cenedlaethol o ddefnydd rhanbarthol y grant SCWWDP yn 2023 i 2024. Dim ond un ffynhonnell ariannu yw SCWWDP i gefnogi datblygiad y gweithlu gofal cymdeithasol yng Nghymru. Yn ogystal â SCWWDP, mae datblygu’r gweithlu gofal cymdeithasol yng Nghymru yn cael ei gefnogi gan gyllid ychwanegol gan awdurdodau lleol, buddsoddiad a wneir gan ddarparwyr y sector preifat a'r trydydd sector ac hefyd grant gofal cymdeithasol a gweithlu Llywodraeth Cymru i awdurdodau lleol.
“Rydyn ni’n bwriadu archwilio sut y gallwn ni greu darlun manylach a llawnach yn y dyfodol gydag awdurdodau lleol, rhanbarthau a Llywodraeth Cymru. I ddarganfod mwy am y cyfleoedd datblygu gweithlu a dysgu sydd ar gael i'r gweithlu gofal cymdeithasol, rydyn ni’n eich annog i gysylltu â thimau datblygu'r gweithlu yn eich ardal leol."