Mae'r digwyddiad yma ar gyfer:
- arweinwyr a rheolwyr sy’n arwain timau mewn lleoliadau gofal plant a'r blynyddoedd cynnar
- dysgwyr sy’n astudio tuag at Lefel 4 Paratoi ar gyfer Arwain a Rheoli ym maes Gofal, Chwarae, Dysgu, a Datblygiad Plant.
Byddwn ni’n edrych ar y pynciau canlynol:
Trosolwg o Gymwysterau – Suzi Gray, Ymgynghorydd Technegol, City & Guilds ac Amy Allen-Thomas, Swyddog Pynciau, CBAC
Bydd y sesiwn yma'n edrych ar sut mae’r gyfres o gymwysterau gofal, chwarae, dysgu a datblygiad plant, o Lefel 2 i Lefel 5, yn gallu cefnogi datblygiad y gweithlu a bod yn rhan hollbwysig o ddarparu gwasanaethau cynaliadwy o ansawdd uchel.
Cewch ddysgu sut mae cydweithio a chyfranogiad wedi'i dargedu ym mhroses asesu'r cymwysterau yn gallu helpu’ch staff i gael y gorau o gyllid, i fod yn llwyddiannus, ac i wneud cynnydd yn gyflymach.
Cydraddoldeb, amrywiaeth a chynhwysiant – Mark Brown Swyddog Arweiniol Cydraddoldeb, Amrywiaeth a Chynhwysiant, Gofal Cymdeithasol Cymru
Yn ystod y sesiwn yma, byddwn ni'n edrych ar y gwahaniaeth rhwng diffiniadau tegwch a chydraddoldeb a sut rydyn ni'n diffinio amrywiaeth a gwahaniaethu yng Nghymru.
Byddwn ni hefyd yn edrych ar rai ystyriaethau ymarferol o ran cydraddoldeb, amrywiaeth a chynhwysiant mewn lleoliadau blynyddoedd cynnar, yn ogystal â’r effaith y gall stereoteipio, rhagfarn, gwahaniaethu a throseddau casineb eu cael ar lesiant plant sy’n defnyddio gofal plant.
Hunanasesu – Kevin Barker/Ceri Herbert, Arolygiaeth Gofal Cymru
Bydd Kevin Barker a Ceri Herbert yn hwyluso trafodaeth am bwysigrwydd hunanasesu o ran darparu gwasanaeth o ansawdd da i blant.
Byddant yn myfyrio ar yr hyn a ddysgwyd o arolygiadau ac ymgysylltiadau eraill â darparwyr. Bydd hon yn sesiwn rhyngweithiol a fydd yn defnyddio profiadau’r rheini sy’n bresennol.